ໃກ້ອອກພັນສາແລ້ວ ເຂົ້າຫຼາມເປັນສິນຄ້າທີ່ນິຍົມເຮັດມາຂາຍ ຕົ້ນທຶນຕ່ຳສ້າງລາຍໄດ້ສູງ

199

ເຂົ້າຫຼາມແມ່ນອາຫານເອກະລັກທາງວັດທະນະທໍາລາວ ຫາກມີງານບຸນປະເພນີ ບໍ່ວ່າຈະຢູ່ທ້ອງຖິ່ນໃດຂອງປະເທດ ກໍຈະເຫັນເຂົ້າຫຼາມ ແລະ ປີ້ງໄກ່ ໃຫ້ແຂກທີ່ມາທ່ຽວງານໄດ້ຊີມ ແລະ ນຳໄປເປັນເຄື່ອງຝາກຂອງຕ້ອນຕິດໄມ້ຕິດມືກັບເຮືອນ ໂດຍສະເພາະແມ່ນງານບຸນຊ່ວງເຮືອ, ງານບຸນທາດຫຼວງ, ບຸນວັດພູຈຳປາສັກ ແລະ ງານຕ່າງໆທີ່ມີຄວາມໝາຍທາງວັດທະນະທຳລະດັບຊາດ ເຮົາຈະເຫັນໄດ້ງ່າຍເຮັດໃຫ້ອາຊີບຂາຍເຂົ້າຫຼາມ, ປີ້ງໄກ່ມັນໄດ້ກາຍເປັນອາຊີບທີ່ສາມາດສ້າງລາຍຮັບໄດ້ຢ່າງແທ້ຈິງ.

ການເຮັດເຂົ້າຫຼາມ ເປັນຜົນຜະລິດທີ່ໃຊ້ຕົ້ນທຶນຕ່ຳ, ວັດຖຸຕ່າງໆແມ່ນສາມາດຫາໄດ້ເອງເຮັດໃຫ້ສາມາດປະຢັດຕົ້ນທຶນໄດ້ອີກທາງ ສຳລັບສະຖານທີ່ຂາຍແມ່ນຂາຍຕາມງານບຸນປະເພນີຂອງບ້ານ ແລະ ງານຕ່າງໆທີ່ລູກຄ້າມາເຕົ້າໂຮມຈະມີຢູ່ທັງພາຍໃນ ແລະ ນອກສະຖານທີ່ ຍິ່ງປະເພນີບຸນອອກພັນສາກໍ່ໃກ້ເຂົ້າມາແລ້ວ ໃນວັນທີ 13 ຕຸລາ 2019 ນີ້ ພໍ່ຄ້າແມ່ຄ້າກໍ່ກະກຽມ ແລະ ງັດສູດເຮັດເຂົ້າຫຼາມແຊບໆ ອອກມາໃຫ້ລູກຄ້າໄດ້ຊີມກັນ ສິ່ງສຳຄັນໃນການເຮັດວັດຖຸດິບຕ້ອງສົດໃໝ່ ແລະ ການໃຊ້ໄຟເຜົາຕ້ອງພໍດີ ບໍ່ອ່ອນ ແລະ ບໍ່ແຮງຈົນເກີນໄປ ເພື່ອເຮັດໃຫ້ເຂົ້າສຸກດີ ແລະ ບໍ່ໄໝ້ບັ້ງດ້ານນອກກ່ອນ ຫຼື ໄໝ້ກ່ອນສຸກ.

ຂັ້ນຕອນຂອງການເຮັດເຂົ້າຫຼາມແຕ່ບູຮານນະການທີ່ສືບທອດກັນມາກໍ່ຈະມີຂັ້ນຕອນໂດຍການນຳເອົາເຂົ້າມາໝ່າໃສ່ບັ້ງໄຜ່ທີ່ຕັດຮອນມາກຽມໄວ້ແຕ່ຕອນແລງຂອງວັນນີ້ກ່ອນທີ່ມື້ອື່ນເຊົ້າຈະເອົາມາເຜົາໄຟໃຫ້ສຸກດີ ແລ້ວກໍ່ນຳເອົາມາເປັນອາຫານ. ຕໍ່ມາໄດ້ພັດທະນາມີການນຳເອົານ້ຳກະທິໝາກພ້າວ, ນ້ຳຕານມາເປັນສ່ວນປະສົມເຮັດໃຫ້ມີລົດຊາດຫອມຫວານດັ່ງທີ່ຫຼາຍທ່ານໄດ້ເຫັນໃນປັດຈຸບັນ.