ບໍລິສັດໃຫຍ່ ເຢຍລະມັນ – ອັງກິດ ຈະຫຼຸດພະນັກງານ 13.500 ຄົນ

86

ບໍລິສັດອໍດີ ຜູ້ຜະລິດລົດລາຍໃຫຍ່ໃນປະເທດເຢຍລະມັນ ປະກາດແຜນປົດພະນັກງານ 9.500 ຄົນ ເຊິ່ງເປັນສ່ວນໜຶ່ງຂອງແຜນການປັບປຸງໂຄງສ້າງສຳຄັນຄັ້ງໃຫຍ່ ເພື່ອປະຢັດລາຍຈ່າຍ ສ່ວນກຸ່ມບໍລິສັດຄອມພາສ ຜູ້ບໍລິການດ້ານອາຫານທີ່ມີຊື່ສຽງຂອງປະເທດອັງກິດ ປະກາດຈະປົດພະນັກງານ 4.000 ຄົນ ເນື່ອງຈາກແນວໂນ້ມເສດຖະກິດໃນເອີຣົບຕົກຕໍ່າ.

ສຳນັກຂ່າວເອເອັຟພີ ລາຍງານຈາກເມືອງແຟຣັງເຟີດ ປະເທດເຢຍລະມັນ ເມື່ອວັນອັງຄານ ທີ 26 ພະຈິກ ວ່າ ຖະແຫຼງການຂອງບໍລິສັດອໍດີ (Audi) ເມື່ອວັນອັງຄານ ວ່າ ບໍລິສັດວາງແຜນທີ່ຈະປົດພະນັກງານ 9.500 ຄົນ ພາຍໃນປີ 2025 ເຊິ່ງເປັນສ່ວນໜຶ່ງຂອງແຜນການປັບປຸງໂຄງສ້າງສຳຄັນຂອງບໍລິສັດຄັ້ງໃຫຍ່ ເພືອປະຢັດລາຍຈ່າຍຄ່າ ປະມານ 6.000 ລ້ານເອີໂຣ (ກວ່າ 58.590 ຕື້ກີບ) ພາຍໃນປີ 2029 ທີ່ຈະຊ່ວຍໃຫ້ບໍລິສັດສາມາດເຮັດເປົ້າໝາຍຜົນກຳໄລ ປະມານ 9 – 11%.

ບໍລິສັດອໍດີ ທຸລະກິດໃນເຄືອຂອງກຸ່ມບໍລິສັດ ໂຝກສ໌ວາເກັນ (Volkswagen) ກຳລັງປະສົບກັບບັນຫາຍອດຂາຍ, ລາຍໄດ້ ແລະ ຜົນກຳໄລ ຜົນປະກອບການຫຼຸດລົງ ໃນໄລຍະ 9 ເດືອນທຳອິດຂອງປີ 2019 ການປັບໂຄງສ້າງຄັ້ງໃຫຍ່ເກີດຂຶ້ນ ຂະນະທີ່ບໍລິສັດຕ້ອງເສຍຄ່າໃຊ້ຈ່າຍມະຫາສານ ໃນການປັບປ່ຽນຮູບແບບການຜະລິດລົດ ຈາກເຄື່ອງຈັກເຜົາໄໝ້ພາຍໃນ ມາເປັນລົດໃຊ້ໄຟຟ້າ.

ຂະນະທີ່ ໃນລອນດອນ ໂຄສົກຂອງກຸ່ມບໍລິສັດຄອມພາສ (compass group) ເປີດເຜີຍ ເມື່ອວັນອັງຄານ ວ່າ ບໍລິສັດມີແຜນທີ່ຈະປົດພະນັກງານເຖິງ 4.000 ຄົນ ໃນໄລຍະ 2 ປີ ຕໍ່ໜ້າ ເພື່ອກຽມຄວາມພ້ອມຮັບມືກັບເສດຖະກິດຂອງເອີຣົບທີ່ຕົກຕໍ້າລົງ ລວມເຖິງຜົນກະທົບຈາກເບຣັກຊິດ ຫຼື ການຖອນຕົວຂອງອັງກິດອອກຈາກການເປັນສະມາຊິກ ສະຫະພາບເອີຣົບ ຈຳນວນພະນັກງານທີ່ຈະຖືກປົດອອກຈາກວຽກ ຄິດເປັນອັດຕາບໍ່ຮອດ 1% ຂອງພະນັກງານ ບໍລິສັດຄອມພາສທີ່ມີຢູ່ທົ່ວໂລກ.

ໂຄສົກຂອງບໍລິສັດຄອມພາສ ກ່າວອີກວ່າ ຜົນປະກອບການຂອງບໍລິສັດຕົກຕໍ່າລົງໃນບາງປະເທດທີ່ເປັນຕະຫຼາດສຳຄັນໃນເອີຣົບເຊັ່ນ: ເຢຍລະມັນ, ຝຣັ່ງ ແລະ ອັງກິດ. ຜົນກຳໄລສຸດທິຂອງກຸ່ມບໍລິສັດຄອມພາສ ໃນໄລຍະ 12 ເດືອນຈົນຮອດໝົດເດືອນກັນຍາ ຫຼຸດລົງເກືອບ 2% ທຽບເທົ່າ 1.110 ລ້ານເອີໂຣ (ກວ່າ 10.740 ຕື້ກີບ) ທີ່ຫຼຸດລົງຈາກ 1.113 ລ້ານເອີໂຣ ໃນ 12 ເດືອນ ກ່ອນໜ້າ.

ດ້ານທ່ານໂດມິນິກ ເບຼກມໍ ປະທານຄະນະເຈົ້າໜ້າທີ່ຝ່າຍບໍລິຫານ ຫຼື CEO ຂອງກຸ່ມບໍລິສັດຄອມພາສ ກ່າວວ່າ ເຖິງວ່າລາຍໄດ້ທັງໝົດຂອງບໍລິສັດ ຈະເພີ່ມຂຶ້ນຫຼາຍກ່ວາ 6% ທຽບເທົ່າ 24.900 ລ້ານເອີໂຣ (ກວ່າ 243.150 ຕື້ກີບ) ແຕ່ບໍລິສັດກໍ່ບໍ່ມີພູມຕ້ານທານຈາກສະພາບແວດລ້ອມມະຫາພາກ, ທຸລະກິດ ແລະ ຄວາມເຊື່ອໝັ້ນຂອງຜູ້ບໍລິໂພກ ທີ່ຕົກຕໍ່າລົງ ໃນ ເອີຣົບ ສົ່ງຜົນກະທົບຕໍ່ບໍລິສັດ.