ປັບຫຼຸດຄາລານໍ້າມັນ ເລີ່ມ 6 ໂມງເຊົ້າ ວັນອັງຄານ ທີ 3 ກັນຍາ 2019 ເປັນຕົ້ນໄປ

207

ເນື່ອງຈາກລາຄານໍ້າມັນດິບໃນຕະຫຼາດໂລກທີ່ມີການປັບຫຼຸດລົງ ໂດຍສະເພາະໃນອາເມຣິກາ ຕໍ່ຄວາມກັງວົນກັບພາຍຸເຮີຣິເຄນໂດຣຽນ (Dorian) ເຄື່ອນທີ່ພັດຜ່ານເຂົ້າຝັ່ງລັດຟລໍຣິດາ ແລະ ເພີ່ມຄວາມຮຸນແຮງເປັນເຮີຣິເຄນລະດັບ 4 ເຊິ່ງຈະສົ່ງຜົນກະທົບຕໍ່ຄວາມຕ້ອງການໃຊ້ນໍ້າມັນ ຈຶ່ງເຮັດໃຫ້ລາຄານ້ຳມັນມີການປັບຫຼຸດລົງ, ຂະນະທີ່ບ້ານເຮົາ ເປັນປະເທດນຳເຂົ້ານໍ້າມັນ ທາງກະຊວງອຸດສາຫະກໍາ ແລະ ການຄ້າກໍ່ໄດ້ມີການປັບຫຼຸດນໍ້າມັນລົງ.

ເມື່ອສະຖານະການຕະຫຼາດນໍ້າມັນມີການປັບຕົວລົງພາຍໃນປະເທດລາວ ກະຊວງອຸດສາຫະກຳ ແລະ ການຄ້າ ຈຶ່ງໄດ້ມີການປັບລົງລາຄານໍ້າມັນໜ້າປໍ້າ ໃນທົ່ວປະເທດ ເຊິ່ງການປັບລົງໃນຄັ້ງນີ້ແມ່ນແອັດຊັງພິເສດ 10 ກີບ/ລິດ; ແອັດຊັງທຳມະດາ 30 ກີບ/ລິດ ແລະ ການຊວນ 60ກີບ/ລິດ ໂດຍເລີ່ມປະຕິບັດນັບແຕ່ວັນທີ 03 ກັນຍາ 2019 ເວລາ 06:00 ໂມງເປັນຕົ້ນໄປ.

ຂະນະທີ່ລາຄາໜ້າປໍ້າປົກກະຕິໃນເມື່ອກ່ອນ ນະຄອນຫຼວງວຽງຈັນຂາຍແອັດຊັງພິເສດຢູ່ທີ່ 10.260 ກີບ/ລິດ ປັບລົງເປັນ 10.250 ກີບ/ລິດ, ແອັດຊັງທໍາມະດາ 8.940 ກີບ/ລິດ ປັບລົງເປັນ 8.910 ກີບ/ລິດ ແລະ ກາຊວນ 8.620 ກີບ/ລິດ ປັບລົງເປັນ 8.560 ກີບ/ລິດ.