ໂຮງງານຜະລິດດອກໄມ້ໄຟລະເບີດ ໃນລັດປັນຈາບ ປະເທດອິນເດຍ

215

ເກີດເຫດໂຮງງານຜະລິດດອກໄມ້ໄຟ ແລະ ກະໂພກ ລະເບີດ ໃນລັດປັນຈາບ ທາງພາກເໜືອຂອງອິນເດຍ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 16 ຄົນ ບາດເຈັບ 15 ຄົນ.

ສຳນັກຂ່າວເອພີ ລາຍງານຈາກລັດປັນຈາບ ປະເທດອິນເດຍ ເມື່ອວັນພຸດ ທີ 4 ກັນຍາ ວ່າ ທ່ານມຸກເຕຍ ຊິງ ເຈົ້າໜ້າທີ່ຕຳຫຼວດລັດປັນຈາບທາງພາກເໜືອຂອງອິນເດຍ ເປີດເຜີຍວ່າ ມີຜູ້ເສຍຊີວິດຢ່າງໜ້ອຍ 16 ຄົນ ແລະ ອີກ 15 ຄົນໄດ້ຮັບບາດເຈັບຈາກເຫດລະເບີດຂອງໂຮງງານຜະລິດດອກໄມ້ໄຟ ແລະ ກະໂພກ ໃນເມືອງບາຕາລາ ລັດປັນຈາບ ເຊິ່ງຢູ່ຫ່າງຈາກນະຄອນຫຼວງນິວເດລີ ຂຶ້ນໄປທາງທິດເໜືອ 460 ກິໂລແມັດ ເມື່ອວັນພຸດ ທີ 4 ກັນຍາ ທາງເຈົ້າໜ້າທີ່ກູ້ໄພໄດ້ເລັ່ງປະຕິບັດການຄົ້ນຫາ ແລະ ກວດກາສະຖານທີ່ເກີດເຫດ.

ສ່ວນທ່ານດີພັກ ບາເຕຍ ເຈົ້າໜ້າຝ່າຍປົກຄອງຂອອງລັດປັນຈາບ ກ່າວວ່າ ສາເຫດຂອງການລະເບີດກຳລັງຢູ່ລະຫວ່າງການສືບສວນ ເຊິ່ງໄດ້ເກີດໄຟໄໝ້ລຸກລາມຫຼັງການລະເບີດ ຂະນະ ຕົວອາຄານຂອງໂຮງງານທີ່ກໍ່ດ້ວຍດິນຈີ່ ໄດ້ຮັບຄວາມເສຍຍຸບຕົວລົງ.

ການຜະລິດດອກໄມ້ໄຟ ແລະ ກະໂພກ ຖືເປັນທຸລະກິດຂະໜາດໃຫຍ່ໃນປະເທດອິນເດຍ ເພາະວ່າການຈູດດອກໄມ້ໄຟ ແລະ ກະໂພກມັກນໍາມາໃຊ້ໃນງານບຸນເທສະການ ແລະ ງານແຕ່ງດອງ ແຕ່ກໍ່ມີໂຮງງານທີ່ຕັ້ງຂື້ນແບບຜິດກົດໝາຍ ເພື່ອລັກລອບຈໍາໜ່າຍດອກໄມ້ໄຟ ແລະ ກະໂພກ ໃນລາຄາຖືກກວ່າໂຮງງານທີ່ຖືກຕ້ອງຕາມກົດໝາຍ.