ເຮືອແບບພິເສດ ເລີ່ມປະຕິບັດການເກັບຂີ້ເຫຍື້ອ ກາງມະຫາສະໝຸດປາຊີຟິກ

142

ເຮືອທີ່ຖືກອອກແບບມາເປັນພິເສດ ສຳລັບການເກັບຂີ້ເຫຍື່ອພລາສຕິກທີ່ລອຍຢູ່ຕາມມະຫາສະໝຸດປາຊີຟິກອອກປະຕິບັດພາລະກິດເປັນຄັ້ງທຳອິດ ໂດຍຕັ້ງເປົ້າເກັບຂີ້ເຫຍື້ອໃນຂອບເຂດດັງກ່າວຢ່າງໜ້ອຍເຄິ່ງໜຶ່ງ ພາຍໃນ 5 ປີ.

ສຳນັກຂ່າວເອເອັຟພີ ລາຍງານຈາກເມືອງຣັອດເຕີດຳ ປະເທດເນເທີແລນ ເມື່ອວັນພຸດ ທີ 2 ຕຸລາ ວ່າ ໂຄງການເກັບຂີ້ເຫຍື້ອໃນທະເລ ແລະ ມະຫາສະໝຸດ ໂດຍກຸ່ມອົງການທີ່ບໍ່ສະແຫວງຫາຜົນກຳໄລໃນປະເທດເນເທີແລນ ເຊິ່ງເອີ້ນວ່າ The Ocean Cleanup  ໄດ້ນຳເຮືອທີ່ອອກແບບມາເປັນພິເສດ ໃນການເກັບຂີ້ເຫຍື້ອພລາສຕິກທີ່ລອຍຢູ່ກາງທະເລ ໂດຍການນຳໃຊ້ທຸ່ນຍາວ ເປັນແລ້ວເພື່ອເກັບຂີ້ເຫຍື້ອໃຫ້ໄດ້ຢ່າງໜ້ອຍເຄິ່ງໜຶ່ງ ໃນເຂດມະຫາສະໝຸດປາຊີຟິກ ພາຍໃນ 5 ປີ.

ທ່ານໂບຢານ ສະລາດ ອາຍຸ 25 ປີ ປະທານເຈົ້າໜ້າທີ່ຝ່າຍບໍລິຫານ ແລະ ຜູ້ກໍ່ຕັ້ງອົງກອນ The Ocean Cleanup ເປີດເຜີຍວ່າ ລະບົບຈັດການຂີ້ເຫຍື້ອໃນມະຫາສະໝຸດປາຊີຟິກໄດ້ເລີ່ມເຮັດວຽກເປັນຄັ້ງທຳອິດ. ເຊື່ອວ່າ ຈະສາມາດເຮັດ ຄວາມສະອາດມະຫາສະໝຸດໄດ້ ເຊິ່ງແນວຄິດນີ້ ເກີດຂື້ນເມື່ອ 7 ປີກ່ອນ ແລະ ໄດ້ທົດລອງ ເມື່ອປີກາຍນີ້.

ໂດຍເຮືອທີ່ຖືກອອກແບບມາເປັນພິເສດ ມີຊື່ວ່າ Maersk Launcher ໄດ້ລອຍອອກຈາກທ່າເຮືອໃນເມືອງຊານຟຣານຊິສໂກ ປະເທດອາເມຣິກາ ເມື່ອວັນທີ 9 ກັນຍາ ຜ່ານມາ ເພື່ອທົດລອງເກັບຂີ້ເຫຍື່ອພລາສຕິກ ໃນບໍລິເວນທີ່ກວດພົບກອງຂີ້ເຫຍື້ອຂະໜາດໃຫຍ່ເປັນສອງເທົ່າຂອງປະເທດຝຣັ່ງ ທີ່ລອຍຢູ່ໃນເຂດຊ່ວງຕໍ່ ກາງມະຫາສະໝຸດປາຊີຟິກ ລະຫວ່າງ ແຄລິຟໍເນຍ ກັບ ເກາະຮາວາຍ ເຮືອເກັບຂີ້ເຫຍື້ອອອກແບບໂດຍ ທ່ານສະລາດ ໄດ້ຕິດຕັ້ງທຸ່ນ ຫຼື ຜຽກ ທີ່ເປັນແລວຍາວ 600 ແມັດ ເຊິ່ງເອີ້ນວ່າ ລະບົບ 001 (System 001) ເພື່ອກວາດເອົາຂີ້ເຫຍື້ອພລາສຕິກໃນມະຫາສະໝຸດ ແລະ ນຳກັບມາໃຊ້ຄືນໃໝ່ ແລະ ຍັງຕິດຕັ້ງອຸປະກອນກ້ອງເຮືອ ເລິກ 3 ແມັດ ເພື່ອເກັບຂີ້ເຫຍື່ອທີ່ຈົມຢູ່ໃນນໍ້າອີກດ້ວຍ.