ຕົ້ມຍຳໄກ່ໃສ່ໝາກປີ

159

ເມື່ອເວົ້າເຖິງໝາກປີຂຶ້ນມາກໍອົດຄິດຮອດພໍ່ກັບແມ່ບໍ່ໄດ້ ເພາະແມ່ເຮັດໃຫ້ກິນຕະຫຼອດ ມັກກິນທັງຄອບຄົວ ໝາກປີນັ້ນມີຄຸນຄ່າບໍ່ໜ້ອຍໄປກວ່າໝາກກ້ວຍສຸກເລີຍ ນິຍົມກັນນຳມາເຮັດເປັນອາຫານທັງແບບສຸກ ແລະ ດິບ.

 ອີກຢ່າງຍັງມີແຮ່ທາດເຫຼັກຢູ່ຫຼາຍ ແລະ ຍັງມີຜົນວິໄຈພົບວ່າໝາກປີຊ່ວຍປິ່ນປົວພະຍາດກະເພາະອາຫານໄດ້ອີກດ້ວຍ ເພາະສາມາດປ້ອງກັນການເກີດບາດແຜໃນກະເພາະຂອງເຮົາໄດ້ນັ້ນເອງ ບໍ່ຕ້ອງລໍຊ້າ ເຮົາໄປເບິ່ງສ່ວນປະສົມ ແລະ ວິທີເຮັດພ້ອມກັນເລີຍ.

ສ່ວນປະສົມ:

• ໝາກປີ 1 ຫົວ

• ໄກ່ຕັດເປັນຕ່ອນພໍດີຄຳ 400 ກຣາມ

• ເລືອດໄກ່ 1/2 ກ້ອນ

• ຫົວກະທິ 2 ຖ້ວຍນ້ອຍ

• ຫາງກະທິ 4 ຖ້ວຍນ້ອຍ

• ຫົວສີໃຄຕັດເປັນຕ່ອນ 3 ຕົ້ນ

• ຂ່າຊອຍ 3 – 5 ປ່ຽງ

• ໃບຂີ້ຫູດ 10 ໃບ

• ເກືອ 2 ບ່ວງ

• ນ້ຳພິກເຜົາບໍ່ຫວານ

• ນ້ຳປາ

• ນ້ຳໝາກໜາວ

• ໝາກເພັດຂີ້ໜູ

• ຜັກຊີ

ໝາກປີຊອຍຕາມລວງຂວາງເປັນຕ່ອນບໍ່ນ້ອຍບໍ່ໃຫຍ່ຈົນເກີນໄປ ອີກຢ່າງໜຶ່ງທີ່ສຳຄັນຄືການກຽມຊາມໃສ່ນ້ຳໄວ້ແລ້ວບີບນ້ຳໝາກນາວລົງໄປ ເວລາເຮົາຊອຍໝາກປີແລ້ວໃສ່ລົງໄປໝາກປີຈະບໍ່ດຳ.

ວິທີປຸງແຕ່ງ:

1. ຂັ້ນຕອນທຳອິດຕົ້ມນ້ຳໃຫ້ຮ້ອນແລ້ວໃສ່ໝາກປີລົງໄປຕົ້ມໃຫ້ສຸກພໍດີແລ້ວຕັກໃສ່ຖ້ວຍໄວ້.

2. ຈາກນັ້ນ, ເອົາຫາງກະທິໃສ່ໝໍ້ແລ້ວນຳໄປຄ້າງໄຟປານກາງ ແລ້ວຄົນຕະຫຼອດເພື່ອບໍ່ໃຫ້ກະທິຈັບກັນເປັນກ້ອນ ພໍກະທິຮ້ອນແລ້ວເຮົາຈະໃສ່ຂ່າ ແລະ ຫົວສີໃຄລົງໄປ ຕາມດ້ວຍໄກ່ທີ່ເຮົາຕັດເປັນຕ່ອນເອົາໄວ້ ແລະ ເພີ່ມລົດຊາດດ້ວຍເກືອ ຫຼັງຈາກນັ້ນຕົ້ມໄກ່ຈົນສຸກ.

3. ພໍໄກ່ສຸກໄດ້ທີ່ແລ້ວໃຫ້ໃສ່ຫົວກະທິລົງໄປແລ້ວຕາມດ້ວຍໝາກປີທີ່ເຮົາຕົ້ມກຽມໄວ້ນັ້ນ ແລ້ວຕາມດ້ວຍໃບຂີ້ຫູດຕົ້ມຕໍ່ຈົນຮ້ອນອີກຮອບ.

4. ຂັ້ນຕອນສຸດທ້າຍແລ້ວໃຫ້ໃສ່ນ້ຳພິກເຜົາ, ນ້ຳປາ, ນ້ຳໝາກນາວ ແລະ ໝາກເຜັດ ລອງຊີມເບິ່ງແລ້ວປຸງລົດຊາດຕາມທີ່ຕົນເອງມັກ ຖ້າພໍດີຈຶ່ງໃສ່ຜັກຊີແລ້ວປິດໄຟພ້ອມເສີບໄດ້ເລີຍ.