“ ວັດຝາງແດງ ” ວັດທະນະທຳເກົ່າແກ່ ແຂວງອັດຕະປື

139

ປະເທດລາວມີວັດທະນະທຳທີ່ເປັນເອກະລັກ ແລະ ໂດດເດັ່ນ ມີສະຖານທີ່ທ່ອງທ່ຽວທີ່ໜ້າສົນໃຈຢ່າງຫຼວງຫຼາຍຊະນິດທີ່ວ່າຖ້າພາດແລ້ວກໍຕ້ອງເປັນທີ່ໜ້າເສຍດາຍ ວັດທະນະທຳກໍໄດ້ກາຍເປັນສ່ວນໜຶ່ງທີ່ນັກທ່ອງທ່ຽວໃຫ້ຄວາມສົນໃຈ ສັງເກດໄດ້ຈາກນັກທ່ອງທ່ຽວທີ່ເຂົ້າມາທ່ຽວຊົມປະເທດລາວຫຼາຍຂຶ້ນ ຍ້ອນຢາກສຳຜັດກັບວັດທະນະທຳລາວ ເພາະສິລະປະວັດທະນະທຳລາວ ເປັນສິ່ງທີ່ລະອຽດອ່ອນ, ສະແດງອອກໃນຫຼາຍແງ່ຫຼາຍມູມທີ່ແຕກຕ່າງກັນໄປ.

ວັດຝາງແດງ ຕັ້ງຢູ່ໃນບ້ານຝາງແດງ ເມືອງໄຊເສດຖາ ແຂວງອັດຕະປື ເປັນວັດທີ່ເກົ່າແກ່ຄູ່ບ້ານຄູ່ເມືອງ ແລະ ເປັນສະຖານທີ່ສັກສິດທີ່ຊາວບ້ານນິຍົມກັນໄປສັກກາລະບູຊາ ເຊິ່ງພາຍໃນເປັນບ່ອນປະດິດສະຖານຂອງພະພຸດທະຮູບອົງໃຫຍ່, ມີພາບລະບາຍສີຕາມຝາທີ່ເກົ່າແກ່ບູຮານອ້ອມຮອບຫ້ອງສວດມົນ ແລະ ງານປູນປັ້ນສີທອງທີ່ເປັນສິລະປະແບບມອນ, ຂອມ, ທາງດ້ານຫຼັງວັດມີແມ່ນ້ຳເຊກະໝານໄຫຼຜ່ານ. ສະໄໝສົງຄາມຈັກກະພັດອາເມຣິກາ ໄດ້ພະຍາຍາມນຳເອົາລະເບີດໄປຖິ້ມໃສ່ແຕ່ບໍ່ແຕກ, ວັດຝາງແດງຫ່າງຈາກຕະຫຼາດໃຫຍ່ປະມານ 12 ກິໂລແມັດ.

ໃນວັດແຫ່ງນີ້ຍັງມີພະທາດຝາງແດງ ທີ່ຊາວບ້ານໃຫ້ຄວາມເຄົາລົບບູຊາ ຕັ້ງເດັ່ນສະຫງ່າ ແລະ ມີຄວາມເກົ່າແກ່, ມີປະຫວັດຄວາມເປັນມາທີ່ໜ້າສຶກສາ ສຳລັບຄວາມເປັນມານັ້ນມີຫຼາຍເລື່ອງຫຼາຍຄົນເລົ່າຕໍ່ກັນມາ ບາງເລື່ອງກໍແມ່ນຄວາມຈິງທີ່ກ່ຽວພັນກັບພະທາດແຫ່ງນີ້ ແຕ່ຖ້າຍາກຮູ້ແຈ້ງເຫັນຈິງ ຄວນໄປສຶກສາດ້ວຍຕົວທ່ານເອງ ແລະ ທ່ານຈະໄດ້ຮູ້ວ່າປະເທດລາວເຮົາມີຫຼາຍຢ່າງທີ່ລໍຖ້າທ່ານສຳຜັດຢູ່.

ນີ້ແຫຼະນໍ້ບໍ່ວ່າຈະເປັນພາກໃດຂອງປະເທດ ຕ່າງກໍມີສະຖານທີ່ທ່ອງທ່ຽວທີ່ເດັ່ນໆເປັນຂອງຕົວເອງ ຖ້າຈະໃຫ້ອະທິບາຍລົງເລິກກ່ຽວກັບສະຖານທີ່ໄປຕາມແຂວງ ກໍຈະເຫັນໄດ້ເລີຍວ່າແຕ່ລະ   ແຂວງນັ້ນມີສະຖານທີ່ທ່ອງທ່ຽວທີ່ເດັ່ນໆ ເປັນເອກະລັກ ແລະ ຍັງມີວັດທະນະທຳ ປະເພນີທີ່ໜ້າສົນໃຈຢ່າງຫຼວງຫຼາຍທີ່ລໍຖ້າໃຫ້ທ່ານມາສຳຜັດຈາກຄົນຕ່າງຖິ່ນ.

ການທ່ອງທ່ຽວຖືວ່າເປັນການພັກຜ່ອນຢ່າງໜຶ່ງຂອງຊີວິດຈະເຫັນໄດ້ວ່າ ພຽງແຕ່ເຮົາທ່ອງທ່ຽວພາຍໃນປະເທດ ນອກຈາກເປັນການພັກຜ່ອນແລ້ວ ຍັງເປັນການສຶກສາຮຽນຮູ້ປະສົບການໃໝ່ໆໄປພ້ອມກັນ ແລະ ຍັງຊ່ວຍເສີມສ້າງເສດຖະກິດພາຍໃນປະເທດໃຫ້ມີຄວາມເຂັ້ມແຂງ ເພາະຈະເປັນການກະຈາຍລາຍໄດ້ໄປສູ່ທ້ອງຖິ່ນ, ຊຸມຊົນໂດຍກົງ. ທ່ອງທ່ຽວແຕ່ລະຄັ້ງເລືອກຕາມຄວາມມັກຂອງຕົນເອງ ເກີດມາທັງທີທ່ຽວກັນໃຫ້ກຸ່ມຄ່າ ບໍ່ຕ້ອງຄິດຫຍັງຫຼາຍ ພຽງຄິດວ່າເຮົາໄດ້ຊ່ວຍປະເທດກໍກຸ້ມຄ່າແລ້ວໃນການເດີນທາງ ລາວທ່ຽວລາວເພື່ອເສດຖະກິດທີ່ດີຂອງປະເທດ.