ເດ ເຄອາ ຕົກລົງຕໍ່ສັນສັນຍາສະບັບໃໝ່ກັບ ແມນຢູ ຮັບເມື່ອຍມະຫາສານ

145

ຫຼັງຈາກຂ່າວຄາວທີ່ຍືດເຍື້ອເປັນເວລາດົນນານ ຫຼ້າສຸດທຸກຢ່າງທີ່ຫຼາຍຄົນລໍຄອຍ ໄດ້ສິ້ນສຸດແລ້ວ ເມື່ອ ແມນເຊັສເຕີ ຢູໄນເຕັດ ສາມາດບັນລຸຂໍ້ຕົກລົງຕໍ່ສັນຍາກັບ ອາບິດ ເດ ເຄອາ ຜູ້ຮັກສາປະຕູຄົນສຳຄັນຂອງທີມ ອອກໄປອີກ 4 ປີ ພ້ອມເງື່ອນໄຂພິເສດ ເພີ່ມອີກ 1 ປີ.

ອາບິດ ເດ ເຄອາ ຜູ້ຮັກສາປະຕູທີມຊາດສະເປນ ຕົກລົງຕໍ່ສັນຍາສະບັບໃໝ່ກັບ ແມນເຊັສເຕີ ຢູໄນເຕັດ ສະໂມສອນຍັກໃຫຍ່ຈາກເວທີພຣີເມຍ ລີກ ຂອງອັງກິດ ເປັນໄລຍະ 4 ປີ ຫຼື ຈົນຮອດປີ 2023 ຢ່າງເປັນທາງການພ້ອມເງື່ອນໄຂພິເສດ ເພີ່ມອີກ 1 ປີ ໂດຍອັດຕະໂນມັດ ເມື່ອວັນຈັນ ທີ 16 ກັນຍາ ຜ່ານມາ.

ເຊິ່ງກ່ອນໜ້ານີ້ ອະນາຄົດຂອງຜູ້ຮັກສາປະຕູ ອາຍຸ 28 ປີ ຢູ່ໃນຄວາມບໍ່ແນ່ນອນ ເນື່ອງຈາກການເຈລະຈາກ່ຽວກັບສັນຍາສະບັບໃໝ່ກັບຕົ້ນສັງກັດທີ່ມີບໍ່ສາມາດຕົງລົງເງື່ອນໄຂກັນໄດ້ ຫຼັງຈາກສັນຍາສະບັບປັດຈຸບັນຈະໝົດອາຍຸ ໃນໄລຍະພັກຮ້ອນປີໜ້າ ພ້ອມກັບມີຂ່າວເຊື່ອມໂຍງການຍ້າຍທີມກັບຫຼາຍທີມຊັ້ນນຳໃນເອີຣົບອີກດ້ວຍ.

ຈົນຫຼ້າສຸດ ແມນເຊັສເຕີ ຢູໄນເຕັດ ໄດ້ປະກາດຜ່ານເວັບໄຊທ໌ຂອງສະໂມສອນ ຢ່າງເປັນທາງການ ວ່າ ເດ ເຄອາ ໄດ້ຕົກລົງເຊັນສັນຍາສະບັບໃໝ່ກັບທີມເປັນທີ່ຮຽບຮ້ອຍ ໂດຍລາຍລະອຽດຂອງສັນຍາຄາດວ່າ ຜູ້ຮັກສາປະຕູຊາວສະເປນນິສ ຈະໄດ້ຮັບຄ່າເມື່ອນປະມານ 350.000 ປອນ (ປະມານ 3,8 ຕື້ກີບ) ຕໍ່ອາທິດ ຈາກສັນຍາສະບັບເກົ່າຮັບຢູ່ 200.000 ປອນ (ປະມານ 2,1 ຕື້ກີບ) ຕໍ່ອາທິດ ພ້ອມກັບເປັນການຮັບຄ່າເມື່ອງແຊງໜ້າ ປອລ ປັອກບາ ກອງກາງຈາກທີມຊາດຝຣັ່ງ ທີ່ໄດ້ຮັບຢູ່ອາທິດລະ 290.000 ປອນ (ປະມານ 3,1 ຕື້ກີບ).