ມາເລເຊຍ ກວດພົບການຕິດເຊື້ອໂປລິໂອ ຄັ້ງທຳອິດ ໃນຮອບ 27 ປີ

15

ໜ່ວຍງານສາທາລະນະສຸກໃນປະເທດມາເລເຊຍກວດພົບເດັກນ້ອຍຊາຍປ່ວຍເປັນພະຍາດໂປລິໂອ ຖືເປັນຄັ້ງທຳອິດ ນັບຕັ້ງແຕ່ປີ 1992 ທີ່ມີຜູ້ຕິດເຊືອດັ່ງກ່າວ.

ສຳນັກຂ່າວຕ່າງປະເທດລາຍງານຈາກນະຄອນຫຼວງກົວລາລຳເປີ ປະເທດມາເລເຊຍ ເມື່ອວັນຈັນ ທີ 9 ທັນວາ ວ່າ ກະຊວງສາທາລະນະສຸກປະເທດມາເລເຊຍ ໄດ້ອອກຖະແຫຼງການເມື່ອວັນຈັນ ກ່ຽວກັບຜູ້ປ່ວຍຈາກພະຍາດໂປລິໂອ ຢູ່ລັດຊາບາ ເທິງເກາະບໍນຽວ ທາງພາກຕາເວັນອອກໄກຂອງປະເທດ ເປັນແອນ້ອຍເພດຊາຍ ອາຍຸພຽງ 3 ເດືອນ ໄດ້ເຂົ້າຮັບການປິ່ນປົວຢູ່ໂຮງໝໍທ້ອງຖິ່ນແຫ່ງໜຶ່ງ ເຊິ່ງອາການມີໄຂ້ສູງ ແລະ ກ້າມເນື້ອອ່ອນເພຍ ເມື່ອວັນສຸກ ອາທິດຜ່ານມາ ເຖິງປັດຈຸບັນ ອາການຜູ້ປ່ວຍຢູ່ໃນລະດັບຊົງຕົວ ແຕ່ຍັງຕ້ອງຢູ່ພາຍໃຕ້ການດູແລ ແລະ ກັນບໍລິເວນຕາມຂັ້ນຕອນ ເພື່ອປ້ອງກັນການແຜ່ລະບາດຂອງການຕິດເຊື້ອ.

ທັງນີ້ ອົງການອະນາໄມໂລກ (WHO: ‎World Health Organization) ໄດ້ປະກາດໃຫ້ມາເລເຊຍເປັນປະເທດປອດພະຍາດໂປລີໂອ ເມື່ອປີ 2000 ຫຼື 8 ປີກ່ອນໜ້າ ຫຼັງຈາກມີການລາຍງານກວດພົບຜູ້ປ່ວຍຫຼ້າສຸດ ເມື່ອປີ 1992 ແລະ ຫຼັງຈາກນັ້ນ ລັດຖະບານໄດ້ເພີ່ມຄວາມເຄັ່ງຄັດຫຼາຍຂຶ້ນ ໃນການດຳເນີນການປ້ອງກັນພະຍາດດັ່ງກ່າວ. ຂະນະທີ່ຫຼັງການຢືນຢັນການກັບມາກວດພົບຜູ້ຕິດເຊື້ອອີກຄັ້ງ ເຊິ່ງຜົນກວດທາງວິທະຍາສາດຊີ້ໃຫ້ເຫັນວ່າ ເປັນພະຍາດຊະນິດດຽວກັນກັບທີ່ມີການແຜ່ລະບາດໃນປະເທດຟີລິບປິນ ດ້ານໜ່ວຍງານສາທາລະນະສຸກໄດ້ເລິ່ມລົງພື້ນທີ່ແຈກຢາຍຢາຕ້ານເຊື້ອ ໃຫ້ແກ່ປະຊາຊົນເທິງເກາະບໍນຽວ ໂດຍເລິ່ມຕົ້ນຈາກໝູ່ບ້ານຂອງຄອບຄົວຜູ້ປ່ວຍ ເຊິ່ງມີລາຍງານດ້ວຍວ່າ ປະຊາກອນທີ່ເປັນເດັກນ້ອຍ ທັງໝົດ 199 ຄົນ ອາຍຸລະຫວ່າງ 2 ເດືອນ – 15 ປີ ແຕ່ຍັງມີອີກ 23 ຄົນ ທີ່ບໍ່ເຄີຍໄດ້ຮັບການສັກຢາປ້ອງກັນພະຍາດໂປລີໂອມາກ່ອນ.