ຍີ່ປຸ່ນ ກຽມໃຊ້ງົບ ກວ່າ 40 ພັນຕື້ກີບ ຟື້ນຟູປະເທດ ຈາກຜົນກະທົບຂອງພາຍຸຮາກິບິສ

110

ລັດຖະບານຍີ່ປຸ່ນໄດ້ສຳຮອງງົບປະມານໄວ້ຢ່າງໜ້ອຍ 40.000 ຕື້ກີບ ເພື່ອໃຫ້ການຊ່ວຍເຫຼືອທຸກໆດ້ານໃຫ້ແກ່ “ທຸກພື້ນທີ່ ແລະ ປະຊາຊົນທຸກຄົນ” ທີ່ໄດ້ຮັບຄວາມເດືອດຮ້ອນຈາກອິດທິພົນຂອງພາຍຸໄຕ້ຝຸ່ນ “ຮາກິບິສ” ສົ່ງຜົນໃຫ້ມີຜູ້ເສຍຊີວິດເກືອບ 70 ຄົນ.

ສຳນັກຂ່າວຕ່າງປະເທດລາຍງານຈາກນະຄອນຫຼວງໂຕກຽວ ປະເທດຍີ່ປຸ່ນ ເມື່ອວັນອັງຄານ ທີ 15 ຕຸລາ ວ່າ ນາຍົກລັດຖະມົນຕີຊິນໂຊະ ອາເບະ ຖະແຫຼງເມື່ອວັນອັງຄານ ທີ 15 ຕຸລາ ວ່າ ອິດທິພົນຂອງພາຍຸໄຕ້ຝຸ່ນຮາກິບິສ ບໍ່ພຽງແຕ່ເຮັດໃຫ້ເກີດຄວາມເສຍຫາຍພື້ນທີ່ຂອງປະເທດເທົ່ານັ້ນ ແຕ່ສົ່ງຜົນກະທົບຕໍ່ເສດຖະກິດຂອງຍີ່ປຸ່ນໃນໄລຍະຍາວເຊັ່ນກັນ ຜູ້ນຳຍີ່ປຸ່ນກ່າວວ່າ ຜົນການປະເມີນຄວາມເສຍຫາຍໃນເບື້ອງຕົ້ນສະແດງໃຫ້ເຫັນວ່າ ບາງພື້ນທີ່ບາງແຫ່ງ ໂດຍສະເພາະເກາະຮົນຊູ “ທີ່ຄາດຈະບໍ່ໄດ້ຮັບຜົນກະທົບຮຸນແຮງ” ຈາກພາຍຸຫົວນີ້ ແຕ່ປະສົບຄວາມເສຍຫາຍຢ່າງໜັກ. ເຖິງຢ່າງໃດກໍ່ຕາມ, ກະຊວງການເງິນໄດ້ສຳຮອງງົບປະມານໄວ້ແລ້ວຢ່າງໜ້ອຍ 500.000 ລ້ານເຢນ (ປະມານ 40.800 ຕື້ກີບ) ເພື່ອໃຫ້ການຊ່ວຍເຫຼືອໃນທຸກດ້ານໃຫ້ແກ່ “ທຸກໆພື້ນທີ່ ແລະ ປະຊາຊົນທຸກຄົນ” ແລະ ລັດຖະບານກາງພ້ອມຈັດສັນເງິນຈຳນວນດັ່ງກ່າວໄດ້ທັນທີ.

ທັງນີ້, ລາຍງານຂອງທຳນຽບລັດຖະບານຍີ່ປຸ່ນລະບຸວ່າ ພາຍຸໄຕ້ຝຸ່ນຮາກິບິສ ສ້າງຄວາມເສຍຫາຍ 36 ແຂວງ ຈາກ 47 ແຂວງທົ່ວປະເທດ ລະດັບນໍ້າໃນແມ່ນ້ຳຢ່າງໜ້ອຍ 176 ສາຍ ຍັງມີຄວາມສ່ຽງທີ່ຈະຍຶ່ງລົ້ນແຄມຝັ່ງ, ບ້ານເຮືອນຢ່າງໜ້ອຍ 34.000 ຄົວເຮືອນ ບໍ່ມີໄຟຟ້າໃຊ້ ແລະ ປະມານ 133.000 ຄົວເຮືອນ ບໍ່ມີນໍ້າປະປາໃຊ້. ຂະນະທີ່ ໜ່ວຍກູ້ໄພຫຼາຍກວ່າ 110.000 ຄົນ ລວມທັງຕຳຫຼວດ ແລະ ກອງກຳລັງປ້ອງກັນຕົນເອງ (SDF: Self-Defense Forces ) ໄດ້ກະຈາຍກຳລັງໃຫ້ຄວາມຊ່ວຍເຫຼືອຜູ້ປະສົບໄພ ເຊິ່ງລວມເຖິງການອົບພະຍົບປະຊາຊົນອອກຈາກບ້ານເຮືອນໄປສູນພັກເຊົາຊົ່ວຄາວທີ່ທາງການກຽມໄວ້ໃຫ້ “ການຊ່ວຍເຫຼືອປະຊາຊົນທີ່ເດືອດຮ້ອນທຸກຄົນ” ຫຼັງຈາກມີລາຍງານວ່າ ຊາຍໄຮ້ບ້ານ 2 ຄົນ ບໍ່ໄດ້ຮັບອະນຸຍາດໃຫ້ເຂົ້າໄປອາໄສຢູ່ສູນພັກເຊົາຊົ່ວຄາວແຫ່ງໜຶ່ງ.

ດ້ານຈຳນວນຜູ້ເສຍຊີວິດຈາກພາຍຸໄຕ້ຝຸ່ນຮຸນແຮງຄັ້ງນີ້ ຢ່າງໜ້ອຍ 66 ຄົນ ແລະ ບາດເຈັບຫຼາຍກວ່າ 200 ຄົນ ແຕ່ມີແນວໂນ້ມວ່າ ຄວາມສູນເສຍຈະເພີ່ມຂື້ນຕື່ມ ເນື່ອງຈາກຍັງມີຜູ້ສູນຫາຍ “ອີກຫຼາຍສິບຄົນ”.