ໄພພິບັດທາງທຳມະຊາດ ກະທົບປະຊາຊົນຈີນ ກວ່າ 70 ລ້ານຄົນ ນັບແຕ່ເດືອນມິຖຸນາ ເປັນຕົ້ນມາ

149

ກະຊວງຈັດການເຫດສຸກເສີນຈີນ (MEM: Ministry of Emergency Management) ລາຍງານວ່າ ໄພພິບັດທາງທຳມະຊາດທີ່ເກີດຂື້ນເລື້ອຍໆ ລວມເຖິງອຸທົກກະໄພ ແລະ ພາຍຸໄຕ້ຝຸ່ນ ສົ່ງຜົນກະທົບຕໍ່ປະຊາຊົນໃນປະເທດຈີນ 71,8 ລ້ານຄົນ ນັບຕັ້ງແຕ່ເດືອນມິຖຸນາ ຜ່ານມາ.

ເມື່ອວັນພະຫັດ ທີ 22 ສິງຫາ ກະຊວງຈັດການເຫດສຸກເສີນຈີນ ຖະແຫຼງຂ່າວວ່າ ບ້ານເຮືອນ ແລະ ພື້ນທີ່ກະສິກໍາຂອງປະຊາົຊນ ທີ່ໄດ້ຮັບຄວາມເສຍຫາຍຈາກໄພພິບັດທາງທຳມະຊາດສ້າງຜົນກະທົບທາງເສດຖະກິດໂດຍກົງ 215.000 ລ້ານຢວນ (ປະມານ 264.400 ຕື້ກີບ) ຕັ້ງແຕ່ວັນທີ 1 ມິຖຸນາ 2019 ເປັນຕົ້ນມາ.

ພາຍຸຝົນ ແລະ ໄພນໍ້າຖ້ວມສ້າງຄວາມເສຍຫາຍຢ່າງໜັກໃນເຂດພາກໃຕ້ ຂະນະທີ່ ພາຍຸໄຕ້ຝຸ່ນໄດ້ສ້າງຄວາມເສຍຫາຍຢ່າງໃຫຍ່ຫຼວງຕໍ່ພາກຕາເວັນອອກຂອງປະເທດ.

ຈີນໄດ້ຈັດສັນງົບປະມານ 3.490 ລ້ານຢວນ (ປະມານ 4.290 ຕື້ກີບ) ຈາກງົບປະມານສ່ວນກາງໄປຊ່ວຍເຫຼືອເຂດທີ່ໄດ້ຮັບຜົນກະທົບຈາກໄພພິບັດ ເພື່ອບັນເທົາຄວາມເສຍຫາຍ ແລະ ສະໜັບສະໜູນການຟື້ນຟູຫຼັງເກີດໄພພິບັດ.

ຢ່າງໃດກໍ່ຕາມ, ກະຊວງຈັດການເຫດສຸກເສີນຈີນ ກ່າວວ່າ ຜົນກະທົບຂອງໄພພິບັດທາງທຳມະຊາດຄັ້ງນີ້ ຍັງໜ້ອຍ ກວ່າລະດັບສະເລ່ຍຂອງໄລຍະດຽວກັນ ໃນຮອບ 5 ປີ ຜ່ານມາ.