ໂບອິ້ງ ກຽມໂຈະການຜະລິດ ຍົນລຸ້ນ “737 Max”

12

ບໍລິສັດໂບອິ້ງ ຜູ້ຜະລິດຍົນລາຍໃຫຍ່ທີ່ສຸດຂອງໂລກຈາກສະຫະລັດ ກຽມໂຈະການຜະລິດຍົນໂດຍສານ ລຸ້ນ “737 Max” ໃນເດືອນມັງກອນປີໜ້າ ຫຼັງຈາກເກີດເຫດໂສກນາຕະກຳກັບຍົນລຸ້ນນີ້ແລ້ວ 2 ຄັ້ງ ສົ່ງຜົນໃຫ້ມີຜູ້ເສຍຊີວິດ ທັງໝົດ 346 ຄົນ.

ສຳນັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດ ອາເມຣິກາ ເມື່ອວັນຈັນ ທີ 16 ທັນວາ ວ່າ ບໍລິສັດໂບອິ້ງ ໄດ້ອອກຖະແຫຼງການ ເມື່ອວັນຈັນ ທີ 16 ທັນວາ ວ່າ ກຽມໂຈະການຜະລິດຍົນໂດຍສານ ລຸ້ນ 737 Max ທຸກລຸ້ນ “ແບບບໍ່ມີກຳນົດ” ຕັ້ງແຕ່ເດືອນມັງກອນປີໜ້າເປັນຕົ້ນໄປ ໂດຍໂບອິ້ງຢືນຢັນວ່າ ຈະບໍ່ມີການປົດພະນັກງານຈາກໂຮງງານຜະລິດ ແລະ ປະກອບຊິ້ນສ່ວນຂອງຍົນລຸ້ນດັ່ງກ່າວ ເຊິ່ງຕັ້ງຢູ່ໃນເມືອງເຣນຕັນ ໃກ້ກັບເມືອງຊີແອດເທິລ ແລະ ພະນັກງານທັງ ໝົດຂອງໂຮງງານດັ່ງກ່າວ ປະມານ 12.000 ຄົນ ແລະ ຈະໄດ້ຮັບເງິນເດືອນ ແລະ ສະຫວັດດີການອື່ນໆຕາມປົກກະຕິ.

ການຕັດສິນໃຈຂອງໂບອິ້ງ ເຊິ່ງເປັນຜົນມາຈາກການລົງມະຕິຂອງຄະນະຜູ້ບໍລິຫານ ຫຼັງຈາກການປະຊຸມເມື່ອອາທິດຜ່ານມາ ທີ່ເມືອງຊິຄາໂກ້ ມີແນວໂນ້ມສູງທີ່ຈະສົ່ງຜົນກະທົບຕໍ່ກົນໄກຕ່ອງໂສ້ການຜະລິດໃນອຸດສະຫະກຳຍານຍົນທາງອາກາດຂອງໂລກ ແລະ ເສດຖະກິດຂອງສະຫະລັດອາດຈະສົ່ງຜົນກະທົບເຊັ່ນດຽວກັນ ເນື່ອງຈາກຕະຫຼອດປີງົບປະມານ 2018/2019 ເຊິ່ງຈະສິ້ນສຸດເມື່ອເດືອນກັນຍາ ຜ່ານມາ ຜົນຜະລິດຈາກອຸດສະຫະກຳທາງອາກາດຂອງສະຫະລັດ ຫຼຸດລົງ 17% ເມື່ອທຽບກັບໄລຍະເວລາດຽວກັນຂອງປີງົບປະມານກ່ອນໜ້າ ເຫຼືອມູນຄ່າການຜະລິດ 106.400 ລ້ານໂດລາສະຫະລັດ (ກວ່າ 943.600 ຕື້ກີບ).

ຢ່າງໃດກໍ່ຕາມ ການທີ່ສຳນັກງານບໍລິຫານການບິນແຫ່ງຊາດຂອງສະຫະລັດ ອາເມຣິກາ (FAA: Federal Aviation Administration) ໄດ້ອອກຖະແຫຼງການ ເມື່ອກາງອາທິດທີ່ຜ່ານມາ ວ່າ ບໍ່ສາມາດອະນຸມັດໃຫ້ສາຍການບິນພາຍໃນປະເທດ ນຳຍົນໂບອິ້ງ 737 Max ກັບມາໃຊ້ຈົນໝົດປີນີ້ ຖືວ່າໃຊ້ເວລາດົນກວ່າທີ່ ໂບອິ້ງໄດ້ຄາດການໄວ້ຫຼາຍ ເຊິ່ງ ເອັຟເອເອ ໄດ້ລະງັບການນຳໃຊ້ຍົນ ລຸ້ນ 737 Max ຂອງໂບອິ້ງ ຕັ້ງແຕ່ເດືອນມີນາ ຜ່ານມາ ຫຼັງຈາກເກີດເຫດໂສກສາຕະກຳແລ້ວ 2 ຄັ້ງ ຈາກຍົນໂບອິ້ງ 737 Max 8 ໃນໄລຍະຫ່າງກັນບໍ່ດົນ ມີຜູ້ເສຍຊີວິດ ທັງໝົດ 346 ຄົນ.