ໄຊເຕສ ປະກາດຄຸ້ມຄອງ ຢີຣາບ ເປັນຄັ້ງທຳອິດ ໃນຮອບ 40 ປີ

141

ສະມາຊິກ “ໄຊເຕສ” ມີມະຕິເຫັນຊອບຂຶ້ນບັນຊີຄຸ້ມຄອງ ຢີຣາບ ເປັນຄັ້ງທຳອິດ ໃນຮອບ 4 ທົດສະວັດ ຂະນະທີ່ກອງປະຊຸມປີນີ້ ເຊິ່ງໄດ້ເພີ່ມຄວາມເຂັ້ມງວດຕໍ່ການຄ້າ ແລະ ຍົກລະດັບການຄຸ້ມຄອງສັດໃນອາຟຣິກາຫຼາຍຊະນິດ ສ້າງຄວາມບໍ່ພໍໃຈຢ່າງໜັກໃຫ້ແກ່ບັນດາປະເທດໃນພາກພື້ນ.

ສະມາຊິກ “ໄຊເຕສ” ມີມະຕິເຫັນຊອບຂຶ້ນບັນຊີຄຸ້ມຄອງ ຢີຣາບ ເປັນຄັ້ງທຳອິດ ໃນຮອບ 4 ທົດສະວັດ ຂະນະທີ່ກອງປະຊຸມປີນີ້ ເຊິ່ງໄດ້ເພີ່ມຄວາມເຂັ້ມງວດຕໍ່ການຄ້າ ແລະ ຍົກລະດັບການຄຸ້ມຄອງສັດໃນອາຟຣິກາຫຼາຍຊະນິດ ສ້າງຄວາມບໍ່ພໍໃຈຢ່າງໜັກໃຫ້ແກ່ບັນດາປະເທດໃນພາກພື້ນ.

ສຳນັກຂ່າວຕ່າງປະເທດລາຍງານຈາກເມືອງເຈນີວາ ປະເທດສະວິດເຊີແລນ ເມື່ອວັນພະຫັດ ທີ 29 ສິງຫາ ວ່າ ໃນກອງປະຊຸມສົນທິສັນຍາ ວ່າດ້ວຍການຄ້າລະຫວ່າງປະເທດກ່ຽວກັບ ຊະນິດສັດປ່າ ແລະ ພືດພັນປ່າ ທີ່ໃກ້ຈະສູນພັນ (CITES: Convention on International Trade in Endangered Species) ທີ່ເມືອງເຈນີວາ ເປັນເຈົ້າພາບໃນປີນີ້ ອອກຖະແຫຼງການເມື່ອວັນພຸດ ເຊິ່ງເປັນວັນສຸດທ້າຍຂອງກອງປະຊຸມ ທີ່ໃຊ້ເວລາເຖິງ 12 ວັນ ໂດຍການເປີດເຜີຍ ບັນຊີລາຍຊື່ສັດປ່າເພີ່ມເຂົ້າໃນບັນຊີຄຸ້ມຄອງ ເພື່ອຫຼຸດຄວາມສ່ຽງຕໍ່ການສູນພັນ ແລະ ບັນຊີຫ້າມຄ້າທີ່ມີການກຳນົດລະດັບຄວາມເຂັ້ມງວດ.

ທັງນີ້ ນັບຕັ້ງແຕ່ສົນທິສັນຍາເລີ່ມມີຜົນບັງຄັບໃຊ້ ເມື່ອປີ 1975 ແລະ ປັດຈຸບັນມີ 183 ລັດ ເຂົ້າຮ່ວມເປັນສະມາຊີກໄຊເຕສ ຂຶ້ນບັນຊີເພື່ອໃຫ້ການຄຸ້ມຄອງສັດປ່າ ແລະ ພືດພັນຫຼາຍກວ່າ 36.000 ສາຍພັນ ແລະ ສ້າງກົນໄກເພື່ອປ້ອງກັນໄພຄຸກຄາມສິ່ງມີຊີວິດເຫຼົ່ານີ້ ຕະລອດຈົນລະບົບນິເວດທີ່ຢູ່ອາໄສ ໂດຍມາດຕະການຂອງ ໄຊເຕສ ຖືວ່າມີຜົນບັງຄັບໃຊ້ພາຍໃຕ້ກົດໝາຍສາກົນ ໝາຍ ຄວາມວ່າ ການປະຊຸມສາມາດອອກມາດຕະການຂວໍ້າບາດ ຫຼື ລົງບັນຊີດຳ ຕໍ່ບັນດາສະມາຊິກທີ່ລະເມີດກົດລະບຽບຂອງໄຊເຕສ.

ສຳລັບການປະຊຸມໃນປີນີ້ ໄຊເຕສໄດ້ປະກາດໃຫ້ຄວາມຄຸ້ມຄອງສັດປ່າ ແລະ ພືດພັນ ລວມກວ່າ 500 ສາຍພັນ ທີ່ລວມເຖິງປາສະຫຼາມ 18 ສາຍພັນ, ແມງກະເບື້ອຫາງແສກ, ນາກໃຫຍ່ຂົນລຽບ, ແຮດ ແລະ ເຕົ່າແພນເຄກ ພ້ອມທັງເພີ່ມມາດຕະການຈຳກັດການຄ້າຂາຍລູກຊ້າງປ່າ. ຢ່າງໃດກໍ່ຕາມ, ມະຕິຂອງໄຊເຕສ ທີ່ທຸກຝ່າຍໃຫ້ຄວາມສົນໃຈຫຼາຍທີ່ສຸດໃນປີນີ້ ຄືການປະກາດຂຶ້ນບັນຊີຢີຣາບ ເຂົ້າໃນບັນຊີເລກ 2″ (Appendix II) ໂດຍລະບຸວ່າ ປະຊາກອນຢີຣາບທົ່ວໂລກຫຼຸດລົງຢ່າງຫຼວງຫຼາຍ ລະຫວ່າງ 30-40% ໃນໄລຍະ 3 ທົດສະວັດ ຜ່ານມາ ເຊິ່ງເຫຼືອບໍ່ຮອດແສນໂຕແລ້ວ ແລະ ຖືວ່າມີແນວໂນ້ມກາຍເປັນສັດ “ສູນພັນງຽບ” ການຈັດໃຫ້ຢີຣາບຢູ່ໃນບັນຊີເລກທີ 2 ໝາຍເຖິງການເພີ່ມການຄວບຄຸມການຂາຍຊິ້ນສ່ວນຂອງຢີຣາບ ບໍ່ວ່າຈະເປັນຊີ້ນ ແລະ ກະດູກ.

ກອງປະຊຸມໄຊເຕສ ໃນປີນີ້ ສ້າງສຽງວິຈານ ແລະ ການປະທ້ວງຢ່າງໜັກຈາກບັນດາປະເທດອາຟຣິກາ ໂດຍສະເພາະອາຟຣິກາໃຕ້, ຊິມບັບເວ ແລະ ບັອດສະວານາ ທີ່ກ່າວວ່າ ການຂຶ້ນບັນຊີຂອງ ໄຊເຕສ ໃນປີນີ້ “ກົດດັນ” ເສດຖະກິດຂອງອາຟຣິກາ ແລະ ຈະພິຈາລະນາເລື່ອງການຖອນຕົວອອກຈາກການເຂົ້າຮ່ວມສົນທິສັນຍາ.