ຈີນເດີນໜ້າສົ່ງເສີມການທ່ອງທ່ຽວສີຂຽວ ເນັ້ນໃສ່ປະສົບການ ‘ໃຊ້ຊີວິດຢູ່ໃນປ່າ’

195

ທາງການຈີນ ກ່າວວ່າ ຈີນກຽມເລັ່ງພັດທະນາການທ່ອງທ່ຽວປ່າ ໂດຍເປີດໂອກາດໃຫ້ນັກທ່ອງທ່ຽວໄດ້ມີປະສົບການດ້ານການທ່ອງທ່ຽວທີ່ເປັນເອກະລັກສະເພາະ ບໍ່ວ່າຈະເປັນກີລາປະເພດຕ່າງໆທີ່ຫຼິ້ນຢູ່ເທິງພູ ຫຼື ການຟື້ນຟູ ແລະ ເບິ່ງແຍງດູແລຜູ້ສູງອາຍຸ.

ທ່ານເສີງ ຫົງ ເຈົ້າໜ້າທີ່ຫ້ອງການຄຸ້ມຄອງປ່າໄມ້ ແລະ ພື້ນທີ່ສີຂຽວ ກ່າວວ່າ “ການທ່ອງທ່ຽວແບບເບິ່ງທິວທັດ ແລະ ຖ່າຍຮູບນັ້ນ ບໍ່ກົງກັບຄວາມຕ້ອງການອີກຕໍ່ໄປຂອງຜູ້ບໍລິໂພກຊາວຈີນທີ່ມີຄວາມຊັບຊ້ອນຫຼາຍຂຶ້ນ ການທ່ອງທ່ຽວປ່າໄມ້ຄວນປ່ຽນຈາກການທ່ອງທ່ຽວທຳມະຊາດທົ່ວໄປມາເປັນການທ່ອງທ່ຽວແບບດຳລົງຊີວິດຢູ່ໃນປ່າ.

ທ່ານເສີງ ໄດ້ກ່າວໃນຖະແຫຼງຂ່າວເມື່ອບໍ່ດົນມານີ້ ວ່າ ຫ້ອງການຄຸ້ມຄອງປ່າໄມ້ຈະກຳນົດນະໂຍບາຍຕ່າງໆເພື່ອອຳນວຍຄວາມສະດວກໃຫ້ແກ່ໂຄງການຕ່າງໆເຊັ່ນ: ການສຶກສາກ່ຽວກັບທຳມະຊາດ, ຈັດທົວທ່ອງທ່ຽວພາຍໃຕ້ຮູບແບບການທ່ອງທ່ຽວແບບເຂດໜາວ ແລະ ຫິມະ ເປີດໂອກາດໃຫ້ນັກທ່ອງທ່ຽວມີປະສົບການໃຫ້ໄດ້ລົງເລິກ ແລະ ຄວາມຫຼາກຫຼາຍພາຍໃນປ່າໄມ້.

ທັງນີ້ ປ່າໄມ້ຂອງຈີນດຶງດູດນັກທ່ອງທ່ຽວຫຼາຍກວ່າ 900 ລ້ານຄົນ ໃນໄລຍະ 6 ເດືອນ ຕົ້ນປີ 2019 ເຊິ່ງເພີ່ມຂຶ້ນ 14% ເມື່ອທຽບປີຕໍ່ປີ ກວມເອົາ 30% ຂອງຈຳນວນນັກທ່ອງທ່ຽວທັງໝົດທົ່ວປະເທດ.

ການທ່ອງທ່ຽວປ່າສ້າງລາຍໄດ້ 850 ຕື້ຢວນ (ປະມານ 1,04 ລ້ານຕື້ກີບ) ໃນໄລຍະດັ່ງກ່າວ ເພີ່ມຂື້ນ 13% ເມື່ອທຽບປີຕໍ່ປີ.