ອຸຕຸແຈ້ງ ພາກກາງ-ໃຕ້ ຍັງຈະມີຝົນຕົກ ຂະນະທີ່ ລະດັບນໍ້າໃນປາກຍັງເພິ່ມຂຶ້ນ

289

ສະຖານນະການນໍ້າຖ້ວມຢູ່ພາກໃຕ້ ຍັງບໍ່ທັນມີທ່າທີຈະຫຼຸດລົງ ເນື່ອງຈາກກົມອຸຕຸນິຍົມ ແລະ ອຸທົກກະສາດໄດ້ລາຍງານ ພະຍາກອນອາກາດຂອງ ປະຈໍາວັນທີ 05 ກັນຍາ 2019 ໂດຍໄດ້ລະບຸວ່າ: ຮ່ອງຄວາມກົດດັນອາກາດຕໍ່າໄດ້ພາດຜ່ານພາກເໜືອ ຫາ ພາກກາງ ຂອງປະເທດລາວ, ສົມທົບກັບລົມມໍລະສຸມຕາເວັນຕົກສ່ຽງໃຕ້ໄດ້ມີກຳລັງແຮງພັດປົກຄຸມພາກກາງ ແລະ ພາກໃຕ້, ເຊິ່ງຈະເຮັດໃຫ້ມີຝົນຕົກໃນລະດັບຄ່ອຍຢູ່ບາງທ້ອງຖິ່ນເຂດພາກເໜືອ ແລະ ຕົກປານກາງຫາຕົກໜັກ ແລະ ຕົກໜັກຫຼາຍ ຢູ່ແຂວງ ຄໍາມ່ວນ, ລົງຫາພາກໃຕ້ຕື່ມອີກ ພ້ອມຈະມີລົມພັດແຮງເປັນບາງໂອກາດຢູ່ບາງທ້ອງຖິ່ນ.

ຂະນະ, ລະດັບນໍ້າຂອງ ແລະ ບັນດານໍ້າສາຂາຍັງເພີ່ມຂຶ້ນ ໂດຍສະເພາະນໍ້າຂອງຢູ່ແຂວງຈຳປາສັກ, ໃນເວລາ 7 ໂມງ ຂອງວັນທີ 05 ກັນຍາ 2019 ແທກໄດ້ 13,75 ແມັດ ຂຶ້ນກາຍເຂດອັນຕະລາຍ (ເຂດອັນຕະລາຍ: 12 ແມັດ) ແລະ ລະດັບນໍ້າຂອງປາກເຊ ຍັງຈະສູງເຖິງ 13,92 ແມັດ ໃນວັນທີ 7 ກັນຍາ 2019.

ສ່ວນລະດັບນໍ້າສາຂາຍັງເພີ່ມສູງຂຶ້ນອີກເປັນຕົ້ນແມ່ນ ຂົວເຊ (ເຊບັ້ງໄຟ) ວັດແທກໄດ້ມື້ນີ້, 21,10 ແມັດ, ເຂດລະວັງໄພແມ່ນ 17,50 ແມັດ, ເຂດອັນຕະລາຍແມ່ນ 18,50 ແມັດ; ມະຫາໄຊ (ເຊບັ້ງໄຟ) ວັດແທກໄດ້ 15,36 ແມັດ, ເຂດລະວັງໄພແມ່ນ 14 ແມັດ, ເຂດອັນຕະລາຍ 15 ແມັດ.

ຂະນະທີ່, ລະດັບນໍ້າຢູ່ອັດຕະປື (ເວີນແຄນ) ວັດແທກໄດ້ 17,77 ແມັດ, ເພີ່ມຂຶ້ນ 1,47 ແມັດ ຈາກວັນທີ 4 ກັນຍາ ວັດແທກໄດ້ 16,30 ແມັດ ເຂດລະວັງໄພແມ່ນ 15 ແມັດ, ເຂດອັນຕະລາຍ 16 ແມັດ.

ສ່ວນເຊກອງ, ລະມາມ (ເຊກອງ) ວັດແທກໄດ້ 11,20 ແມັດ ຫຼຸດລົງ 4,3 ແມັດ ຈາກວັນທີ 4 ກັນຍາ, ເຊິ່ງເຂດລະວັງໄພແມ່ນ 17 ແມັດ, ເຂດອັນຕະລາຍແມ່ນ 18 ແມັດ; ຄົງເຊໂດນ (ເຊໂດນ) ວັດແທກໄດ້ 15,50 ແມັດ, ເຂດລະວັງໄພແມ່ນ 12,30 ແມັດ, ອັນຕະລາຍແມ່ນ 13,30 ແມັດ ແລະ ລະດັບນໍ້າຢູ່ ສາລະວັນ​ (ເຊໂດນ) ຫຼຸດລົງ 96 ຊັງຕີແມັດ ວັນທີ 4 ກັນຍາ ໄດ້ 12,15 ແມັດ, ມື້ນີ້ວັດແທກໄດ້ 11,19 ແມັດ, ເຊິ່ງເຂດລະວັງໄພແມ່ນ 10,50 ແມັດ, ເຂດອັນຕະລາຍແມ່ນ 11,50 ແມັດ.

ດັ່ງນັ້ນ, ຈຶ່ງແຈ້ງເຕືອນເຖິງອຳນາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໃສຢູ່ເຂດພາກກາງ ແລະ ພາກໃຕ້ ໃຫ້ສືບຕໍ່ກຽມພ້ອມຮັບມືກັບຝົນຕົກໜັກ, ລົມພັດແຮງ ແລະ ລະດັບນໍ້າຍັງຈະເພີ່ມສູງຂື້ນຕື່ມອີກ ເຊິ່ງຈະພາໃຫ້ເກີດມີນໍ້າຖ້ວມຊຸ, ຖ້ວມອັ່ງ ແລະ ດິນເຈື່ອນ. ພ້ອມນີ້, ຂໍໃຫ້ຕິດຕາມຂ່າວພະຍາກອນອາກາດ ແລະ ແຈ້ງເຕືອນໄພ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.