ອິດທິພົນຂອງພາຍຸໄຕ້ຝຸ່ນ “ຮາກິບິສ” ເລີ່ມສົ່ງຜົນກະທົບຕໍ່ປະເທດຍີ່ປຸ່ນແລ້ວ

125

ເຖິງວ່າສ່ວນຕາຂອງລົມພາຍຸ ບໍ່ໄດ້ເຄື່ອນທີ່ຂຶ້ນຝັ່ງປະເທດຍີ່ປຸ່ນ ແຕ່ອິດທິພົນຂອງພາຍຸໄຕ້ຝຸ່ນ “ຮາກິບິສ” ໄດ້ແຜ່ຂະຫຍາຍປົກຄຸມພາກກາງຂອງປະເທດ ເຊິ່ງເປັນເສັ້ນທາງທີ່ພາຍຸຈະເຄື່ອນທີ່ພັດຜ່ານ ໂດຍສົ່ງຜົນໃຫ້ເກີດຝົນຕົກແຮງ ແລະ ມີລົມພັດແຮງ ສ່ວນດ້ານການບໍລິການຂົນສົ່ງສາທາລະນະໂຈະໃຫ້ບໍລິການທັງໝົດ.

ສຳນັກຂ່າວຕ່າງປະເທດລາຍງານຈາກນະຄອນຫຼວງໂຕກຽວ ປະເທດຍີ່ປຸ່ນ ເມື່ອວັນເສົາ ທີ 12 ຕຸລາ ວ່າ ອົງການອຸຕຸນິຍົມວິທະຍາແຫ່ງຊາດຍີ່ປຸ່ນ (JMA: Japan Meteorological Agency) ລາຍງານວ່າ ພາຍຸໄຕ້ຝຸ່ນຮາກິບິສ ເຊິ່ງເປັນພາສາຕາກາລັອກ ທີ່ມີຄວາມໝາຍວ່າ “ຄວາມໄວ” ໄດ້ສົ່ງຜົນກະທົບໃຫ້ພື້ນທີ່ສ່ວນໃຫຍ່ຂອງເກາະຮົນຊູແລ້ວ ໂດຍມີທິດທາງເຄື່ອນທີ່ໂດຍກົງໄປນະຄອນຫຼວງໂຕກຽວ ເຊິ່ງຕັ້ງຢູ່ແຄມຝັ່ງທະເລທາງຕອນກາງຂອງເກາະຍີ່ປຸ່ນ ສົ່ງຜົນໃຫ້ເກີດພາຍຸຝົນຟ້າຄະນອງ ແລະ ລົມແຮງໂດຍທົ່ວໄປ ແລະ ຄື້ນທະເລພັດຂຶ້ນຝັ່ງສູງຫຼາຍແມັດ ພ້ອມທັງເກີດນໍ້າຖ້ວມກະທັນຫັນ ແລະ ໄຟຟ້າດັບໃນຫຼາຍພື້ນທີ່.

ທັງນີ້ JMA ຄາດການປະລິມານນໍ້າໃນສະສົມ ສະເພາະໃນນະຄອນຫຼວງໂຕກຽວ ແລະ ບໍລິເວນໃກ້ຄຽງ ໃນຮອບ 24 ຊົ່ວໂມງ ໄປຈົນເຖິງໄລຍະຕອນສວຍຂອງວັນອາທິດ ທີ 13 ຕຸລາ ບໍ່ຕໍ່າກວ່າ 50 ເຊັນຕີແມັດ ແລະ ມີແນວໂນ້ມເພີ່ມ ຂື້ນຫຼາຍກວ່ານັ້ນໃນພາກພື້ນໂທໄກ ທີ່ມີເມືອງສຳຄັນຄືເມືອງນາໂກຢະ ຂະນະທີ່ JMA ຄາດການວ່າ ຕາພາຍຸຈະເຄື່ອນທີ່ຂຶ້ນຝັ່ງບໍລິເວນຕອນກາງ ຫຼື ພາກຕາເວັນອອກຂອງປະເທດໃນໄລຍະຕອນແລງຂອງວັນເສົາ ຕາມເວລາທ້ອງຖິ່ນ ດ້ວຍຄວາມໄວລົມສູງສຸດໃກ້ຈຸດສູນກາງ 216 ກິໂລແມັດຕໍ່ຊົ່ວໂມງ ທຽບເທົ່າກັບເຮີຣິເຄນ ລະດັບ 4 ຕາມມາດຕາວັດແທກຊິຟເຟີ – ຊິມສັນ (Saffir-Simpson Hurricane).

ພ້ອມດຽວກັນນີ້ ບໍລິສັດໂຕໂຢຕ້າ ແລະ ຮອນດາ ປະກາດໂຈະສາຍການຜະລິດລົດ ໃນເຂດທີ່ມີຄວາມສ່ຽງເຊິ່ງເປັນທາງຜ່ານຂອງພາຍຸແລ້ວ ດ້ານປະຊາຊົນໄດ້ພາກັນກັກຕຸນສິນຄ້າອຸປະໂພກບໍລິໂພກທີ່ຈຳເປັນທັງໝົດ ທັງໃນຮ້ານຄ້າ ແລະ ທ້ອງຕະຫຼາດທຸກແຫ່ງ, ດ້ານສາຍການບິນເຈແປນ ແອຣ໌ໄລນ໌ ໄດ້ຍົກເລີກຖ້ຽວບິນພາຍໃນປະເທດຫຼາຍກວ່າ 1.600 ຖ້ຽວ ແລະ ຖ້ຽວບິນລະຫວ່າງປະເທດຢ່າງໜ້ອຍ 2560 ຖ້ຽວ ສ່ວນບໍລິການລົດໄຟຄວາມໄວສູງຊິນຄັນເຊັນໂຈະການໃຫ້ບໍລິການທຸກເສັ້ນທາງ ແລະ ສວນສະນຸກໂຕກຽວ ດິສນີແລນ ລວມທັງສວນທະເລດິສນີ ປະກາດປິດໃຫ້ບໍລິການ ໃນວັນເສົາ.

ອີກປະການໜຶ່ງ ການເຄື່ອນໄຫວຂອງທຸກຝ່າຍເກີດຂື້ນລະຫວ່າງຄວາມວິຕົກກັງວົນຢ່າງໜັກທີ່ທາງ JMA ໄດ້ຄາດການດ້ວຍ ວ່າ ພາຍຸໄຕ້ຝຸ່ນຮາກິບິສ ອາດຈະເປັນພາຍຸທີ່ມີຄວາມໄວລົມ “ທີ່ມີຄວາມຮຸນແຮງຫຼາຍ” ທີ່ເຄື່ອນທີ່ພັດຜ່ານພາກພື້ນຮົນຊູຂອງຍີ່ປຸ່ນ ນັບຕັ້ງແຕ່ປີ 1991 ແລະ ການລາຍງານຂ່າວບາງເຈົ້າ ລະບຸວ່າ ອິດທິພົນຂອງພາຍຸຮາກິບິສ ອາດຈະຮຸນແຮງທີ່ສຸດ ໃນຮອບເຄິ່ງສະຕະວັດ ຫຼື ນັບຕັ້ງແຕ່ປີ 1958 (61 ປີ) ເຊິ່ງເກີດພາຍຸທີ່ມີກຳລັງລົມຮຸນແຮງ ເຄື່ອນທີ່ພັດຜ່ານເຂົ້ານະຄອນຫຼວງໂຕກຽວ ເຊິ່ງໄດ້ຮັບຄວາມເສຍຫາຍຢ່າງໜັກ ແລະ ມີຜູ້ເສຍຊີວິດຫຼາຍກວ່າ 1.200 ຄົນ.