ມອບວັດຖຸບູຮານ ເກືອບ 8 ພັນ ລາຍການ ໃຫ້ລັດຖະບານລາວ

143

ບໍລິສັດ ລ້ານຊ້າງ ມີເນໂຣນສ໌ ລິມິເຕັດ ( ລຊມລ ) ໄດ້ມອບວັດຖຸບູຮານເກືອບ 8 ພັນ ລາຍການ ໃຫ້ແກ່ລັດຖະບານລາວ ທີ່ຄົ້ນພົບຢູ່ ບໍ່ຄຳ – ທອງ ເຊໂປນ ໂດຍວັດຖຸບູຮານດັ່ງກ່າວຈະໄດ້ນຳໄປວາງສະແດງຢູ່ຫໍພິພິທະພັນແຫ່ງຊາດ, ຫໍພິພິທະພັນແຂວງສະຫວັນນະເຂດ ແລະ ຫໍວັດທະນະທຳ ເມືອງວິລະບູລີ.

ພິທີດັ່ງກ່າວໄດ້ມີຂຶ້ນໃນວັນທີ 24 ກັນຍາ 2019 ທີ່ໂຮງແຮມ ຄຣາວ ພລາຊາ ນະຄອນຫຼວງວຽງຈັນ ຕາງໜ້າໃຫ້ ບໍລິສັດ ລຊມລ ແມ່ນ ທ່ານ ສະໝານອະເນກາ ຜູ້ອໍານວຍການໃຫຍ່ທີ່ເປັນຜູ້ມອບວັດຖຸບູຮານໃຫ້ແກ່ ທ່ານ ນາງ ວັນເພັງ ແກ້ວປັນຍາ ຜູ້ອໍານວຍການຫໍພິພິທະພັນແຫ່ງຊາດ, ທ່ານ ນາລາທິເວດ ອຳມະລາທິທາດາ ຜູ້ອໍານວຍການຫໍພິພິທະພັນແຂວງສະຫວັນນະເຂດ ແລະ ທ່ານ ນາງ ຕຸ້ຍທອງ ແກ້ວວົງສາ ຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ການທ່ອງທ່ຽວ ເມືອງວິລະບູລີ ແຂວງສະຫວັນນະເຂດ ໂດຍການໃຫ້ກຽດເປັນສັກຂີພິຍານຂອງ ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທໍາ ແລະ ການທ່ອງທ່ຽວ, ທ່ານ ຄໍາພູນ ຕຸໄພທູນ ຮອງເຈົ້າແຂວງສະຫວັນນະເຂດ ພ້ອມພາກສ່ວນທີ່ກ່ຽວຂ້ອງເຂົ້າຮ່ວມ.

ວັດຖຸບູຮານດັ່ງກ່າວມີ 8 ປະເພດ ລວມເປັນວັດຖຸກວ່າ 7.881 ຊິ້ນ ແມ່ນຈະໄດ້ນໍາໄປວາງສະແດງຢູ່ຫໍພິພິທະພັນແຫ່ງຊາດ ( 828 ລາຍການ ), ຫໍພິພິທະພັນແຂວງສະຫວັນນະເຂດ ( 409 ລາຍການ ) ແລະ ຫໍວັດທະນະທໍາເມືອງວິລະບູລີ ( 6.644 ລາຍການ ).

ທ່ານ ບົວເງິນ ຊາພູວົງ ກ່າວວ່າ: ນັບຕັ້ງແຕ່ປີ 2008 ເປັນຕົ້ນມາ ບໍລິສັດ ລຊມລ ໄດ້ລົງທຶນຫຼາຍກວ່າ 1,3 ລ້ານໂດລາ ເຂົ້າໃນການສະໜັບສະໜູນ ການອະນຸຮັກປະຫວັດສາດລາວ ແລະ ມໍລະດົກທາງວັດທະນະທໍາກວ່າ 3.000 ປີ ຜ່ານການຮ່ວມມືດ້ານການຄົ້ນຄວ້າບູຮານຄະດີກັບກົມມໍລະດົກຂອງ ກະຊວງຖະແຫຼງຂ່າວ, ວັດທະນະທໍາ ແລະ ການທ່ອງທ່ຽວ, ມະຫາວິທະຍາໄລແຫ່ງຊາດລາວ ແລະ ມະຫາວິທະຍາໄລເຈມສ໌ຄຸກ ຂອງອົສຕຣາລີ. ການຮ່ວມມືດັ່ງກ່າວແມ່ນການສະໜັບສະໜູນວຽກງານພາກສະໜາມ ທີ່ເປັນການເຕົ້າໂຮມການຮ່ວມມືທີ່ມີລັກສະນະພິເສດໃນລະດັບຊຸມຊົນທ້ອງຖິ່ນ, ປະເທດ ແລະ ສາກົນ, ອາສາສະໝັກຈາກນະຄອນຫຼວງວຽງຈັນ, ປະຊາຊົນທ້ອງຖິ່ນ, ນັກສຶກສາຈາກອົສຕຣາລີ ແລະ ນັກສຶກສາລາວ, ນັກບູຮານຄະດີ ແລະ ເຈົ້າໜ້າທີ່ຈາກກົມມໍລະດົກທີ່ມາປະຈໍາຢູ່ ບໍ່ຄໍາ – ທອງເຊໂປນ ໄດ້ຮ່ວມມືກັນຢ່າງໃກ້ຊິດໃນວຽກງານຄົ້ນຄວ້າຕ່າງໆ.

ໃນໄລຍະຜ່ານມາແມ່ນໄດ້ມີການຄົ້ນພົບວັດຖຸບູຮານສໍາຄັນຫຼາຍອັນຢູ່ ບໍ່ຄໍາ – ທອງ  ເຊໂປນ ໃນເມືອງວິລະບູລີ ແຂວງສະຫວັນນະເຂດ, ໃນເດືອນມີນາ 2018 ທີມງານນັກບູຮານຄະດີໄດ້ຄົ້ນພົບຫຼັກຖານໄມ້ຄ້ຳ – ຂຸມບໍ່ແຮ່ບູຮານຫຼາຍກວ່າ 200 ບໍ່ ມີອາຍຸກວ່າ 7 ພັນປີກ່ອນ ຈາກການຄົ້ນພົບນີ້ເຮັດໃຫ້ເມືອງວິລະບູລີ ເປັນໜຶ່ງໃນເຂດທີ່ມີການຄົ້ນພົບຮ່ອງຮອຍການຂຸດຄົ້ນແຮ່ ແລະ ໂລຫະກິດໃນຂົງເຂດພາກພື້ນອາຊີຕາເວັນອອກສ່ຽງໃຕ້ຍຸກກ່ອນປະຫວັດສາດ ເຊິ່ງການຂຸດຄົ້ນ – ປຸງແຕ່ງແຮ່ບູຮານໃນຂົງເຂດ ບໍ່ຄໍາ – ທອງເຊໂປນ ນີ້ໄດ້ສືບຕໍ່ມາເຖິງປະມານ 1.300 ປີກ່ອນ ( ປະມານ ຄ.ສ 700 ) ເຊິ່ງເປັນໄລຍະທີ່ຜູ້ຄົນໄດ້ຂຸດຄົ້ນແຮ່ທອງທີ່ອຸດົມສົມບູນຢູ່ເຂດທີ່ຮູ້ກັນວ່າ “ ເປີ້ນເບົ້າຫຼໍ່ ” ແລະ ທົ່ງນາເງືອກ ແລ້ວໄດ້ນໍາໄປປຸງແຕ່ງ ແລະ ແລກປ່ຽນ, ການສັນນິຖານນີ້ ແມ່ນມາຈາກກາກບອນທີ່ພົບໃນຝາກະແຕະໄມ້ໄຜ່ຈາກຂຸມບໍ່ແຮ່ບູຮານໃນຕະກອນຕົມທີ່ຢູ່ເລິກໄປຈາກໜ້າດິນລະຫວ່າງ 10 ຫາ 40 ແມັດ.

ວັດຖຸບູຮານອື່ນໆທີ່ຄົ້ນຄົບລວມມີອຸປະກອນນໍາໃຊ້ໃນການຂຸດຄົ້ນແຮ່ ເຊັ່ນ: ຂັ້ນໄດທີ່ເຮັດດ້ວຍໄມ້ ແລະ ລູກລອກ, ໄມ້ຄ້ຳ, ກະຕ່າໄມ້ໄຜ່ ແລະ ເຊືອກ, ຄອງບ້າງທອງສໍາລິດຈາກຍຸກທອງ ເຊິ່ງວາງສະແດງໄວ້ຢູ່ທີ່ຫໍພິພິທະພັນແຫ່ງຊາດ, ກ້ອນທອງ, ເຄື່ອງປັ້ນດິນເຜົາ, ກະດິງທອງສໍາລິດ, ເຄື່ອງປະດັບ, ເຄື່ອງໃຊ້ໃນພິທີກໍາ ແລະ ວັດຖຸອື່ນໆ ເຊິ່ງຊີ້ໃຫ້ເຫັນວ່າປະເທດລາວໃນອະດີດເປັນສະຖານທີ່ສໍາຄັນໃນປະຫວັດສາດໃນຂົງເຂດພາກພື້ນນີ້.

ທ່ານ ສະໝານ ອະເນກາ ໄດ້ກ່າວວ່າ: ການມອບ – ຮັບວັດຖຸບູຮານມື້ນີ້ເປັນນິມິດໝາຍທີ່ສໍາຄັນຂອງການຮ່ວມມືດ້ານການອະນຸຮັກປະຫວັດສາດ ແລະ ມໍລະດົກວັດທະນະທໍາ, ແຕ່ກໍບໍ່ໄດ້ໝາຍວ່າຈະເປັນຈຸດຈົບຂອງການຮ່ວມມື. ລຊມລ ໝາຍໝັ້ນຈະສືບຕໍ່ໃຫ້ການສະໜັບສະໜູນ ແລະ ເຮັດວຽກຢ່າງໃກ້ຊິດຄຽງບ່າຄຽງໄຫຼ່ກັບຄູ່ຮ່ວມງານພາກລັດຖະບານຂອງພວກເຮົາ ສືບຕໍ່ໄປອີກຢ່າງຕ່ຳ 10 ປີ ຈົນກວ່າບໍ່ແຮ່ຈະປິດລົງ, ການຂຸດຄົ້ນບໍ່ແຮ່ເປັນປັດໄຈສໍາຄັນໃນການພັດທະນາພົນລະເມືອງ ແລະ ສັງຄົມມາແຕ່ປະຫວັດສາດການຂຸດຄົ້ນຍັງຈະດໍາເນີນຕໍ່ໄປ ແລະ ພວກເຮົາຫວັງວ່າຈະໄດ້ເຜີຍແຜ່ການຄົ້ນພົບອັນໜ້າຕື່ນເຕັ້ນກວ່າເກົ່າ ກ່ຽວກັບວັດທະນະທໍາ ແລະ ປະຫວັດສາດລາວ.

Credit: Laoedaily