ອາເມຣິກາ ມີຜູ້ປ່ວຍພະຍາດປອດຈາກຢາສູບໄຟຟ້າກວ່າ 450 ຄົນ ເສຍຊີວິດແລ້ວ 6 ຄົນ

214

ກຸ່ມເຍົາວະຊົນ ໃນອາເມຣິກາ ສູບຢາໄຟຟ້າເພີ່ມຂຶ້ນຫຼາຍເມື່ອເດືອນຜ່ານມາ ລັດຖະບານກັງວົນ ຮ່ວມມືຫຼາຍໜ່ວຍງານຫາທາງແກ້ໄຂ ແລະ ຈຳກັດການຈຳໜ່າຍສິນຄ້າ ຂະນະທີ່ ຜູ້ປ່ວຍຫຼາຍກວ່າ 450 ຄົນ ເສຍຊີວິດແລ້ວ 6 ຄົນ.

ສຳນັກຂ່າວຕ່າງປະເທດລາຍງານຈາກນະຄອນນິວຢອກ ປະເທດສະຫະລັດ ອາເມຣິກາ ເມື່ອວັນພະຫັດ ທີ 12 ກັນຍາ ວ່າ ປັດຈຸບັນມີການລະບາດຂອງພະຍາດປອດທີ່ກ່ຽວຂ້ອງກັບຢາສູບອີເລັກໂທຣນິກ ຫຼື ຢາສູບໄຟຟ້າ ໃນສະຫະລັດ ມີຜູ້ປ່ວຍຫຼາຍກວ່າ 450 ຄົນ ເສຍຊີວິດແລ້ວ ຢ່າງໜ້ອຍ 6 ຄົນ ສ້າງຄວາມກັງວົນຕໍ່ໄພຂອງຢາສູບໄຟຟ້າຍິ່ງຂຶ້ນ ແລະ ເມື່ອອາທິດກ່ອນມິຊິແກນເປັນລັດທຳອິດ ທີ່ລະງັບການຂາຍສິນຄ້າຢາສູບໄຟຟ້າຊະນິດປຸງແຕ່ງກິ່ນ.

ເມື່ອວັນພຸດ ທີ 11 ກັນຍາ ຜ່ານມາ ລັດຖະບານສະຫະລັດ ໄດ້ດຳເນີນການ ປະກາດລະງັບການຊື້-ຂາຍຢາສູບໄຟຟ້າຊະນິດປຸງແຕ່ງກິ່ນ ແລະ ທ່ານໂດນັລ ທຣໍາ ປະທານາທິບໍດີສະຫະລັດ ໄດ້ຮຽກຮ້ອງໃຫ້ໜ່ວຍງານສາທາລະນະສຸກສືບຫາຕົ້ນຕໍ່ການແຜ່ລະບາດຂອງພະຍາດປອດທີ່ກ່ຽວຂ້ອງກັບຢາສູບໄຟຟ້າ.

ກະຊວງສາທາລະນະສຸກ ແລະ ການບໍລິການມະນຸດຂອງສະຫະລັດ (HHS: United States Department of Health and Human Services) ລະບຸວ່າ ອົງການອາຫານ ແລະ ຢາ (FDA: united states food and drug administration) ກຳລັງສະຫຼຸບນະໂຍບາຍໃຫ້ໄດ້ພາຍໃນສອງສາມອາທິດຈາກນີ້ ເພື່ອຢຸດຢັ້ງຕະຫຼາດຢາສູບໄຟຟ້າຊະນິດແຕ່ງກິ່ນທີ່ບໍ່ຮັບການຮັບຮອງ.

“ລັດຖະບານທຣໍາ ໄດ້ປະກາດຊັດແຈ້ງວ່າ ພວກເຮົາກຳລັງຈຳກັດຕະຫຼາດຢາສູບໄຟຟ້າຊະນິດແຕ່ງກິ່ນທີ່ແຜ່ຂາຍຫຼາຍໃນກຸ່ມເຍົາວະຊົນ ທີ່ສົ່ງຜົນກະທົບຕໍ່ເດັກນ້ອຍ, ຄອບຄົວ, ໂຮງຮຽນ ແລະ ຊຸມຊົນ ເຊິ່ງເປັນບັນຫາທີ່ວິຕົກກັງວົນຫຼາຍ” ທ່ານອາເລັກ ເອຊາ ລັດຖະມົນຕີກະຊວງສາທາລະນະສຸກ ແລະ ການບໍລິການມະນຸດ ກ່າວ. ແລະ ທ່ານໄດ້ກ່າວຕື່ມວ່າ ລັດຖະບານຈະບໍ່ປ່ອຍໃຫ້ຢາສູບອີເລັກໂທຣນິກເຫຼົ່ານີ້ ກາຍເປັນແຫຼ່ງຈູງໃຈໃຫ້ເຍົາວະຊົນ ໃຊ້ຢາສູບແບບຕໍ່ໄຟ ຫຼື ເສບຕິດສານນິໂຄຕິນ (Nicotine).

ຜູ້ຄົນສ່ວນຫຼາຍເຊື່ອວ່າ ຢາສູບໄຟຟ້າເປັນໂຕເລືອກທີ່ມີອັນຕະລາຍໜ້ອຍກວ່າຢາສູບທົ່ວໄປ ສາມາດເຕີມເຕັມຕາມຄວາມຕ້ອງການຂອງກຸ່ມເສບຕິດນິໂຄຕິນໄດ້ ແຕ່ຈຳນວນທີ່ເພີ່ມຂຶ້ນສູງເປັນປະຫວັດສາດຂອງການສູບຢາໄຟຟ້າ ໃນກຸ່ມເຍົາວະຊົນສະຫະລັດ ໄດ້ກະຕຸ້ນໃຫ້ຕ້ອງມີມາດຕະການເພື່ອຫຼຸດການຊົມໃຊ້ລົງ.

ສູນຄວບຄຸມ ແລະ ປ້ອງກັນພະຍາດ ຫຼື CDC: Centers for Disease Control and Prevention ພົບວ່າ ໃນປີ 2019 ນັກຮຽນມັດທະຍົມປາຍ 27,5% ສູບຢາໄຟຟ້າ ພາຍໃນເດືອນທີ່ຜ່ານມາ ເພີ່ມຂື້ນສູງຈາກ 20.8% ໃນປີ 2018.

ຢາສູບໄຟຟ້າຊະນິດແຕ່ງກິ່ນ ທີ່ໄດ້ຮັບຄວາມນິຍົມທີ່ສຸດໃນບັນດາໄວລຸ້ນ ຄືລົດຊາດໝາກໄມ້, ມິ້ນ ແລະ ເມນທອລ.

ທາງສູນຄວບຄຸມ ແລະ ປ້ອງກັນພະຍາດ ໄດ້ເຕືອນ ຜ່ານທາງເວບໄຊທ໌ວ່າ “ການໃຊ້ຢາສູບໄຟຟ້າທີ່ເປັນອັນຕະລາຍຕໍ່ເດັກນ້ອຍ, ໄວລຸ້ນ ແລະ ຄົນໜຸ່ມສາວ. ເຊິ່ງກຸ່ມໜຸ່ມສາວທີ່ສູບຢາໄຟຟ້າມີໂອກາດທີ່ຈະສູບຢາຫຼາຍກວ່າຄົນບໍ່ສູບໃນອະນາຄົດ”.

FDA ແລະ CDC ຮ່ວມກັບໜ່ວຍງານສາທາລະນະສຸກຂອງລັດ ແລະ ທ້ອງຖິ່ນ ກວດກາການແຜ່ລະບາດຂອງພະຍາດປອດຮ້າຍແຮງທີ່ກ່ຽວຂ້ອງກັບການສູບຢາໄຟຟ້າໃນຫຼາຍລັດ. ໂດຍ CDC ລະບຸໃນຖະແຫຼງການ ເມື່ອວັນພຸດ ທີ 11 ກັນຍາ ວ່າ “ການສືບສວນຍັງດຳເນີນຢູ່ຕໍ່ເນື່ອງ ເຖິງວ່າຍັງບໍ່ສາມາດລະບຸເຖິງສາເຫດໄດ້ ແຕ່ຜູ້ປ່ວຍທຸກຄົນລ້ວນແລ້ວມີປະຫວັດການສູບຢາໄຟຟ້າທັງໝົດ”.

Smoking E-Cigarette

ສະຖິຕິ ເມື່ອວັນທີ 6 ເດືອນກັນຍາ ຊີ້ໃຫ້ເຫັນວ່າ ມີຜູ້ປ່ວຍພະຍາດປອດທີ່ຄາດວ່າ ກ່ຽວຂ້ອງກັບການຢາສູບໄຟຟ້າ ຫຼາຍກ່ວາ 450 ຄົນ ຈາກ 33 ລັດ ໃນທົ່ວສະຫະລັດ ລວມທັງ 1 ເຂດ ໃນໝູ່ເກາະເວີຈິນ (Virgin Islands) ພ້ອມທັງມີຜູ້ເສຍຊີວິດແລ້ວ 6 ຄົນ ໃນລັດແຄລິຟໍເນຍ, ອິລລີນອຍ, ອິຍເດຍນາ, ແຄນຊັສ, ມິນນິໂຊດາ ແລະ ໂອຣິກອນ.

ອີກປະການໜຶ່ງ ໜ່ວຍງານດ້ານສາທາລະນະສຸກຂອງສະຫະລັດ ປະກາດແຈ້ງເຕືອນໃຫ້ລະມັດລະວັງການສູບຢາໄຟຟ້າ ຂະນະທີ່ ຍັງຢູ່ລະຫວ່າງການກວດກາ.