ນັກທ່ອງທ່ຽວ ຫຼັ່ງໄຫຼກັນໄປປີນພູ “ຫີນອູລູຣູ” ກ່ອນທີ່ຈະປິດຖາວອນ

100

ປະຊາຊົນຈາກທົ່ວທຸກມູມໂລກຕ່າງກໍ່ພາກັນຫຼັ່ງໄຫຼໄປທ່ຽວຊົມ ແລະ ປີນພູຫີນອູລູຣູ ຢູ່ທາງພາກເໜືອຂອງປະເທດອົສຕຣາລີ ເຊິ່ງໄດ້ເປີດໃຫ້ເຂົ້າທ່ຽວຊົມເປັນມື້ສຸດທ້າຍ ເມື່ອວັນສຸກ ທີ 25 ຕຸລາ ກ່ອນທີ່ຈະປິດໃຫ້ບໍລິການແບບຖາວອນ ຕາມຄວາມຮຽກຮ້ອງຕ້ອງການຂອງຄົນພື້ນເມືອງ.

ສຳນັກຂ່າວຕ່າງປະເທດລາຍງານຈາກເມືອງຢູລາຣາ ປະເທດອົສຕຣາລີ ເມື່ອວັນສຸກ ທີ 25 ຕຸລາ ວ່າ ນັກທ່ອງທ່ຽວຈາກທົ່ວທຸກມູມໂລກທັງພາຍໃນ ແລະ ຕ່າງປະເທດ ຫຼັ່ງໄຫຼເດີນທາງມາທ່ຽວຊົມພູຫີນອູລູຣູ ເຊິ່ງຕັ້ງຢູ່ໃນເຂດທະເລຊາຍຂອງເມືອງອະລິຊ ສະປຣິງສ໌ ໃນລັດນັອດເທິນເທຣິທໍຣີ ທາງພາກເໜືອຂອງປະເທດ ເມື່ອວັນສຸກ ໂດຍການເປີດໃຫ້ບໍລິການເປັນມື້ສຸດທ້າຍທີ່ທາງລັດຖະບານອົສຕຣາລີ ອະນຸຍາດໃຫ້ທ່ຽວຊົມ ແລະ ປີນຂຶ້ນໄປຊົມທິວທັດເທິງພູຫີນແຫ່ງນີ້ໄດ້ຢ່າງອິດສະຫຼະ ກ່ອນທີ່ຈະປິດໃຫ້ບໍລິການແບບຖາວອນ ຕັ້ງແຕ່ວັນເສົາ ທີ 26 ຕຸລາ 2019 ເປັນຕົ້ນໄປ.

ຄວາມເຄື່ອນໄຫວການພິຈາລະນາດັ່ງກ່າວ ຖືເປັນ “ໄຊຊະນະທີ່ສວຍງາມ” ຂອງຊາວພື້ນເມືອງອານັງກູ ເຊິ່ງຖືວ່າເປັນ  “ເຈົ້າຂອງພື້ນທີ່ຕາມທຳນຽມ” ທີ່ໄດ້ຕໍ່ສູ້ດ້ວຍຄວາມມຸ່ງໝັ້ນ ຮຽກຮ້ອງໃຫ້ລັດຖະບານກາງ ໃນນະຄອນຫຼວງແຄນເບີຣາປິດເສັ້ນທາງການທ່ອງທ່ຽວສູ່ພຸຫີນແຫ່ງນີ້ ຕັ້ງແຕ່ປີ 1985 ເນື່ອງຈາກພວກເຂົາເຈົ້າມີຄວາມເຊື່ອເປັນ “ສະຖານທີ່ສັກສິດ” ຕາມຄວາມເຊື່ອຂອງຊາວພື້ນເມືອງ.

ທັງນີ້ ໜ່ວຍງານອຸທິຍານແຫ່ງຊາດອົສຕຣາລີ ໄດ້ປະກາດກຽມປິດພູຫີນອູລູຣູ ແຫ່ງນີ້ ແບບຖາວອນ ຕັ້ງແຕ່ 2 ປີກ່ອນ ສົ່ງຜົນໃຫ້ຈຳນວນນັກທ່ອງທ່ຽວເພີ່ມຂື້ນຢ່າງຕໍ່ເນື່ອງ ແລະ ເພີ່ມຂື້ນຫຼາຍເກືອບ 4 ແສນຄົນ ພາຍໃນໄລຍະ 12 ເດືອນ ເຖິງທ້າຍເດືອນມິຖຸນາ ຜ່ານມາ.

ອີກປະການໜຶ່ງ ພູຫີນອູລູຣູ ມີອີກຊື່ ວ່າ “ຫີນເອເຢີ (Uluru Rock or Ayers Rock)” ເປັນຊື່ທີ່ຮ້ອງຕາມເຊີເຮັນຣີ ເອເຢີ ນາຍົກລັດຖະມົນຕີ ຄົນທີ 8 ຂອງປະເທດອົສຕາລີ, ມີຄວາມສູງ 863 ແມັດແລະ ໄດ້ຂຶ້ນທະບຽນ ໂດຍອົງການການສຶກສາ ວິທະຍາສາດ ແລະ ວັດທະນະທຳແຫ່ງສະຫະປະຊາຊາດ (UNESCO) ໃຫ້ເປັນມໍລະດົກໂລກທາງທຳມະຊາດ ໃນກອງປະຊຸມສະໄໝສາມັນ ຄັ້ງທີ 11 ເມື່ອປີ 1987.