ອິໂດເນເຊຍ ວິກິດໜັກໄຟປ່າໃນ ສຸມາຕຣາ-ບໍນຽວ

189

ສະຖານະການໄຟໄໝ້ປ່າ “ປະຈຳປີ” ໃນປະເທດອິນໂດເນເຊຍ ໃນປີນີ້ ຍັງຮຸນແຮງຢູ່ເກາະສຸມາຕຣາ ແລະ ເກາະບໍນຽວ ໂຮງຮຽນຫຼາຍພັນແຫ່ງຕ້ອງປິດການຮຽນ-ການສອນຊົ່ວຄາວ ຂະນະທີ່ ໝອກຄັວນພິດລອຍປົກຄຸມຢູ່ທົ່ວທ້ອງຟ້າຂອງປະເທດໃກ້ຄຽງ ໂດຍສະເພາະປະເທດມາເລເຊຍ ແລະ ສິງກະໂປ.

ສຳນັກຂ່າວຕ່າງປະເທດລາຍງານຈາກນະຄອນຫຼວງຈາກາຕ້າ ປະເທດອິນໂດເນເຊຍ ເມື່ອວັນພະຫັດ ທີ 12 ກັນຍາ ວ່າ ສຳນັກງານປ້ອງກັນຈັດການໄພພິບັດອິນໂດເນເຊຍ (BNPB: Badan Nasional Penanggulangan Bencana or National Agency for Disaster Countermeasure) ອອກຖະແຫຼງການ ເມື່ອວັນພຸດ ພົບການເກີດປ່າເພິ່ມຂຶ້ນຫຼາຍກວ່າ 3.600 ຈຸດ ເທິງເກາະສຸມາຕຣາ ແລະ ເກາະບໍນຽວ ຕັ້ງແຕ່ຕົ້ນເດືອນນີ້ ສົ່ງຜົນກະທົບຕໍ່ປະຊາຊົນຫຼາຍກວ່າ 23 ລ້ານຄົນ ໃນ 6 ແຂວງເຊັ່ນ: ແຂວງຣີເຍົາ, ແຂວງຈຳບີ, ແຂວງສຸມາຕຣາໃຕ້, ແຂວງກາລີມັນຕັນ ຕາເວັນຕົກ, ແຂວງ ກາລີມັນຕັນ ກາງ ແລະ ແຂວງກາລີມັນຕັນ ຕາເວັນອອກສຽງໃຕ້. ຂະນະທີ່ ອຳນາດການປົກຄອງສູນກາງ ແລະ ທ້ອງຖິ່ນໄດ້ລະດົມ ກຳລັງເຈົ້າໜ້າທີ່ດັບເພີງຫຼາຍກວ່າ 9 ພັນຄົນ ເລັ່ງຄວບຄຸມສະຖານະການ ທີ່ສ້າງຄວາມເສຍຫາຍແລ້ວ ຫຼາຍກວ່າ 162.000 ເຮັກຕ້າ.

Firefighters spray water to extinguish brush fires in Kampar, Riau province, Indonesia, Wednesday, Sept. 11, 2019. Authorities shut most schools in parts of Indonesia’s Sumatra island to protect children from a thick, noxious haze as deliberately set fires burned through peatland forests, officials said Wednesday. (AP Photo)

ດ້ານທາງການແຂວງຣີເຍົາ ທີ່ຕັ້ງຢູ່ທາງທິດຕາເວັນອອກຂອງເກາະສຸມາຕຣາ ລາຍງານວ່າ ລະດັບຂອງມົນລະພິດທາງອາກາດໃນພື້ນທີ່ ໂດຍສະເພາະຢູ່ເມືອງເປີກັນບາຮູ ເຊິ່ງເປັນເມືອງເອກຂອງແຂວງ “ສູງເກີນເຂດອັນຕະລາຍ” ເຮັດໃຫ້ໂຮງຮຽນຫຼາຍພັນແຫ່ງໃນແຂວງຕ້ອງຢຸດການຮຽນການສອນ ຕັ້ງແຕ່ວັນອັງຄານ ຜ່ານມາ. ນອກຈາກນີ້, ໝອກຄັວນ ແລະ ຝຸ່ນລະອອງຈາກໄຟປ່າ ສົ່ງຜົນກະທົບໃຫ້ປຊາຊົນເກືອບ 300.000 ຄົນ ລົ້ມປ່ວຍດ້ວຍພະຍາດທີ່ກ່ຽວຂ້ອງກັບລະບົບທາງເດີນຫາຍໃຈ ຕັ້ງແຕ່ເດືອນມັງກອນ ຜ່ານມາ. ຂະນະດຽວກັນ ອີກ 5 ແຂວງ ເທິງເກາະສຸມາຕຣາ ປະກາດສະຖານະການສຸກເສີນຈາກໄຟປ່າ ຕັ້ງແຕ່ຕົ້ນປີນີ້ເປັນຕົ້ນມາ ເຊັ່ນດຽວກັບແຂວງຣີເຍົາ ເຊິ່ງເປັນຄວາມກັງວົນວ່າໄຟປ່າ ເລີ່ມລຸກລາມໄປພື້ນທີ່ບາງສ່ວນຂອງປ່າສະຫງວນແຫ່ງຊາດ “ເທສໂຊ ນິໂລ” ອາດຈະສົ່ງຜົນກະທົບຕໍ່ຊ້າງປ່າ ປະມານ 140 ໂຕ ທີ່ອາໄສຢູ່ໃນປ່າແຫ່ງນີ້.

ນອກຈາກນີ້, ໜ່ວຍງານບີເອັນພີບີ ໄດ້ກວດພົບ “ເຂດທີ່ມີຄວາມສ່ຽງ” ເກີດໄຟປ່າອີກຢ່າງໜ້ອຍ 5.062 ຈຸດ ທົ່ວປະເທດ ສະເພາະເມື່ອວັນພຸດນັ້ນ ສ່ວນໃຫຍ່ແມ່ນຢູ່ແຂວງກາລີມັນຕັນກາງ ແລະ ເຈົ້າໜ້າທີ່ດັບເພີງ ໃຊ້ນໍ້າແລ້ວ ຫຼາຍກວ່າ 240 ລ້ານລິດ ເພື່ອສະກັດກັ້ນບໍ່ໃຫ້ໄຟລຸກລາມຂະຫຍາຍເປັນພື້ນທີ່ກວ້າງ ຊ່ວຍໃຫ້ຈຸດທີ່ມີຄວາມສຽງຫຼຸດລົງ ເຫຼືອ 2.388 ຈຸດ ໃນຕອນບ່າຍຂອງວັນດຽວກັນ.