ພູນໍ້າກ້ອນມີຮອຍແຕກ ແຍກອອກຈາກກັນ ໃນຂົ້ວໂລກໃຕ້

144

ນໍ້າກ້ອນແຄມຂອບດ້ານນອກແຕກ ແຍກໂຕອອກຈາກເອເມີຣີ ເຂດນໍ້າກ້ອນຂະໜາດໃຫຍ່ທີ່ສຸອັນດັບ 3 ຂອງທະວີບແອນຕາກຕິກ ກາຍເປັນເຂດພູນໍ້າກ້ອນຂະໜາດໃຫຍ່ ຄວບຄຸມເນື້ອທີ່ຫຼາຍກວ່າ 1.500 ຕາລາງກິໂລແມັດ ແຕ່ນັກວິທະຍາສາດ ກ່າວວ່າ ເຫດການດັ່ງກ່າວເປັນສ່ວນໜຶ່ງຂອງວັດທະຈັກແບບປົກກະຕິ ບໍ່ກ່ຽວກັບພາວະໂລກຮ້ອນ.

ສຳນັກຂ່າວເອເອັຟພີ ລາຍງານຈາກນະຄອນຫຼວງວໍຊິງຕັນ ປະເທດສະຫະລັດ ອາເມລິກາ ເມື່ອວັນທີ 30 ກັນຍາ ວ່າ ຮູບພາບທີ່ບັນທຶກຈາກດາວທຽມຂອງທະວີບເອີຣົບ ແລະ ສະຫະລັດ ອາເມລິກາ ສະແດງໃຫ້ເຫັນວ່າ ພູນໍ້າກ້ອນທີ່ມີຊື່ວ່າ D28 ໄດ້ແຕກແລ້ວແຍກໂຕອອກຈາກເຂດນໍ້າກ້ອນເອເມີຣີ (Amery ice shelf) ລະຫວ່າງວັນທີ 25-28 ກັນຍາ ຜ່ານມາ ມີເນື້ອທີ່ 1.582 ຕາລາງກິໂລຕາແມັດ ໜາປະມານ 210 ແມັດ ແລະ ມີມວນນໍ້າກ້ອນໜັກ 315.000 ລ້ານໂຕນ.

ທ່ານນາງເຮເລນ ອາແມນດາ ຟຣິກເຄີ ນັກວິທະຍາສາດຊາວອາເມລິກາ ຈາກສະຖາບັນສະໝຸດສາດ ສະຄລິບ (Scripps Institution of Oceanography) ຈາກມະຫາວິທະຍາໄລແຄລິຟໍເນຍ ກ່າວວ່າ ປະກົດການ ທີ່ D28 ເປັນສ່ວນໜຶ່ງຂອງວັດທະຈັກເປັນເລື່ອງປົກກະຕິຂອງນໍ້າກ້ອນ ເຊິ່ງຈະແຕກໂຕ ແຍກອອກຈາກກັນ ເມື່ອມີມວນນໍ້າມະຫາສານເພີ່ມຂຶ້ນຫຼາຍກວ່າປົກກະຕິ ຈຶ່ງບໍ່ກ່ຽວກັບຜົນກະທົບທີ່ເກີດຢູ່ທິດຕາເວັນອອກຂອງທະວີບແອນຕາກຕິກ ທີ່ພູນໍ້າກ້ອນ D28 ແຍກຕົວອອກຈາກເຂດນໍ້າກ້ອນເອເມີຣີ ເຊິ່ງແຕກຕ່າງຈາກພື້ນທີ່ທາງທິດຕາເວັນຕົກ ລວມທັງເກາະກຣີນແລນ ເຂດຂົ້ວໂລກເໜືອ ທີ່ມີອາກາດອຸ່ນຂຶ້ນຢ່າງວ່ອງໄວ ຈາກການປ່ຽນແປງຂອງສະພາບດິນຟ້າອາກາດ.

ຫຼ້າສຸດ D28 ກຳລັງເຄື່ອນທີ່ໄປທາງທິດຕາເວັນຕົກ ດ້ານຄະນະນັກວິທະຍາສາດອົສຕຣາລີ ຈະຕິດຕາມ ແລະ ເຝົ້າລະວັງ ເພື່ອປ້ອງກັນອັນຕະລາຍທີ່ອາດຈະເກີດຂື້ນໃນການເດີນເຮືອ ແລະ ຕ້ອງໃຊ້ເວລາດົນຫຼາຍປີ ກວ່າ D28 ຈະມີການແຕກແຍກອອກຈາກກັນອີກຄັ້ງ ແລະ ເປື່ອຍລົງໃນມະຫາສະໝຸດ ຈົນໝົດ.