ລາຍງານຫຼ້າສຸດ ອຸບັດຕິເຫດລົດເມນັກທ່ອງທ່ຽວ ຕົກເຫວເສັ້ນທາງເມືອງນານ-ກາສີ ແຂວງຫຼວງພະບາງ

134

ເມື່ອບ່າຍ ວັນຈັນ ທີ 19 ສິງຫາ 2019 ຜ່ານມາ ເກີດເຫດເສົ້າສະຫຼົດ ເມື່ອລົດເມຂົນສົ່ງນັກທ່ອງທ່ຽວ ທີ່ເດີນທາງມາມີຜູ້ໂດຍສານທັງໝົດ 46 ຄົນ, ມີຜູ້ຊາຍ 22 ຄົນ. ໃນຈໍານວນນີ້ ມີຄົນຖືສັນຊາດຈີນ 44 ຄົນ, ຜູ້ຊາຍ 21 ຄົນ, ຄົນລາວ 2 ຄົນ, ຍິງ 1 ຄົນ ປີ້ນລົງເຫວຢູ່ເຂດຂົວນ້ຳງາວ ເມືອງນານ ແຂວງຫຼວງພະບາງ ເຮັດໃຫ້ມີຜູ້ເສຍຊີວິດຄາທີ່ 13 ຄົນ, ບາດເຈັບສາຫັດ 3 ຄົນ. ນອກນັ້ນ, ແມ່ນບາດເຈັບເລັກນ້ອຍ ຫຼັງຈາກເກີດເຫດເຈົ້າໜ້າທີ່ໄດ້ນຳສົ່ງໄປປີ່ນປົວຢູ່ໂຮງໝໍເມືອງນານ ແລະ ໂຮງໝໍແຂວງຫຼວງພະບາງ.

ພັນໂທ ບຸນສະຫວັດ ສົມພະໄຊ ຫົວໜ້າພະແນກຕໍາຫຼວດຈະລາຈອນ ກອງບັນຊາການປກສແຂວງຫຼວງພະບາງ ໃຫ້ສຳພາດວ່າ ຈຳນວນນັກທ່ອງທ່ຽວທີ່ຢູ່ເທິງລົດຄັນດັ່ງກ່າວ ແມ່ນທົວຈາກປະເທດຈີນ ຂະນະກຳລັງເດີນທາງອອກຈາກນະຄອນຫຼວງວຽງຈັນ ເພື່ອຈະກັບໄປປະເທດຈີນ ບໍ່ມາປະສົບເຫດເສົ້າສະຫຼົດດັ່ງກ່ວ. ພາຍຫຼັງທີ່ເຈົ້າໜ້າທີ່ໄດ້ຮັບການແຈ້ງວ່າມີອຸບັດຕິເຫດ ອົງການປົກຄອງແຂວງຫຼວງພະບາງ ໄດ້ສົ່ງກຳລັງທະຫານ, ຕໍາຫຼວດ ແລະ ຊາວໜຸ່ມບ້ານທີ່ອາໄສຢູ່ໃກ້ກັບຈຸດເກີດເຫດ ເລັ່ງເຂົ້າໃຫ້ການຊ່ວຍເຫຼືອເອົາຜູ້ບາດເຈັບ ແລະ ຜູ້ເສຍຊີວິດອອກຈາກລົດທັນທີ.

ເສັ້ນທາງທີ່ລົດເມນັກທ່ອງທ່ຽວປະສົບເຫດນັ້ນ ເປັນເສັ້ນທາງທີ່ໄດ້ຮັບການກໍ່ສ້າງໃໝ່ ນັບຕັ້ງແຕ່ເປີດການນຳໃຊ້ເສັ້ນທາງດັ່ງກ່າວ ກົມໂຍທາທິການ ແລະ ຂົນສົ່ງ ກໍ່ຄືທຸກພາກສ່ວນທີ່ກ່ຽວຂ້ອງ ໄດ້ອອກແຈ້ງການຫ້າມບໍ່ໃຫ້ລົດຂົນສົ່ງໂດຍສານ ແລະ ລົດບັນທຸກໜັກ ຫຼື ລົດທີ່ສະພາບເຕັກນິກບໍ່ຮັບປະກັນ ຊົມໃຊ້ເສັ້ນທາງດັ່ງກ່າວ ເພາະມີຄວາມສ່ຽງທີ່ຈະເກີດອຸບັດຕິເຫດຫຼາຍຈຸດ.