ຍີ່ປຸ່ນ ກຽມຮັບມືພາຍຸ ອີກ 2 ຫົວ ກຳລັງເຄື່ອນທີ່ຂຶ້ນຝັ່ງ

91

ຍີ່ປຸ່ນກຽມຮັບມືພາຍຸ “ໂນກູຣິ” ແລະ “ບົວລອຍ”  ທີ່ກຳລັງເຄື່ອນທີ່ພັດຜ່ານເຂົ້າສູ່ແຄມຝັ່ງເກາະທາງພາກໃຕ້ ຫຼັງຫາກໍ່ຜ່ານພົນການຮັບມືກັບພາຍຸໄຕ້ຝຸ່ນຮາກິບິສ ເມື່ອອາທິດຜ່ານມາ ສ້າງຄວາມເສຍຫາຍຢ່າງໜັກ ໃນເຂດພາກກາງ ແລະ ພາກເໜືອ ຂອງປະເທດ.

ສຳນັກຂ່າວເອພີ ລາຍງານຈາກນະຄອນຫຼວງໂຕກຽວ ປະເທດຍີ່ປຸ່ນ ເມື່ອວັນຈັນ ທີ 21 ຕຸລາ ວ່າ ແຈ້ງການຂອງສຳນັກງານອຸຕຸນິຍົມຍີ່ປຸ່ນ (JMA: Japan Meteorological Agency) ເມື່ອວັນຈັນ ກ່າວວ່າ ພາຍຸເຂດຮ້ອນ ໂນກູຣິ (Noguri) ກຳລັງເຄື່ອນທີ່ຢູ່ໃນທະເລ ນອກຝັ່ງເກາະຊະໂກກຸ ທາງພາກໃຕ້ສຸດ ຝັ່ງຕາເວັນອອກຂອງປະເທດຍີ່ປຸ່ນ ແລະ ກຳລັງເຄື່ອນທີ່ໄປທາງທິດຕາເວັນອອກສຽງເໜືອ ດ້ວຍກຳລັງລົມ 108 ກິໂລແມັດຕໍ່ຊົ່ວໂມງ ໂດຍພາຍຸຫົວນີ້ ອາດຈະເຮັດໃຫ້ມີຝົນຕົກໜັກ, ມີປະລິມານນໍ້າຝົນວັດແທກໄດ້ເຖິງ 300 ມິນລີແມັດ ຢູ່ໃນພາກພື້ນຂອງພາກກາງປະເທດຍີ່ປຸ່ນ ໃນໄລຍະຕອນແລງຂອງວັນອັງຄານ ທີ 22 ຕຸລາ.

A woman looks at homes devastated by Typhoon Hagibis Tuesday, Oct. 15, 2019, in Nagano, Japan. More victims and more damage have been found in typhoon-hit areas of central and northern Japan, where rescue crews are searching for people still missing. (AP Photo/Jae C. Hong)

ເຈົ້າໜ້າທີ່ສຳນັກງານອຸຕຸນິຍົມຍີ່ປຸ່ນ ກ່າວວ່າ ມີຄວາມສ່ຽງສູງທີ່ຈະເກີດໄພນໍ້າຖ້ວມ ໃນຫຼາຍພື້ນທີ່ ທີ່ເຄີຍໄດ້ຮັບຜົນກະທົບຈາກພາຍຸໃຕ້ຝຸ່ນຮາກິບິວ ເຊິ່ງເຄື່ອນທີ່ພັດຜ່ານເກາະຍີ່ປຸ່ນ ລະຫວ່າງ ວັນທີ 12-13 ຕຸລາ ເຮັດໃຫ້ມີຜູ້ເສຍຊີວິດຢ່າງໜ້ອຍ 70 ຄົນ ແລະ ສູນຫາຍ 12 ຄົນ ແຕ່ສຳນັກຂ່າວກຽວໂຕ ລາຍງານວ່າ  ຈຳນວນຜູ້ເສຍຊີວິດມີ 81 ຄົນ ໂດຍເືອງນາກາໂນະ ທາງພາກກາງ ລວມທັງເມືອງຟຸກຸຊິມະ ແລະ ເມືອງມິຢາງິ ທາງພາກຕາເວັນອອກສຽງເໜືອ ໄດ້ຮັບຄວາມເສຍຫາຍຫຼາຍທີ່ສຸດ.