ຈີນພັດທະນາລະບົບປ້ອງກັນໃຫ້ເດັກເສບຂ່າວແບບມີຂອບເຂດ ຄວບຄຸມແພລັດຟອມໃຫຍ່ໆສຳເລັດ

113

ຈີນພັດທະນາລະບົບປ້ອງກັນ ຫຼື ໂໝດ ສຳລັບເດັກນ້ອຍ ແລະ ເຍົາວະຊົນ ໃນການນນຳໃຊ້ອີນເຕີເນັດ ຄວບຄຸມ ກວ່າ 50 ແພລັດຟອມ ໃນການເຂົ້າເຖິງ.

ສຳນັກຂ່າວຊິນຫົວຂອງຈີນລາຍງານຈາກນະຄອນຫຼວງປັກກິ່ງ ເມື່ອວັນອັງຄານ ທີ 15 ຕຸລາ ວ່າ ໜ່ວຍງານຄວບຄຸມດູແລດ້ານໄຊເບີ ສະເປຊ ຂອງຈີນ (CAC: Cyberspace Administration of China) ເປີດເຜີຍວ່າ ມາຮອດປັດຈຸບັນ ຈີນມີແພລັດຟອມອິນເຕີເນັດທີ່ມີການຕິດຕັ້ງລະບົບ ຫຼື ຮູບແບບ ຫຼື ໂໝດ (Mode) ການນຳໃຊ້ ສຳລັບເດັກນ້ອຍ ແລະ ເຍົາວະຊົນ ເພື່ອປ້ອງກັນຜູ້ເຂົ້າໃຊ້ທີ່ເປັນເດັກ ເສບຕິດການນຳໃຊ້ອິນເຕີເນັດ ຄວບຄຸມເຖິງ 53 ແພລັດຟອມແລ້ວ.

ຖະແຫຼງການຈາກໜ່ວຍງານຄວບຄຸມດູແລດ້ານໄຊເບີ ສະເປຊ ຂອງຈີນ ເມື່ອວັນຈັນ ທີ 14 ຕຸລາ ຜ່ານມາ ລະບຸວ່າ ຈຳນວນຂອງແພລັດຟອມດັ່ງກ່າວສະແດງໃຫ້ເຫັນວ່າ ຈີນສາມາດຂະຫຍາຍກົນໄກການປ້ອງກັນການໃຊ້ອິນເຕີເນັດທີ່ເປັນເອກະພາບນີ້ ເພື່ອຄວາມຄຸມແພລັດຟອມການຖ່າຍທອດສົດ ແລະ ວິດິໂອຫຼັກໆຂອງຈີນໄດ້ຢ່າງທົ່ວເຖິງ.

ຖະແຫຼງການລະບຸອີກວ່າ ໃນການພັດທະນາຫຼ້າສຸດນີ້ ມີແພລັດຟອມວິດີໂອ ອອນໄລນ໌ 9 ແພລັດຟອມ ເຊິ່ງລວມເຖິງແພລັດຟອມຂອງເວັບໄຊໂຊຫູ (Souhu) ແລະ ໄປຕູ໋ (Baidu) ພ້ອມທັງການບໍລິການຖ່າຍທອດສົດ 24 ແຫ່ງ ທີ່ລວມເຖິງ 6.cn ແລະ huajiao.com ກໍ່ໄດ້ເພີ່ມຮູບແບບທີ່ເປັນມິດກັບເຍົາວະຊົນແລ້ວ.

ເມື່ອມີການເປີດໃຊ້ຮູບແບບ ຫຼື ໂໝດດັ່ງກ່າວ ຜູ້ໃຊ້ຈະບໍ່ສາມາດໃຊ້ວຽກ ຄຳສັ່ງບາງອັນ ໃນແພລັດຟອມນັ້ນໄດ້  ແລະ ຈະມີການສະແດງເນື້ອໃນແນະນຳທີ່ເໝາະສົມ ສຳລັບເຍົາວະຊົນເທົ່ານັ້ນ.

ໜ່ວຍງານໄຊເບີ ສະເປຊ ໄດ້ເນັ້ນໜັກວ່າ ການດຳເນີນມາດຕະການປ້ອງກັນ ແລະ ການແຊກແຊງ ເພື່ອຕ້ານການເສບ ຕິດອິນເຕີເນັດ ໃນກຸ່ມເດັກນ້ອຍ ແລະ ເຍົາວະຊົນ ຖືວ່າເປັນຄວາມຮັບຜິດຊອບຮ່ວມກັນຂອງທັງເຄືອຂ່າຍສັງຄົມທັງໝົດ ພ້ອມທັງຮຽກຮ້ອງໃຫ້ບັນດາບໍລິສັດໃຫ້ບໍລິການອິນເຕີເນັດ, ໂຮງຮຽນ ແລະ ຜູ້ປົກຄອງ ດຳເນີນການຕາມຄວາມຮັບຜິດຊອບຂອງຕົນໃຫ້ເຕັມທີ່ ເພື່ອໃຫ້ເດັກນ້ອຍ ແລະ ເຍົາວະຊົນ ໄດ້ເຕີບໃຫຍ່ຢ່າງມີປະສິດທີ່ພາບ ແລະ ເຂັ້ມແຂງ.