ໄຟປ່າ ຮຸນແຮງຄັ້ງປະຫວັດສາດ ໃນອົສຕຣາລີ ພາກຊີວິດໂຄອາລາແລ້ວ ກວ່່າ 2.000 ໂຕ

20

ໄຟປ່າໃນລັດນິວ ເຊົາ ເວລສ໌ ຍັງລຸກໄໝ້ຮຸນແຮງຕໍ່ເນື່ອງ 2 ເດືອນຜ່ານມາ ສ້າງຄວາມເສຍຫາຍຕໍ່ພື້ນທີ່ປ່າ, ບ້ານເຮືອນ ແລະ ພື້ນທີ່ປຸກຝັ່ງເປັນພື້ນທີ່ກວ້າງ ລັດຖະບານຄາດ ໝີໂຄອາລາ ໄດ້ຕາຍໄປກັບໄຟປ່າ ຄັ້ງນີ້ ກວ່າ 2.000 ໂຕແລ້ວ.

ສຳນັກຂ່າວຕ່າງປະເທດລາຍງານຈາກ ນະຄອນຊິດນີ ປະເທດອົສຕຣາລີ ເມື່ອວັນ ອັງຄານ ທີ 10 ທັນວາ ຜ່ານມາ ວ່າ  ລັດຖະບານອົສຕຣາລີ ຄາດການວ່າ ເຫດໄຟໄໝ້ປ່າທີ່ກຳລັງລຸກໄໝ້ຢ່າງຮຸນແຮງຢູ່ຂະນະນີ້ ໃນລັດນິວ ເຊົາ ເວລສ໌ ໄດ້ພາກຊີວິດໝີໂຄອາລາ ໄປແລ້ວກວ່າ 2.000 ໂຕ.

ໄຟປ່າຮຸນແຮງຄັ້ງປະຫວັດສາດຂອງປະເທດອົສຕຣາລີ ໃນປີນີ້ ໄດ້ໄໝ້ທຳລາຍເນື້ອທີ່ປ່າແລ້ວ ຫຼາຍກວ່າ 1.920.000 ເຮັກຕ້າ.

ທ່ານມາກ ເກຣແຮມ (Mark Graham) ນັກວິຊາການດ້ານນິເວດວິທະຍາຂອງສະພາອະນຸລັກທຳມະຊາດ (Nature Conservation Council) ກ່າວເຖິງຂໍ້ມູນການກວດກາກ່ຽວກັບການອະນຸລັກໝີໂຄອາລາ ວ່າ ບໍ່ສາມາດລະບຸຈຳນວນທີ່ຊັດເຈນຂອງໝີໂຄອາລາທີ່ຕາຍໄດ້ ເນື່ອງຈາກວ່າ ໄຟປ່າໄດ້ພາກຊີວິດໂຄອາລາ ເປັນພື້ນທີ່ກວ້າງ ແຕ່ຄາດວ່າ ໄຟປ່າໃນຄັ້ງນີ້ ຈະສົ່ງຜົນກະທົບຢ່າງຮ້າຍແຮງ ແລະ ຍາວນານຕໍ່ໂຄອາລາ.

“ໄຟປ່າທີ່ລຸກລາມຢ່າງໄວວາ ດ້ວຍອຸນຫະພູມທີ່ສູງຫຼາຍ ຈຶ່ງມີສັດຈຳນວນຫຼາຍຖືກໄໝ້ຕາຍເທິງຕົ້ນໄມ້ ແຕ່ເນື່ອງຈາກປັດຈຸບັນ ໄໝ້ປ່າຄວບຄຸມເນື້ອທີ່ເປັນບໍລິເວນກວ້າງຫຼາຍ ແລະ ລຸກໄໝ້ຢ່າງຕໍ່ເນື່ອງ ຈຶ່ງບໍ່ມີຄວາມເປັນໄປໄດ້ທີ່ພວກເຮົາຈະຊອກຫາຊາກຂອງໂຄອາລາໄດ້ເລີຍ” ທ່ານເກຣແຮມ ກ່າວ ແລະ ເສີມອີກວ່າ “ພວກເຮົາໄດ້ສູນເສຍບ່ອນຢູ່ອາໄສຂອງໂຄອາລາເປັນພື້ນທີ່ກວ້າງ ແລະ ຄິດວ່າ ຈຳນວນປະຊາກອນຂອງ ໂຄອາລາ ຈະຫຼຸດລົງຢ່າງຕໍ່ເນື່ອງແນ່ນອນ”.

ສື່ອົສຕາລີ (AAP) ລະບຸວ່າ ທ່ານໄດແລັນ ພັກ (Dailan Pugh) ນັກຊ່ຽວຊານດ້ານນິເວດວິທະຍາ ຜູ້ເປັນປະທານສະຫະພັນປ່າໄມ້ ຕາເວັນອອກສຽງເໜືອ (NEFA: North East Forest Alliance) ຄາດວ່າ ໃນປັດຈຸບັນ ໂຄອາລາ ຕາຍແລ້ວ ຫຼາຍກ່ວາ 2.000 ໂຕ ແລະ ບໍລິເວນທີ່ຢູ່ອາໄສ ໃນເຂດແຄມທາງພາກເໜືອຂອງລັດນິວ ເຊົາ ເວລສ໌ ຖືກເຜົາທຳລາຍປະມານ 1 ໃນ 3.

ເມື່ອວັນຈັນ ທີ 9 ທັນວາ ກຸ່ມນັກດັບເພີງໄດ້ວາງແຜນກຽມຮັບມືກັບສະຖານະການໄຟປ່າທີ່ຈະຮ້າຍແຮງອີກຄັ້ງ ເນື່ອງຈາກມີການຄາດການວ່າ ອຸນຫະພູມຈະເພີ່ມຂຶ້ນສູງຕະຫຼອດອາທິດ.

ສະຖິຕິ ເມື່ອບ່າຍວັນຈັນ ຊີ້ໃຫ້ເຫັນວ່າ ໄຟທີ່ກຳລັງໄໝ້ປ່າ ມີທັງໝົດ 86 ຈຸດ ທົ່ວລັດນິວ ເຊົາ ເວລສ໌ ໂດຍມີ 41 ຈຸດ ຍັງບໍ່ສາມາດຄວບຄຸມໄດ້.

ທ່ານ ເຊນ ຟິດຊິມມອນສ໌ (Shane Fitzsimmons) ກຳມາທິການໜ່ວຍງານດັບເພີງໃນພື້ນທີ່ຊົນນະບົດ ກ່າວວ່າ  ເຖິງວ່າ ສະພາບອາກາດໃນວັນອັງຄານຍັງບໍ່ເຖິງຂັ້ນ “ຮ້າຍແຮງ” ທີ່ອາດຈະເຮັດໃຫ້ໄຟລຸກລາມເປັນພື້ນທີ່ກວ້າງຄືກັບເມື່ອເດືອນພະຈິກ ຜ່ານມາ. ແຕ່ສະຖານະການໄຟປ່າໃນປັດຈຸບັນ ຍັງຢູ່ໃນລະດັບທີ່ໜ້າເປັນຫ່ວງຫຼາຍ.

ມີຄວາມເປັນໄປໄດ້ທີ່ຈະເກີດພາຍຸຝົນ ໃນທ້າຍອາທິດ ເຊິ່ງອາດຈະມີຟ້າຜ່າກໍ່ໃຫ້ເກີດໄຟປ່າແຫ່ງໃໝ່ເພີ່ມຂຶ້ນອີກ ໃນພື້ນທີ່ຫ່າງໄກ ທີ່ຢູ່ເໜືອຄວາມຄາດໝາຍ.

“ເຫດການເມື່ອຫຼາຍອາທິດ ຜ່ານມາ ເຮັດໃຫ້ພວກເຮົາສະເທືອນໃຈຫຼາຍ ເນື່ອງຈາກເກີດຟ້າຜ່າແລ້ວກໍ່ໃຫ້ເກີດໄຟປ່າເພີ່ມຂຶ້ນອີກຫຼາຍຈຸດ ທີ່ຢູ່ນອກເໜືອຈຸດທີ່ພວກເຮົາສາມາດຄວບຄຸມໄຟປ່າໄດ້ແລ້ວ” ທ່ານຟິດຊິມມອນສ໌ ກ່າວ.