ລົມໜາວເລິ່ມພັດຜ່ານປົກຄຸມປະເທດລາວ

211

ກົມອຸຕຸນິຍົມ ແລະ ອຸທົກກະສາດ ໄດ້ລາຍງານພະຍາກອນອາກາດປະຈໍາວັນຈັນ ທີ 23 ກັນຍາ 2019 ວ່າ: ຄວາມກົດດັນສູງຂອງອາກາດເຢັນທີ່ພັດຜ່ານມາຈາກປະເທດຈີນ ໄດ້ເພີ່ມກໍາລັງແຮງຂຶ້ນເລັກນ້ອຍ ແລະ ພັດຜ່ານລົງມາປົກຄຸມຢູ່ທົ່ວທຸກພາກຂອງປະເທດລາວດ້ວຍກຳລັງອ່ອນ ຫາ ປານກາງ, ສົມທົບກັບກະແສລົມຕາເວັນອອກພັດປົກຄຸມ, ເຊິ່ງລັກສະນະເຊັ່ນນີ້ ຈະເຮັດໃຫ້ອາກາດເຢັນໃນຕອນກາງຄືນ ຫາ ຕອນເຊົ້າ ພ້ອມມີໝອກບາງປົກຄຸມທົ່ວໄປໃນແຕ່ລະພາກ ແລະ ຈະມີຝົນຕົກໃນລະດັບຄ່ອຍ ພ້ອມມີລົມພັດແຮງຢູ່ບາງທ້ອງຖິ່ນແຂວງພາກໃຕ້ໃນຕອນບ່າຍຫາຄໍ່າ.

ພາກເໜືອດ້ານຕາເວັນອອກ ແຂວງຜົ້ງສາລີ, ເມືອງວຽງໄຊ, ເມືອງຊຳເໜືອ ແລະ ຊຽງຂວາງ ອາກາດເຢັນ ພ້ອມມີໝອກບາງປົກຄຸມຢູ່ທົ່ວໄປໃນຕອນເຊົ້າ ພ້ອມມີລົມພັດແຮງເປັນບາງໂອກາດ ອຸນຫະພູມ ລະຫວ່າງ 14-27 ອົງສາ.

ພາກເໜືອດ້ານຕາເວັນຕົກ ແຂວງອຸດົມໄຊ, ເມືອງຫ້ວຍຊາຍ, ແຂວງຫຼວງນໍ້າທາ, ເມືອງສິງ, ເມືອງວຽງພູຄາ, ແຂວງຫຼວງພະບາງ ແລະ ແຂວງໄຊຍະບູລີ ອາກາດເຢັນໃນຕອນເຊົ້າ ພ້ອມມີໝອກບາງປົກຄຸມຢູ່ທົ່ວໄປ ແລະ ຈະມີລົມພັດແຮງຢູ່ບາງທ້ອງຖິ່ນໃນຕອນບ່າຍ ອຸນຫະພູມ ລະຫວ່າງ 17-32 ອົງສາ.

ພາກກາງ ນະຄອນຫຼວງວຽງຈັນ, ແຂວງໄຊສົມບູນ, ເມືອງໂພນໂຮງ, ປາກຊັນ, ຫຼັກ20, ເມືອງວຽງທອງ, ນາກາຍ, ທ່າແຂກ, ສະຫວັນນະເຂດ ແລະ ເຊໂນ ມີຂີ້ເຝື້ອປົກຄຸມບາງສ່ວນ, ອາກາດຮ້ອນ ແລະ ຈະມີລົມພັດແຮງເປັນບາງໂອກາດຢູ່ບາງທ້ອງຖິ່ນທາງດ້ານຕາເວັນອອກຂອງພາກ ອຸນຫະພູມ ລະຫວ່າງ 19-33 ອົງສາ.

ພາກໃຕ້ ມີເຝື້ອປົກຄຸມເປັນສ່ວນຫຼາຍ ຈະມີຝົນຕົກໃນລະດັບຄ່ອຍ ຢູ່ບາງທ້ອງຖິ່ນຕື່ມອີກ ແລະ ມີລົມພັດແຮງເປັນບາງໂອກາດ ອຸນຫະພູມ ລະຫວ່າງ 23-32 ອົງສາ.

ສໍາລັບເຂດພູພຽງບໍລິເວນ ອາກາດເຢັນ ຫາ ໜາວເຢັນໃນຕອນເຊົ້າ ພ້ອມມີໝອກບາງປົກຫຸ້ມຢູ່ທົ່ວໄປ ແລະ ຈະມີຝົນຕົກໃນລະດັບຄ່ອຍເປັນບາງໂອກາດ. ອຸນຫະພູມລະຫວ່າງ 13-26 ອົງສາ.

Credit: ກົມອຸຕຸນິຍົມ ແລະ ອຸທົກກະສາກ