ຍີ່ປຸ່ນ ສັ່ງອົບພະຍົບປະຊາຊົນເກືອບ 2 ລ້ານຄົນ ໜີຈາກຝົນຕົກໜັກ ໃນເກາະຄິວຊູ

152

ຝົນຕົກໜັກໃນເກາະຄິວຊູ ທາງພາກໃຕ້ສຸດຂອງປະເທດຍີ່ປຸ່ນ ເຮັດໃຫ້ເກີດນໍ້າຖ້ວມໃນຫຼາຍພື້ນທີ່ ແລະ ດິນເຈື່ອນລົງມາຈາກເທິງພູ ມີຜູ້ເສຍຊີວິດແລ້ວ 3 ຄົນ ເມື່ອວັນພຸດ ຜ່ານມາ ທາງການອອກຄໍາສັ່ງອົບພະຍົບປະຊາຊົນ ກວ່າ 900.000 ຄົນ ອອກຈາກບ້ານເຮືອນໃນເຂດທີ່ມີຄວາມສ່ຽງ ແລະ ຫຼາຍກວ່າ 1 ລ້ານຄົນ ໄດ້ຮັບ “ຄຳແນະນຳ” ໃຫ້ຍ້າຍໄປຢູ່ບ່ອນປອດໄພຊົ່ວຄາວ.

ສຳນັກຂ່າວຣອຍເຕີ ລາຍງານຈາກນະຄອນຫຼວງໂຕກຽວ ປະເທດຍີ່ປຸ່ນ ເມື່ອວັນພຸດ ທີ 28 ສິງຫາ ວ່າ ເຈົ້າໜ້າທີ່ທ້ອງຖິ່ນເປີດເຜີຍ ເມື່ອວັນພຸດ ວ່າ ຝົນທີ່ຕົກລົງມາຢ່າງໜັກໃນຫຼາຍພື້ນທີ່ຂອງເກາະຄິວຊູ ປະລິມານນໍ້າຝົນໃນໄລຍະ 2 ວັນ ລະຫວ່າງວັນທີ 27 – 28 ສິງຫາ ຫຼາຍກວ່າລະດັບສະເລ່ຍ ກວ່າ 2 ເທົ່າ ຕະຫຼອດເດືອນສິງຫາ ເຮັດໃຫ້ເກີດນໍ້າຖ້ວມກະທັນຫັນ, ລະດັບແມ່ນໍ້າຫຼາຍສາຍຍື່ງລົ້ນຝັ່ງ, ຖະໜົນຫົນທາງຖືກກະແສນໍ້າຕັດຂາດ ແລະ ລົດໄຟໂດຍສານຢຸດໃຫ້ບໍລິການ.

ຊາຍຄົນໜຶ່ງທີ່ເສຍຊີວິດ ຂະນະຂັບຂີ່ລົດໃຫຍ່ຢູ່ເທິງຖະໜົນຖືກກະແສນໍ້າພັດພາໄປ ໃນແຂວງຊາງະ ສ່ວນຊາຍອີກຄົນໜຶ່ງຖືກກະແສນໍ້າພັດສູນຫາຍ ແລະ ຖືກພົບເປັນສົບໃນເວລາຕໍ່ມາ ເນື່ອງມາຈາກຜູ້ເສຍຊີວິດພະຍາຍາມໜີອອກຈາກລົດທີ່ຖືກນໍ້າຖ້ວມຢູ່ເທິ່ງຖະໜົນ ໃນແຂວງຟຸກຸໂອກະ ແລະ ຜູ້ຍິງຄົນໜຶ່ງເສຍຊີວິດຢູ່ໃນລົດທີ່ຖືກກະແສນໍ້າພັດຕົກລົງໄປໃນແມ່ນໍ້າ ໃນແຂວງຊາງະ.

ສະຖານີໂທລະພາບ NHK ລາຍງານວ່າ ປະຊາຊົນຫຼາຍກວ່າ 900.000 ຄົນ ໃນເກາະຄິວຊູ ຖືກສັ່ງໃຫ້ອົບພະຍົບອອກຈາກບ້ານເຮືອນ ສ່ວນສໍານັກງານບໍລິຫານຈັດການໄພພິບັດ ແລະ ໜ່ວຍດັບເພີງຍີ່ປຸ່ນ ເຜີຍວ່າ ປະຊາຊົນຫຼາຍກວ່າ 1 ລ້ານຄົນ ໄດ້ຮັບຄໍາແນະນຳໃຫ້ຍ້າຍໄປຢູ່ບ່ອນປອດໄພຊົ່ວຄາວກ່ອນ.

ທາງດ້ານບໍລິສັດໂຕໂຍຕ້າ ມໍເຕີ້ ຄັອບ ໄດ້ສັ່ງໃຫ້ພັກວຽກ ເມື່ອແລງວັນພຸດ ທີ່ໂຮງງານແຫ່ງໜຶ່ງ ໃນເກາະຄິວຊູ ເຊິ່ງຜະລິດລົດຍີ່ຫໍ້ ເລັກຊັສ ຂະນະທີ່ບໍລິສັດໄດຮັສສຸ ມໍເຕີ ປະກາດຢຸດການຜະລິດ ໃນໂຮງງານຫຼາຍແຫ່ງຂອງເກາະຄິວຊູເຊັ່ນກັນ.