ສຸດເສົ້າ! ໝໍຕັດສິນໃຈຢຸດຊີວິດ ໝີໂຄອາລາອາການສາຫັດຈາກໄຟໄໝ້ໃຫ້ຫຼັບຢ່າງສະຫງົບແລ້ວ

59

“ເລວິສ” ໝີໂຄອາລາ ຜູ້ໂຊກຮ້າຍໄດ້ຮັບບາດເຈັບສາຫັດຈາກໄຟປ່າທີ່ໃນປະເທດອົສຕຣາລີ ແລະ ໄດ້ຮັບການຊ່ວຍເຫຼືອຈາກປະຊາຊົນລຸຍໄຟເຂົ້າໄປຊ່ວຍນຳສົ່ງໂຮງໝໍ ແລະ ສຸດເສົ້າ ເມື່ອທີມແພດຈຳເປັນຕ້ອງຕັດສິນໃຈຢຸດຊິວິດເພື່ອໃຫ້ ເລວິສ ໄດ້ຫຼຸດພົ້ນຈາກຄວາມທໍລະມານຈາກໂລກຢ່າງສະຫງົບ.

ເມື່ອວັນອັງຄານ ທີ 26 ພະຈິກ ສຳນັກຂ່າວບີບີຊີ ແລະ ເວັບໄຊທ໌ 9 News ໄດ້ລາຍງານຂ່າວທີ່ໜ້າເສົ້າ ເຖິງຄວາມຄືບໜ້າຂອງການບາດເຈັບ ໝີໂຄອາລາ “ເລວິສ (Lewis)” ທີ່ພະຍາຍາມແລ່ນໜີອອກຈາກກອງໄຟ ທີ່ໄໝ້ປ່າໃນລັດນິວເຊົາທ໌ ເວລສ໌ ປະເທດອົສຕຣາລີ ຈົນບາດເຈັບສາຫັດ ໂດຍເລວິສ ໄດ້ຮັບການຊ່ວຍເຫຼືອຈາກທ່ານນາງໂທນີ ໂດເຮີຕີ ຜູ້ມີຈິດໃຈເມດຕາ ທີ່ຂັບລົດຜ່ານມາເຫັນ ແລະ ບໍ່ລັງເລໃຈແລ່ນຝ່າໄຟເຂົ້າໄປຊ່ວຍອຸ້ມອອກຈາກຕົ້ນໄມ້ທີ່ອ້ອມຮອບໄປດ້ວຍໄຟປ່າ ເມື່ອອາທິດກ່ອນ ແລະ ນຳສົ່ງໂຮງໝໍສັດ Port Macquarie Koala ໃນລັດນິວເຊົາ ເວລສ໌ ທີ່ໃຫ້ການປິ່ນປົວໝີໂຄອາລາ ໂດຍເຫດການນີ້ ມີການເຜີຍແຜ່ຄລິບນາທີສະເທືອນໃຈ ຈົນເຮັດໃຫ້ຊາວໂລກຮູ້ສຶກສົງສານ ແລະ ຕິດຕາມອາການຂອງ ເລວິສ ດ້ວຍຄວາມເປັນຫ່ວງ.

ໃນທີ່ສຸດ, ເລວິສ ໄດ້ເສຍຊີວິດລົງຢ່າງສະຫງົບ ໂດຍທີມງານສັດຕະວະແພດໄດ້ຕັດສິນໃຈຄັ້ງທີ່ຍາກລຳບາກທີ່ສຸດໃນຊີວິດ ໂດຍການຢຸດຊີວິດ ເລວິສ ດ້ວຍຢາສະຫຼົບເພື່ອໃຫ້ຫຼຸດພົ້ນຈາກຄວາມທໍລະມານ ແລະ ຈາກໄປຢ່າງສະຫງົບແລ້ວ  ເມື່ອເຊົ້າ ວັນອັງຄານ ທີ 26 ພະຈິກ ຕາມເວລາທ້ອງຖິ່ນ ເນື່ອງຈາກວ່າ ບາດແຜທີ່ຖືກໄຟໄໝ້ນັ້ນ ຮ້າຍແຮງກວ່າທີ່ຈະເຮັດໃຫ້ ເລວິສ ມີຊີວິດຢູ່ລອດຕໍ່ໄປໄດ້.

 “ມື້ນີ້, ພວກເຮົາໄດ້ຕັດສິນໃຈ ເພື່ອເຮັດໃຫ້ ເລວິສ ໄດ້ນອນຫຼັບ ພວກເຮົາໄດ້ໃຫ້ຢາສະລົບ ເມື່ອເຊົ້າມື້ນີ້ ຫຼັງຈາກໄດ້ປະເມີນອາການຈາກບາດແຜທີ່ຖືກໄຟໄໝ້ ແລະ ໄດ້ປ່ຽນຜ້າພັນບາດໃຫ້” ທາງໂຮງໝໍໄດ້ລາຍງານຂ່າວເສົ້າຄັ້ງນີ້ ຜ່ານທາງເຟສບຸກ.