ຄົງເຊໂດນ ນໍ້າຖ້ວມ ກວ່າ 60 ບ້ານ

212

ລາຍງານຈາກນັກທ່ອງທ່ອງຖິ່ນແຂວງ ສາລະວັນໃຫ້ຮູ້ວ່າ: ພາຍຫຼັງທີ່ມີການແຈ້ງເຕືອນຈາກກົມອຸຕຸນິຍົມ ແລະ ອຸທົກກະສາດ ກ່ຽວກັບກະກຽມຮັບມືກັບພາຍຸດີເປຼຊັນ ທີ່ພັດຜ່ານ ສປປ ລາວ ໃນລະຫວ່າງວັນທີ 2-6 ກັນຍານີ້. ຫຼ້າສຸດ, ພາຍຸດັ່ງກ່າວໄດ້ພັດຜ່ານເຂົ້າແຂວງສາລະວັນ ເສຍຫາຍຢ່າງໜັກ ເຮັດໃຫ້ເຮືອນຊານຂອງພໍ່ແມ່ປະຊາຊົນ ທີ່ຢູ່ຕາມເຂດແຄມແມ່ນ້ຳເຊໂດນ ໃນເຂດເທດສະບານເມືອງ ແລະ ແຂວງສາລະວັນ ໄດ້ຮັບຜົນກະທົບຢ່າງໜັກ ເຊັ່ນ: ບ້ານນາເຫຼັກ, ບ້ານວັດກາງ, ບ້ານໂພນບົກ, ໂພນແກ້ວ, ນາຍອງ, ເຕົ້າປູນ ແລະ ບ້ານອື່ນໆ ເນື່ອງຈາກນ້ຳໄດ້ຍື່ງຂຶ້ນຢ່າງໄວວາ ແລະ ຖ້ວມກະທັນຫັນໃນຕອນເຊົ້າວັນທີ 3 ກັນຍານີ້.

ປັດຈຸບັນ ຝົນຍັງສືບຕໍ່ຕົກຢ່າງໜັກ ເຮັດໃຫ້ຫຼາຍຄອບຄົວ ກະກຽມມ້ຽນເຄື່ອງຂອງຕ່າງໆບໍ່ທັນ ເຊັ່ນ: ເຄື່ອງໃຊ້, ພາຫະນະ ແລະ ອື່ນໆ. ນອກນັ້ນ, ລະດັບນໍ້າກໍຍິ່ງເພີ່ມຂຶ້ນເລື້ອຍໆ ເຊິ່ງບັນດາໜ່ວຍງງານຕ່າງໆ ກໍ່ໄດ້ລົງຊ່ວຍເຫຼືອຄອບຄົວປະຊາຊົນ, ເກັບກຳຂໍ້ມູນຄວາມເສຍຫາຍ ແລະ ມີການເຄື່ອນທີ່ປະຊາສຳພັນ ກ່ຽວກັບການຮັບມືໃນຄັ້ງນີ້ ເປັນຕົ້ນ: ດ້ານສາທາລະນະສຸກ ເພື່ອຕ້ານພະຍາດຕ່າງໆ ອາດຈະມານຳນ້ຳທີ່ເປີເປື້ອນ.

ສຳລັບບັນດາເມືອງທົ່ວແຂວງ ທີ່ມີຄວາມສ່ຽງຕໍ່ການເກີດນ້ຳຖ້ວມ ຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງ ໄດ້ລົງຕິດຕາມຢ່າງໃກ້ຊິດ ແລະ ໃຫ້ການຊ່ວຍເຫຼືອ, ທັງດ້ານກຳລັງແຮງ ແລະ ເຄື່ອງອຸປະໂພກ-ບໍລິໂພກ ໂດຍສະເພາະແມ່ນເມືອງຄົງເຊໂດນ ທີ່ໄດ້ຜົນກະທົບຢ່າງໜັກໜ່ວງ ເນື້ອທີ່ຖືກຖ້ວມແລ້ວທັງໝົດ 6.328 ເຮັກຕາ, ມີ 60 ກວ່າບ້ານ ແລະ ມີ 4.760 ຄອບຄົວ, ໜອງປາ 400 ກວ່າໜອງ ແລະ ເນື້ອທີ່ທຳການຜະລິດກໍ່ໄດ້ຜົນເສຍຫາຍຢ່າງໜັກ, ສ່ວນຂໍ້ມູນຄວາມເສຍຫາຍແມ່ນຈະໄດ້ເກັບກຳຢ່າງລະອຽດຕື່ມ.

Credit: ໜັງສືພິມສາລະວັນ