ສະຖານທີ່ທ່ອງທ່ຽວທຳມະຊາດ ແຂວງໄຊສົມບູນ

324

ແຂວງໄຊສົມບູນເປັນແຂວງທີ່ຕັ້ງຢູ່ໃຈກາງຂອງປະເທດລາວ ເປັນແຂວງດຽວທີ່ບໍ່ມີຊາຍແດນຕິດ ກັບປະເທດເພື່ອນບ້ານ, ສ້າງຕັ້ງຂື້ນປີ 2013, ເຊິ່ງທິດເໜືອ ແລະທິດຕາເວັນອອກ ຕິດກັບແຂວງຊຽງຂວາງ, ທິດໃຕ້ຕດກັບແຂວງ ບໍລິຄຳໄຊ ທິດຕາເວັນຕົກຕິດກັບແຂວງວຽງຈັນ. ເປັນແຂວງທີ່ຕັ້ງຢູ່ເຂດພູດອຍສູງຊັນ ມີຊັບພະຍາກອນທຳມະຊາດ ອຸດົມສົມບູນ ມີວັດທະນະທຳ ແລະ ຮິບຄອງປະເພນີອັນດີງາມຂອງປະຊາຊົນລາວບັນດາເຜົ່າ ເປັນທ່າແຮງດ້ານການທ່ອງທ່ຽວ ທຳມະຊາດ ເປັນຕົ້ນແມ່ນ ທິວທັດທຳມະຊາດ, ຖ້ຳ ແລະ ແຫຼ່ງທ່ອງທ່ຽວທາງປະຫວັດສາດຕ່າງໆ. ແຕ່ຜ່ານມາ ຍ້ອນບັນຫາພື້ນຖານໂຄງລ່າງ ແລະ ການບໍລິການ ເປັນຕົ້ນແມ່ນ ເສັ້ນທາງຍັງບໍ່ສະດວກ ສະເພາະແມ່ນ ເສັ້ນທາງລະຫວ່າງ ທ່າບົກ – ລ້ອງຊານ ແລະ ບາງເສັ້ນທາງໄປຫາແຫຼ່ງທ່ອງທ່ຽວ ທີ່ຍັງເປັນທາງແດງ, ສ່ວນຫຼາຍນັກທ່ອງທ່ຽວຈະຕ້ອງໄປດ້ວຍລົດສ່ວນຕົວ. ສະນັ້ນ, ຈື່ງເຮັດໃຫ້ຂະແໜງ ການທ່ອງທ່ຽວ ຂອງແຂວງຍັງບໍ່ທັນໂດດເດັ່ນເທົ່າທີ່ຄວນ. ປັດຈຸບັນ ຍ້ອນຄວາມຂາດເຂີນດ້ານເງີນ ທືນ ຈື່ງເຮັດໃຫ້ແຂວງຍັງມີສະຖານທີ່ ທີ່ມີທິວທັດທຳມະຊາດອັນສວຍສົດງົດງາມ ຍັງບໍ່ໄດ້ພັດທະນາໃຫ້ເປັນ ແຫຼ່ງທ່ອງທ່ຽວຖາວອນ.

ພວກເຮົາມາເບິ່ງກັນວ່າບັນດາສະຖານທີ່ທ່ອງທ່ຽວຂອງແຂວງໄຊສົມບູນມີຫຍັງແດ່ ແລະ ມີຄວາມເປັນມາແນວໃດ?

ຖ້ຳເຈົ້າອະນຸວົງ

ເປັນແຫຼ່ງທ່ອງທ່ຽວທາງປະຫວັດສາດ ເຊິ່ງຕັ້ງຢູ່ບ້ານພູຫົວຊ້າງ ຫ່າງຈາກເທດສະບານເມືອງ ອະນຸວົງໄປທາງທິດເໜືອ ຕາມເສັ້ນທາງຂື້ນພູເບ້ຍ ປະມານ 4 ກິໂລແມັດ, ເປັນຖ້ຳຫີນປູນທີ່ເກິດຈາກ ການສຽດເຊາະຂອງນ້ຳ ບໍລິເວນອ້ອມຮອບຖ້ຳນັ້ນຢັ່ງຢາຍໄປດ້ວຍສາຍພູ ນ້ອຍ-ໃຫຍ່ ມີສາຍນ້ຳຈ້າໄຫຼຜ່ານບໍລິເວນໜ້າປາກຖ້ຳກ່ອນຈະເຂົ້າເຖິງຖ້ຳ ເຊິ່ງປະກອບມີ 2 ຖ້ຳໃກ້ຄຽງກັນ: ຖ້ຳທີ່ໜື່ງ ມີຄວາມກວ້າງ ປະມານ 5 ແມັດ, ສູງ 3 ແມັດ ແລະ ມີຄວາມຍາວເລິກ ປະມານ 300 ແມັດ ຊຶ່ງຊາວບ້ານເລົ່າກັນວ່າ ເປັນບ່ອນພັກເຊົາຂອງເຈົ້າອະນຸວົງ ເພື່ອໃຊ້ ໃນການຫຼົບລີ້ສັດຕູ ໃນສະໄຫມສະຫຍາມຮຸກຮານລາວ; ຖ້ຳທີ່ສອງ ເປັນຖ້ຳກວ້າງປະມານ 5 ແມັດ ສູງ 5 – 7 ແມັດ ຊຶ່ງເປັນທີ່ພັກເຊົາຂອງກຳລັງທະຫານ ເຈົ້າອະນຸວົງ ແລະ ປັດຈຸບັນ ຍັງເຫຼືອຮ່ອງຮອຍຢູ່ ເປັນຕົ້ນແມ່ນ ເຄື່ອງໃຊ້ສອຍທົ່ວໄປ ແລະ ອາວຸດຕໍ່ສູ້ ຂອງເຫຼົ່າທະຫານກ້າທັງຫຼາຍ.

ພູສາມຫຼ່ຽມ

ເປັນພູທີ່ສູງອັນດັບສອງຂອງພູເບ້ຍ ແລະ ເປັນພູທີ່ງາມທີ່ສຸດ ຕັ້ງຢູ່ລະຫວ່າງກາງເມືອງອະນຸວົງ – ເມືອງທ່າໂທມ – ເມືອງບໍລິຄັນ (ແຂວງບໍລິຄັນໄຊ) ຫ່າງຈາກເທດສະບານແຂວງ ໄປທາງທິດຕາເວັນ ອອກ ປະມານ 24 ກິໂລແມັດ.  ສາຍພູມີລັກສະນະຄ້າຍຄືກັບຈອມທາດ, ບໍລິເວນຕີນພູບໍ່ນ້ຳຫຼາຍສາຍ ທີ່ໄຫຼອອກມາຈາກຮ່ອມພູ ແລະ ມີນ້ຳຕົກຕາດຄັງເຊ ຫຼືເອີ້ນວ່າ ນ້ຳຕົກຕາດຍ້ານຄັງເຊທີ່ສວຍສົດງົດງາມ.  ພູສາມຫຼ່ຽມ ເປັນພູທີ່ມີທຳມະຊາດສວຍງາມ ແລະ ອຸດົມສົມບູນ ທີ່ປັກຄຸມໄປດ້ວຍປ່າໄມ້ທີ່ມີຄຸນຄ່າ ເຊັ່ນ: ໄມ້ດູ່, ໄມ້ ແຄນ, ໄມ້ຍາງ ແລະ ອິກຫຼາຍຊະນິດ, ເທິງຈອມພູປົກຄຸມໄປດ້ວຍຫຍ້າຄາ ແລະ ພຶດຊີວະນາໆພັນ ທັງເປັນບ່ອນຢູ່ອາໄສຂອງສັດປ່າຫຼາຍຊະນິດ ເປັນຕົ້ນ ແມ່ນ: ໝີ, ເໝືອຍ, ເຍືອງ, ໝູປ່າ, ກວາງ, ຟານ, ທະນີ, ລີງ, ຂາແດງ ແລະ ສັດປະເພດອື່ນໆ.

ເມື່ອທ່ານຂື້ນໄປຮອດເທິງຈອມພູ ທ່ານຈະໄດ້ສຳພັດອາກາດເຢັນສະບາຍ ແລະ ມີລົມພັດ ຕະຫຼອດປີ ແລະ ຈະມີໝອກປົກຄຸມເປັນໄລຍະ ໃນຍາມເຊົ້າ. ນອກນັ້ນ ທ່ານຍັງໄດ້ຊົມວີວ ທີ່ໜ້າ ປະທັບໃຈ ສາມາດມອງເຫັນສາຍນ້ຳຂອງ, ຕົວເມືອງປາກຊັນທີ່ສວຍງາມ ແລະ ມອງຕາເວັນທີ່ໃກ້ຫຼັບ ຂອບຟ້າທີ່ງົດງາມ ຈົນບໍ່ຢາກກັບເລີຍ ກໍ່ວ່າໄດ້.

ພູພຣະດ່າງ

ພູພຣະດ່າງ ຕັ້ງຢູ່ບ້ານສັນປາຕອງ, ເມືອງລ້ອງຊານ ຫ່າງຈາກຕົວເມືອງ ປະມານ 30 ກິໂລແມັດ, ເປັນສະຖານທີ່ທ່ອງທ່ຽວທີ່ ທີ່ປະກອບໄປດ້ວຍ ຮ່ອງຮອຍທັງ ວັດທະນະທຳທາງພຸດທະສາສະໜາ ເທິງຈອມພູປະກອບມີ ພະ 5 ອົງ, ຊຶ່ງເປັນພະທີ່ຄວັດຂື້ນກ່ອນ ຄ.ສ ຮຸ່ງເຮືອງກຳອຳນາດ 500 ກວ່າປີມາແລ້ວ. ພະອົງໃຫຍ່ສຸດ ມີລວງກວ້າງປະມານ 80 ຊມ, ໜ້າປະມານ 10 ຊມ, ສູງປະມານ 1.20 ຊມ; ພະອົງນ້ອຍສຸດ ມີລວງກວ້າງປະມານ 40 ຊມ, ໜ້າປະມານ 10 ຊມ, ສູງປະມານ 80 ຊມ. ດ້ານຫຼັງຂອງພະ 5 ອົງ ບັງມີຫີນກ້ອນໃຫຍ່ສູງ 4 – 5 ແມັດ, ຍາວ 8 – 9 ແມັດ, ຊັບເປັນຮູບຜູ້ຍິງນອນປິ່ນໜ້າ ໄປທາງພູເຂົາຄວາຍ ເອີ້ນຈອມພູດັ່ງກ່າວວ່າ ພູນາງນອນ ຫຼື ເອີ້ນລວມພູດັ່ງກ່າວວ່າ ພູພຣະດ່າງ. ນອກນັ້ນ, ເທິງຈອມພູຍັງສາມາດມອງເຫັນທິວທັດທຳມະຊາດ ອັນສວຍງາມ ພ້ອມທັງມອງເຫັນ ເມືອງໂພນໂຮງ, ເມືອງແກ້ວອຸດົມ (ແຂວງວຽງຈັນ) ແລະ ເຂດ 516 (ເມືອງລ້ອງຊານ). ຫາກເປັນຍາມກາງຄືນຍັງສາມາດແນມເຫັນດອກໄຟຮຸ່ງມາຈາກນະຄອນຫຼວງວຽງຈັນ ອິກດ້ວຍ.

ນອກຈາກນີ້ ແຂວງໄຊສົມບູນຍັງມີແຫຼ່ງທ່ອງທ່ຽວອິກຫຼາຍບ່ອນ. ຫຼ້າສຸດ ແຂວງກໍ່ໄດ້ອະນຸມັດ ໃຫ້ບໍລິສັດເອກະຊົນເຂົ້າມາສຶກສາຄວາມເປັນໄປໄດ້ໃນການພັດທະນາສະຖານທີ່ທ່ອງທ່ຽວບາງແຫ່ງ ເຊິ່ງ ວັນທີ 5 ກັນຍາ 2018 ຢູ່ພະແນກແຜນການ ແລະ ການ ລົງທືນ ແຂວງໄຊສົມບູນ ໄດ້ເຊັ່ນບົດຍັນທຶກຄວາມເຂົ້າໃຈ MOU ກັບບໍລິສັດ ທີເອັສອີ ວິຊາການກໍ່ສ້າງ ຈຳກັດຜູ້ດຽວ ສຶກສາ – ສຳຫຼວດຄວາມເປັນໄປໄດ້ຂັ້ນເບື້ອງຕົ້ນ ໂຄງການພັດທະນາແຫຼ່ງທ່ອງທ່ຽວ ບໍ່ນ້ຳອຸ່ນ ບ້ານໜອງພູນໄຊ ເມືອງລ້ອງແຈ້ງ ແລະ ແຫຼ່ງ ທ່ອງທ່ຽວຖ້ຳເຈົ້າອະນຸວົງ ເມືອງອະນຸວົງ; ແລະ ວັນທີ່ 6 ກັນຍາ 2018 ກໍ່ໄດ້ເຊັ່ນບົດບັນທຶກຄວາມເຂົ້າໃຈ MOU ກັບກຸ່ມບໍລິສັດ ລ້ອງແຈ້ງພັດທະນາ ຈຳກັດ ໃນຄວາມເປັນ ໄປໄດ້ເບື້ອງຕົ້ນ ໂຄງການພັດທະນາແຫຼ່ງທ່ອງທ່ຽວປະຫວັດສາດ ສັນພູໝອກ, ພູຕະການ ອິກດ້ວຍ.