ຍຳຜັກບົ້ງຊ່ວຍໃຫ້ຕາໃສແຈ້ງ

110

ຄົນເຮົາສ່ວນໃຫຍ່ມັກຈະນໍາຜັກບົ້ງມາຂົ້ວນໍ້າມັນຫອຍ ແຕ່ມື້ນີ້ເຮົາຈະປ່ຽນມາເປັນຍໍາຜັກບົ້ງ. ຜັກບົ້ງນອກຈາກເປັນຜັກທີ່ລາຄາຖືກ ແລະ ປູກງ່າຍ ສາມາດຫາໄດ້ຕາມທົ່ງນາ ຫຼື ບ່ອນນໍ້າຊຸ່ມ ຜັກບົ້ງຍັງມີສ່ວນຊ່ວຍໃນການບໍາລຸງສາຍຕາໄດ້ເປັນຢ່າງດີ ພ້ອມທັງເປັນຜັກທີ່ມີປະໂຫຍດອຸດົມໄປດ້ວຍວິຕາມິນ ແລະ ແຮ່ທາດທີ່ສໍາຄັນຫຼາຍຢ່າງ.

ສ່ວນປະສົມ:

– ຜັກບົ້ງ 500 ກຣາມ.

 – ກຸ້ງສົດ 200 ກຣາມ.

– ໝູບົດ 100 ກຣາມ.

– ຫົວຜັກບົ່ວໃຫຍ່ 1/2 ຫົວ.

– ຫົວຜັກບົ່ວແດງ 2 ຫົວ.

– ໝາກເຫຼ່ນໃຫຍ່ 1 ໜ່ວຍ.

– ໝາກເຜັດ 10 – 15 ໜ່ວຍ ຫຼື ຕາມໃຈມັກ.

– ກະທຽມ 3 ກີບ.

– ນ້ຳຕານ 1 – 2 ບ່ວງແກງ.

– ນ້ຳປາ 3 – 4 ບ່ວງແກງ.

– ນ້ຳໝາກນາວ 2 – 3 ບ່ວງແກງ.

– ຫົວຜັກບົ່ວແດງຈຽວ 1 ບ່ວງແກງ.

– ຜັກເຊີເນລີ  2 ຕົ້ນ.

– ຖົ່ວດິນຂົ້ວ 1 ບ່ວງແກງ.

– ກຸ້ງແຫ້ງ 2 ບ່ວງແກງ ( ຖ້າມີ ).

ວິທີປຸງແຕ່ງ:

1. ປອກເປືອກກຸ້ງເອົາເສັ້ນດໍາອອກລ້າງໃຫ້ສະອາດ, ຜັກບົ້ງແມ່ນໃຫ້ຊອຍຕາມໃຈມັກຈະຊອຍເປັນເສັ້ນຍາວ ຫຼື ເສັ້ນຕັດກໍໄດ້, ຫົວຜັກບົ່ວໃຫຍ່ ແລະ ຫົວຜັກບົ່ວແດງແມ່ນຊອຍບາງໆ ສ່ວນໝາກເຫຼ່ນແມ່ນຜ່າ 4 ຫຼື 6 ແລ້ວແຕ່ມັກ. ຈາກນັ້ນ, ເອົານ້ຳໃສ່ໝໍ້ຄ້າງໄຟແຮງເມື່ອນໍ້າຟົດເອົາຜັກບົ້ງລົງລວກໃຫ້ເປັນສີຂຽວສະເໝີກັນ ແລະ ຕັກຂຶ້ນໃສ່ນ້ຳເຢັນ ຫຼື ນ້ຳກ້ອນເພື່ອໃຫ້ມັນເປັນສີຂຽວສົດ.

2. ຫຼັງຈາກລວກຜັກບົ້ງແລ້ວຈຶ່ງເອົາໝູບົດລົງຕົ້ມຈົນສຸກຕັກຂຶ້ນ ແລະ ເອົາກຸ້ງລວກຕໍ່ ສຸກແລ້ວກໍຕັກຂຶ້ນປະໄວ້ໃຫ້ສະເດັດນ້ຳໃສ່ຖ້ວຍກຽມໄວ້. ກຽມເຄື່ອງຮຽບຮ້ອຍກໍປຸງນ້ຳຍຳໂດຍເອົາໝາກເຜັດ, ກະທຽມ ແລະ ນ້ຳຕານໃສ່ຄົກຕຳໃຫ້ລະອຽດແລ້ວຕັກອອກໃສ່ຊາມ ເອົານ້ຳປາກັບນ້ຳໝາກນາວລົງຄົນໃຫ້ເຂົ້າກັນດີຈົນນ້ຳຕານລະລາຍ.

3. ເມື່ອໄດ້ນ້ຳຍຳກໍເອົາສ່ວນປະສົມທຸກຢ່າງທີ່ກຽມໄວ້ລົງຍົກເວັ້ນຜັກເຊີເນລີ ແລະ ເຄື່ອງໂຮຍໜ້າ ຄ່ອຍຄົນໃຫ້ເຂົ້າກັນ ແລະ ຊີມລົດຊາດຕາມໃຈມັກຕັກໃສ່ຈານໂຮຍໜ້າດ້ວຍຫົວຜັກບົ່ວແດງຈຽວ, ໝາກຖົ່ວດິນ, ກຸ້ງແຫ້ງ ແລະ ຜັກເຊີເນລີເທົ່ານີ້ກໍຖືວ່າຮຽບຮ້ອຍພ້ອມເສີບ.