7 ປະເທດ ລົງນາມຂໍ້ຕົກລົງຮ່ວມກັນເພື່ອປົກປ້ອງປ່າອະເມຊອນ

207

ຜູ້ນຳ ແລະ ຕົວແທນລະດັບສູງ ຈາກ 7 ປະເທດ ເຊິ່ງມີຊາຍແດນອ້ອມຮອບເຂດປ່າອະເມຊອນ ປະຊຸມຮ່ວມກັນທີ່ປະເທດໂຄລົມເບຍ ແລະ ບັນລຸຂໍ້ຕົກລົງເບື້ອງຕົ້ນ ໃນການຮ່ວມມືກັນປົກປ້ອງປ່າດົງດິບຊຸ່ມຊື່ນຂະໜາດໃຫຍ່ທີ່ສຸດຂອງໂລກແຫ່ງນີ້ ເຊິ່ງໃນປີນີ້ໄດ້ຜະເຊີນກັບໄຟໄໝ້ຢ່າງຮຸນແຮງເປັນປະຫວັດການ.

ສຳນັກຂ່າວຕ່າງປະເທດລາຍງານຈາກເມືອງເລຕິເຊຍ ປະເທດໂຄລົມເບຍ ເມື່ອວັນສຸກ ທີ 6 ກັນຍາ ວ່າ ປະເທດໂຄລົມເບຍ, ເປຣູ, ໂບລິເວຍ, ເອກວາດໍ, ກາຍອານາ, ຊູຣິນາມ ແລະ ບຣາຊິລ ຮ່ວມກັນລົງນາມໃນຂໍ້ຕົກລົງຈັດຕັ້ງພັນທະມິດປົກປ້ອງປ່າອະເມຊອນ ທີ່ເມືອງເລຕິເຊຍ ທາງພາກພາກໃຕ້ ຂອງປະເທດໂຄລົມເບຍ ເມື່ອວັນສຸກ ໂດຍເມືອງລາຕິເຊຍເປັນໜຶ່ງໃນເມືອງຂອງປະເທດໂຄລົມເບຍ ທີ່ອ້ອມຮອບໄປດ້ວຍປ່າອະເມຊອນ ຈຶ່ງມີຜູ້ແທນຂອງຊົນເຜົ່າທີ່ອາໄສຢູ່ໃນພື້ນທີ່ເຂົ້າຮ່ວມສັງເກດການ ພ້ອມທັງແລກປ່ຽນຄຳຄິດເຫັນໃນແຕ່ລະປະເດັນດ້ວຍ.

ທັງນີ້ ປະທານາທິບໍດີໂຄລົມເບຍ, ເປຣູ, ໂບລິເວຍ, ກາຍອານາ ແລະ ເອກວາດໍ ເຂົ້າຮ່ວມກອງປະຊຸມດ້ວຍຕົນເອງ ສ່ວນປະເທດຊູຣິນາມ ສົ່ງຮອງປະທານາທິບໍດີເດີນທາງມາແທນ ແລະ ທ່ານເອີເນຍໂຕ ອາໂຣ ລັດຖະມົນຕີກະຊວງການຕ່າງປະເທດບຣາຊິລ ເດີນທາງມາ ໃນຖານະທີ່ເປັນຕົວແທນຂອງປະທານາທິບໍດີຊາອີ ໂບລໂຊນາໂຣ ທີ່ເຂົ້າຮ່ວມການປະຊຸມຄັ້ງນີ້ ຜ່ານລະບົບວິດິໂອຄອລແທນ ເນື່ອງຈາກຕ້ອງກຽມສະພາບຮ່າງກາຍກ່ອນທີ່ຈະໄດ້ຮັບການຜ່າຕັດລຳໄສ້ ໃນອາທິດໜ້າ ໂດຍບຣາຊິລເປັນປະເທດທີ່ມີເນື້້ອທີ່ຄວບຄຸມເອົາປ່າອະເມຊອນກວ້າງທີ່ສຸດ 60% ເຊິ່ງປ່າມີເນື້ອທີ່ 5,5 ລ້ານຕາລາງກິໂລຕາແມັດ ແລະ ໄຟປ່າອະເມຊອນ ໃນບຣາຊິລ ຕັ້ງແຕ່ຕົ້ນປີນີ້ ເກີດຂື້ນຫຼາຍກວ່າ 95.500 ຈຸດ ເພີ່ມຂື້ນ 59% ເມື່ອທຽບໃສ່ໄລຍະດຽວກັນຂອງປີຜ່ານມາ ຂະນະທີ່ສະຖານະການໃນໂບລິເວຍ ແລະ ເປຣູ ກໍ່ຮ້າຍແຮງບໍ່ຕ່າງກັນ.

ເຖິງວ່າ ໃນຄວາມເປັນຈິງແລ້ວ ກຸ່ມປະເທດທີ່ມີເນື້້ອທີ່ປະເທດຄວບຄຸມປ່າອະເມຊອນ ພະຍາຍາມປົກປັກຮັກສາປ່າດົງດິບຊຸ່ມຊື່ນຂະໜາດໃຫຍ່ທີ່ສຸດຂອງໂລກແຫ່ງນີ້ ຮ່ວມກັນຕັ້ງແຕ່ປີ 1978 ແຕ່ຄວາມພະຍາຍາມດັ່ງກ່າວບໍ່ມີປະສິດທິຜົນຫຼາຍໃນທາງປະຕິບັດ ໂດຍອຸປະສັກຕົ້ນຕໍແມ່ນຂາດການລົງພື້ນທີ່ກວດກາຢ່າງຈິງຈັງຂອງໜ່ວຍງານທີ່ກ່ຽວຂ້ອງ ສົ່ງຜົນໃຫ້ຍັງມີການຖ່າງປ່າ ແລະ ການຕັດໄມ້ຢ່າງຕໍ່ເນື່ອງ ຂະນະທີ່ການປ່ຽນແປງຂອງສະພາບອາກາດທົ່ວໂລກເຊິ່ງຮຸນແຮງຂຶ້ນ ໃນທົດສະວັດທີ່ຜ່ານມາ ຍິ່ງເຮັດໃຫ້ສະຖານະການຍິ່ງຮ້າຍແຮງຂຶ້ນ. ຂະນະທີ່ປະທານາທິບໍດີອີວານ ດູເກ ຜູ້ນຳປະເທດໂຄລົມເບຍ ເຊິ່ງເປັນເຈົ້າພາບຈັດກອງປະຊຸມຄັ້ງນີ້  ກ່າວວ່າ ຈະນຳຜົນການຫາລືກັນລວມເຖິງການແປ່ງປັນຂໍ້ມູນ ແະ ເພີ່ມຄວາມຮ່ວມມືຂ້າມຊາຍແດນ ໃນການມອດໄຟປ່າອະເມຊອນ ໄປຕໍ່ຍອດໃນການປະຊຸມສະມັດຊາໃຫຍ່ສະຫະປະຊາຊາດ (UNGA: United Nations General Assembly) ທີ່ນະຄອນນິວຢອກ ໃນທ້າຍເດືອນນີ້ດ້ວຍ.