ນະຄອນຫຼວງແຄນເບີຣາ ເປັນເມືອງແຫ່ງທຳອິດຂອງອົສຕຣາລີ ໃຫ້ກັນຊາຖືກກົດໝາຍ

146

ນະຄອນຫຼວງແຄນເບີຣາ ປະເທດອົສຕຣາລີ ກາຍເປັນເມືອງທຳອິດໃນປະເທດ ທີ່ມີມະຕິອອກກົດໝາຍຮອງຮັບ ການນຳໃຊ້ ແລະ ເພາະປູກກັນຊາ ໃນປະລິມານໜ້ອຍ ໃຫ້ຖືກຕ້ອງຕາມກົດໝາຍ ເມື່ອວັນພຸດ ຜ່ານມາ.

ສຳນັກຂ່າວຕ່າງປະເທດລາຍງານຈາກນະຄອນຫຼວງແຄນເບີຣາ ປະເທດອົສຕຣາລີ ເມື່ອວັນພຸດ ທີ 25 ກັນຍາ ວ່າ ສະມາຊິກສະພາເຂດນະຄອນຫຼວງປະເທດອົສຕຣາລີ ຫຼື ເອຊີທີ (ACT: Australian Capital Territory) ເຂດປົກຄອງຕົນເອງ ພາຍໃນລັດນິວ ເຊົາເວລສ໌ ທາງພາກຕາເວັນອອກສຽງໃຕ້ ໄດ້ລົງມະຕິຜ່ານຮ່າງກົດໝາຍ ອະນຸຍາດໃຫ້ຜູ້ທີ່ມີອາຍຸ 18 ປີຂຶ້ນໄປ ແມ່ນສາມາດຄອບຄອງກັນຊາແຫ້ງໄດ້ ບໍ່ໃຫ້ເກີນ 50 ກຣາມ ຫຼື ສາມາດປູກໄດ້ບໍ່ເກີນຄົນລະ 2 ຕົ້ນ ແລະ ສູງສຸດບໍ່ເກີນ 4 ຕົ້ນຕໍ່ຄອບຄົວ ສຳລັບການບໍລິໂພກສ່ວນຕົວ.

ກົດໝາຍສະບັບໃໝ່ ຈະເລີ່ມມີຜົນບັງຄັບໃຊ້ ຕັ້ງແຕ່ວັນທີ 31 ມັງກອນ 2020 ແລະ ເຮັດໃຫ້ເອຊີທີເປັນເຂດທຳອິດ ໃນ 6 ລັດ ແລະ 2 ເຂດຂອງອົສຕຣາລີ ທີ່ອອກກົດໝາຍຮັບຮອງກັນຊາສຳລັບນຳໃຊ້ສ່ວນຕົວ.

ກັນຊາຍັງເປັນສານທີ່ຖືກຫ້າມ ພາຍໃຕ້ກົດໝາຍລັດຖະບານກາງອົສຕຣາລີ ກົດໝາຍສະບັບໃໝ່ຂອງເຂດເອຊີທີ ເຊິ່ງມີປະຊາກອນອາໄສຢູ່ ປະມານ 400.000 ຄົນ ມີຂໍ້ຂັດແຍ່ງກັບກົດໝາຍຢາເສບຕິດຂອງປະເທດ ເຊິ່ງອອກໂດຍສະພາ ແລະ ກຳນົດຫ້າມການຄອບຄອງກັນຊາ.

ດ້ານທ່ານແອນດຣູ ບາ ຫົວໜ້າຄະນະລັດຖະມົນຕີເອຊີທີ ກ່າວວ່າ ເຖິງວ່າລັດຖະບານທ້ອງຖິ່ນເຂດເອຊີທີ ບໍ່ສະໜັບສະໜູນກັນຊາ ຫຼື ສານເສບຕິດອື່ນໆ ເພື່ອຄວາມບັນເທິງ ແຕ່ເຖິງເວລາແລ້ວທີ່ຈະຍອມຮັບຄວາມຈິງວ່າ ຂໍ້ຫ້າມຢ່າງເຂັ້ມງວດ ບໍ່ແມ່ນນະໂຍບາຍທີ່ມີປະສິດຕິຜົນອີກຕໍ່ໄປ. ສ່ວນທ່ານກໍດອນ ແຣມເຊ ລັດຖະມົນຕີຍຸຕິທຳຂອງເອຊີທີ ກ່າວວ່າ ເຖິງເວລາແລ້ວທີ່ຈະຕ້ອງປະຕິບັດກັບຜູ້ຕິດຢາເສບຕິດ ເປັນບັນຫາດ້ານສຸຂະພາບຫຼາຍກວ່າເປັນ “ຄວາມຜິດ ຫຼື ຖືກ”.

ຝ່າຍຄ້ານໃນສະພາເອຊີທີ ທີ່ຍົກມືຄັດຄ້ານການຮ່າງກົດໝາຍສະບັບນີ້ ລະບຸວ່າ ການປ່ຽນແປງດັ່ງກ່າວຈະຊຸກຍູ້ໃຫ້ປະຊາຊົນນຳໃຊ້ກັນຊາຫຼາຍຂຶ້ນ ເຊິ່ງຈະນຳໄປສູ່ບັນຫາທາງຈິດທີ່ເກີດຂຶ້ນຍ້ອນຢາເສບຕິດຫຼາຍຂຶ້ນອີກ.