ຕາດຕະແລ ແຫຼ່ງທ່ອງທ່ຽວທຳມະຊາດທີ່ຕ້ອງໄປສຳຜັດ

180

ນ້ຳຕົກຕາດຕະແລ ມີຕຳນານເລົ່າຂານປາກຕໍ່ປາກມາວ່າ: ແຕ່ປາງກ່ອນມີບ່າວເງືອກຜູ້ໜຶ່ງຊື່ວ່າ ທ້າວພັກ ໄດ້ລົງຫຼິ້ນບຸນຢູ່ຫຼວງພະບາງ ບັງເອີນເຫັນສາວເງືອກຜູ້ໜຶ່ງຊື່ວ່າ ນາງຄຳຜິວ ທີ່ອາໄສຢູ່ນ້ຳຄານ ທ້າວພັກ ເກີດມີຄວາມຮັກມັກກັບ ນາງຄຳຜິວ ຈຶ່ງໄດ້ລັກເອົາ ນາງຄຳຜິວ ມານຳ.

ຕໍ່ຈາກນັ້ນມາ, ມີບ່າວເງືອກຄົນໜຶ່ງທີ່ຢູ່ຫຼວງພະບາງ ແລະ ເຄີຍຮັກມັກກັບ ນາງຄຳຜິວ ມາກ່ອນກໍ່ໄດ້ມານຳມາເອົາ ນາງຄຳຜິວ ຄືນ, ແຕ່ຝ່າຍຂອງ ທ້າວ ພັກ ບໍ່ຍອມຄືນໃຫ້ຄົນຮັກເກົ່າຂອງ ນາງຄໍາຜິວ. ດັ່ງນັ້ນ, ຈຶ່ງເຮັດໃຫ້ທັງສອງຝ່າຍເກີດມີການຕໍ່ສູ້ກັນ, ສ່ວນ ທ້າວພັກ ກໍ່ໄດ້ສ້າງດ່ານຕ້ານກັນໄວ້ເປັນຈຸດໆຢູ່ທີ່ນ້ຳຕະແລ ແລະ ດ່ານດັ່ງກ່າວກໍ່ກາຍເປັນຊັ້ນໆຢາຍກັນໄປເພື່ອປ້ອງກັນການບຸກໂຈມຕີຈາກຄົນຮັກເກົ່າຂອງ ນາງຄຳຜິວ ແລະ ຕັ້ງແຕ່ນັ້ນມາຈຶ່ງເອີ້ນວ່າ: “ ຕາດຕະແລ ” ໃນປັດຈຸບັນ.

ຕາດຕະແລ ຕັ້ງຢູ່ບ້ານຕະແລ ຫ່າງຈາກເທສະບານເມືອງຮຸນ ແຂວງອຸດົມໄຊ ປະມານ 40 ກວ່າກິໂລແມັດ ແລະ ການເຂົ້າເຖິງເປັນເສັ້ນທາງດິນແດງ, ຈຸດເດັ່ນຂອງຕາດນີ້ເປັນນ້ຳຕົກຕາດອີກແຫ່ງໜຶ່ງທີ່ມີຄວາມສວຍສົດງົດງາມທາງທຳມະຊາດທີ່ອ້ອມຮອບດ້ວຍປ່າດົງດິບ, ປ່າເຄິ່ງດົງດິບທີ່ມີຕົ້ນໄມ້ໃຫຍ່ – ນ້ອຍໃບດົກໜາຂຽວງາມ ແລະ ເຕັມໄປດ້ວຍນົກນາໆຊະນິດ, ນ້ຳຕົກເປັນລັນໆຫຼາຍກວ່າ 30 ຖ້ານ, ສວຍງາມເມື່ອຍາມຝົນນ້ຳລົ້ນຝັ່ງສຽງດັງກ້ອງກັງວານ ທ່ານຈະເຫັນນ້ຳຕົກທີ່ສວຍງາມທີ່ສຸດດຸດດັ່ງພາບແຕ້ມ, ໃນລະດູແລ້ງນ້ຳຈະແຫ້ງບໍ່ຫຼາຍ, ແຕ່ທ່ານຈະໄດ້ເຫັນຄວາມງາມອີກແບບໜຶ່ງ.