ລະດັບນ້ຳຂອງ​ ແລະ​ ນ້ຳເຊໂດນ​ ຫຼຸດລົງ ວັນຈັນ ທີ 9 ກັນຍາ 2019

219

ນັກຂ່າວແຂວງຈຳປາສັກລາຍງານ ເມື່ອ 7:00 ໂມງເຊົ້າ ວັນຈັນ ທີ 9 ກັນຍາ ກ່ຽວກັບລະດັບນ້ຳຂອງ​ ຢູ່ນະຄອນປາກເຊ​ ແຂວງຈຳປາສັກ ວັດແທກໄດ້​ 12,26 ແມັດ ທຽບໃສ່ເວລາ​ 22​:00 ໂມງຂອງວັນອາທິດ ທີ 8ກັນຍາ​ ຫຼຸດລົງ​ 17​ ຊັງຕີແມັດ. ແຕ່ຫາກທຽບໃສ່ເວລາ 6​:00 ໂມງ ຂອງເຊົ້າວັນອາທິດ ແມ່ນແທກໄດ້​ 12,81 ແມັດ ຫຼຸດລົງ​55 ຊັງຕີແມັດ.

ສ່ວນລະດັບນ້ຳເຊໂດນ​ ຈຸດບ້ານຄີລີ​ ເມືອງຊະນະສົມບູນ​ ແຂວງຈຳປາສັກ ແທກໄດ້​ 12,39 ແມັດ, ທຽບໃສ່ເວລາ​ 22​:00 ໂມງ​ ໃນວັນອາທິດ ທີ 8 ກັນຍາ ຫຼຸດລົງ​ 19​ ຊັງຕີແມັດ. ແຕ່ຫາກທຽບໃສ່ເວລາ 6​:00 ໂມງເຊົ້າ ຂອງວັນດຽວກັນ ແທກໄດ້ 13,18 ແມັດ ແມ່ນຫຼຸດລົງ 79 ຊັງຕີແມັດ.

ເຖິງວ່າລະດັບນໍ້າຂອງ ແລະ​ ລະດັບ​ນ້ຳເຊໂດນ​ ຈະຫຼຸດລົງ ແຕ່ວ່າລະດັບນ້ຳ ຍັງຢູ່ເຂດອັນຕະລາຍຢູ່. ສຳລັບເສັ້ນທາງເລກ ທີ​ 13​ ຢູ່ບໍລິເວນ ຫຼັກ​ 11-12​ ເມືອງຊະນະສົມບູນ​ນັ້ນ,​ ນ້ຳບົກ ແນ່ແລ້ວ​ ແຕ່ສະພາບເສັ້ນທາງເປ້ເພເສຍຫາຍ ເປັນຂຸມ,​ ປັດຈຸບັນ​ ພາກສ່ວນທີ່ກ່ຽວຂ້ອງກຳລັງປັບປຸງສ້ອມແປງ ຖ້າທ່ານໃດຈະສັນຈອນໄປມາ ໂດຍຜ່ານເສັ້ນທາງນີ້ ກໍ່ຂໍໃຫ້ມີສະຕິລະມັດລະວັງຕື່ມ.