ອາລີບາບາ ເປີດໂຕ ‘ຫານກວງ 800’ ຊິບອັດສະລິຍະ ປະມວນຜົນດ້ວຍຄວາມໄວສູງ

142

ອາລີບາບາ ເປີດໂຕຫານກວງ 800′ ຊິບອັດສະລິຍະ ປະມວນຜົນດ້ວຍຄວາມໄວສູງກວ່າອຸປະກອນລຸ້ນເກົ່າເຖິງ 10 ເທົ່າ ຈັດການກັບຮູບພາບໄດ້ກວ່າ 70.000 ຮູບພາຍໃນ 1 ນາທີ.

ສຳນັກຂ່າວຊິນຫົວ ຂອງຈີນລາຍງານຈາກເມືອງຫາງໂຈ ມົນທົນເຈີ້ຈຽງ ປະເທດຈີນ ເມື່ອວັນພຸດ ທີ 25 ກັນຍາ ຜ່ານມາ ວ່າ ກຸ່ມບໍລິສັດອາລີບາບາ ໄດ້ເປີດໂຕ ຊິບອັດສະລິຍະ ທີ່ມີຊື່ວ່າ ຫານກວງ 800 (Hankang 800) ເຊິ່ງເປັນຊິບ AI ທີ່ມີປະສິດຕິພາບສູງທີ່ສາມາດປະມວນຜົນໄດ້ ແລະ ເຮັດວຽກດ້ວຍໂຕມັນເອງ ເປັນຊິ້ນສ່ວນທຳອິດ ໃນກອງປະຊຸມອັບສະຣາ (Apsara Conference) ທີ່ຈັດຂຶ້ນຢູ່ເມືອງຫາງໂຈ ມົນທົນເຈີ້ຈຽງ ທາງພາກຕາເວັນອອກຂອງປະເທດຈີນ.

ຊື່ຂອງກອງປະຊຸມດັ່ງກ່າວ ແມ່ນໄດ້ແຮງບັນດານໃຈມາຈາກຊື່ຂອງນາງຟ້າແຫ່ງນະຄອນວັດ “ອັບສະຣາ” ຂອງປະເທດກໍາປູເຈຍ ເພື່ອສະທ້ອນໃຫ້ເຫັນເຖິງລະບົບຄລາວຄອມພິວຕິ້ງຂອງອາລີບາບາ ທີ່ກຳລັງ “ບິນຢູ່ເທິງທ້ອງຟ້າ”.

ຜົນງານດັ່ງກ່າວ ພັດທະນາໂດຍ ຜິງໂຖເກີ ເຊມິຄອນດັກເຕີ (Pingtouge Semiconductor) ເຊິ່ງເປັນບໍລິສັດ ສາຂາຍ່ອຍດ້ານການຜະລິດຊິບຂອງອາລີບາບາ ທີ່ມີພະລັງການປະມວນຜົນສູງກວ່າໜ່ວຍປະມວນຜົນຮູບພາບແບບເກົ່າເຖິງ 10 ເທົ່າ ພ້ອມທັງສາມາດຈັດການກັບຮູບພາບໄດ້ຫຼາຍ ກວ່າ 78.500 ຮູບ ໃນເວລາ 1 ວິນາທີ.

ທ່ານເຈຟ ຈາງ ປະທານເຈົ້າໜ້າທີ່ຝ່າຍເທັກໂນໂລຢີຂອງກຸ່ມບໍລິສັດອາລີບາບາ ແລະ ຫົວໜ້າສະຖາບັນດາໂມ (Damo) ຂອງອາລີບາບາ ກ່າວວ່າ ບໍລິສັດຄາດຫວັງວ່າຊິບ “ຫານກວງ 800” ຈະຊ່ວຍເພີ່ມປະສິດທິພາບຂອງການຄຳນວນໄດ້ເປັນສ່ວນສຳຄັນ ທັງການຄົ້ນຫາຮູບພາບ ແລະ ການໃຊ້ງານອື່ນໆ ເຊັ່ນ: ໃຊ້ກັບ “City Brain” ຫຼື ລະບົບຄວບຄຸມການຈະລາຈອນ ໂດຍລວມຂອງເມືອງຫາງໂຈ.

ທຸລະກິດຊິບເປັນບາດກ້າວທຳອິດຂອງເສັ້ນທາງໄລຍະຍາວຂອງອາລີບາບາ ໃນຖານະເປັນບໍລິສັດເທັກໂນໂລຢີ ທີ່ດຳເນີນການພັດທະນາ, ບູລະນະທຸລະກິດຊັອຟແວ ແລະ ຮາດແວ ທ່ານເຈຟ ຈາງ  ກ່າວ.

ຜິງໂຖເກີ ໄດ້ສ້າງຕັ້ງຂຶ້ນ ເມື່ອເດືອນກັນຍາ 2018 ຫຼັງຈາກທີ່ອາລີບາບາ ໄດ້ຊື້ກິດຈະການຜູ້ຜະລິດຊິບຂອງຈີນ “C-SKY Microsystems” ຈາກນັ້ນຜິງໂຖເກີໄດ້ເປີດໂຕ ຜະລິດຕະພັນປະມວນຜົນອັນທຳອິດ ສວນເຖ່ຍ 910 (XuanTie 910) ເມື່ອເດືອນກໍລະກົດ ເຊິ່ງສາມາດນຳໃຊ້ກັບເທັກໂນໂລຢີ 5G, ປັນຍາປະດິດ (AI), ລະບົບຂັບຂີ່ອັດຕະໂນມັດ ແລະ ອື່ນໆ.

ອີກປະການໜຶ່ງ ກອງປະຊຸມອັບສະຣາ ດັ້ງເດີມເປັນທີ່ຮູ້ຈັກໃນຖານະການປະຊຸມນັກພັດທະນາລະບົບຄລາວຂອງອາລີບາບາ ແຕ່ປັດຈຸບັນນີ້, ກອງປະຊຸມດັ່ງກ່າວມີຄວາມສຳຄັນຫຼາຍຂື້ນ ໃນຖານະແພລັດຟອມການສະແດງນະວັດຕະກຳໃໝ່ຫຼ້າສຸດຂອງບັນດານັກພັດທະນາໃນປະເທດຈີນ.

Credit: China Xinhua News