ອາເມຣິກາ ເລື່ອນເວລາແບນ ຫົວເຫວີ່ຍ ອອກໄປອີກ 90 ວັນ

128

ລັດຖະບານວໍຊິງຕັນ ອະນຸຍາດໃຫ້ບໍລິສັດຫົວເຫວີ່ຍຂອງຈີນ ສາມາດຄ້າຂາຍຮ່ວມກັບຜູ້ປະກອບການໃນອາເມຣິກາ ຕໍ່ໄດ້ອີກ 90 ວັນ ແຕ່ຂຶ້ນບັນຊີດຳ ສາຂາຍ່ອຍຂອງຫົວເຫວີ່ຍ ເພີ່ມອີກເກືອບ 50 ແຫ່ງ.

ສຳນັກຂ່າວຕ່າງປະເທດລາຍງານຈາກນະຄອນຫຼວງວໍຊິງຕັນ ປະເທດສະຫະລັດ ອາເມຣິກາ ເມື່ອວັນຈັນ ທີ 19 ສິງຫາ ວ່າ ທ່ານວິລເບີ ຮອສສ໌ ລັດຖະມົນຕີກະຊວງການຄ້າຂອງອາເມຣິກາ ໄດ້ຖະແຫຼງເມື່ອວັນຈັນ ເລື່ອງການຕໍ່ໄລຍະເວລາຜ່ອນຜັນໃຫ້ແກ່ບໍລິສັດ ຫົວເຫວີ່ຍ ເທັກໂນໂລຢີຂອງຈີນ ເພີ່ມອີກ 90 ວັນ ໃນການຄ້າ ແລະ ຈັດການເລື່ອງທຸລະກຳ ກັບ ບໍລິສັດຄູ່ຄ້າໃນສະຫະລັດ ຫຼັງກຳນົດ 90 ວັນ “ຮອບທຳອິດ” ໝົດອາຍຸ ເມື່ອວັນຈັນ ພໍດີ.

Wilbur Ross
ທ່ານວິລເບີ ຮອສສ໌ ລັດຖະມົນຕີກະຊວງການຄ້າຂອງອາເມຣິກາ

ທັງນີ້, ການຖະແຫຼງຢືນຢັນຂອງທ່ານຣອສສ໌ ທີ່ໝາຍຄວາມວ່າ ກະຊວງການຄ້າຂອງສະຫະລັດ ຈະໃຊ້ໄລຍະລະຫວ່າງການຜ່ອນຜັນໃນຄັ້ງນີ້ ສືບຕໍ່ພິຈາລະນາໃບອະນຸຍາດໃຫ້ແກ່ຜູ້ປະກອບການພາຍໃນປະເທດຕໍ່ໄປ ໃນການຄ້າ-ຂາຍ ແລະ ດຳເນີນທຸລະ ກິດກັບຫົວເຫວີ່ຍ ໂດຍເມື່ອໃດທີ່ການຮ່ວມມືນັ້ນ “ບໍ່ສ້າງຄວາມສ່ຽງ ແລະ ສົ່ງຜົນກະທົບຕໍ່ຄວາມໝັ້ນຄົງ” ແລະ ເພື່ອເປັນໄປຕາມໜຶ່ງໃນເງື່ອນໄຂຂອງ “ຂໍ້ຕົກລົງສະຫງົບສົງຄາມ” ລະຫວ່າງປະທານາທິບໍດີໂດນັລ ທຣຳ ຜູ້ນຳສະຫະລັດ ກັບ ປະທານປະເທດສີ ຈິ້ນຜິງ ຜູ້ນຳຈີນ ທີ່ໄດ້ພົບປະຫາລືກັນນອກຮອບ ລະຫວ່າງການປະຊຸມສຸດຍອດກຸ່ມປະເທດເສດຖະກິດຂະໜາດໃຫຍ່ “G 20” ທີ່ເມືອງໂອຊາກ້າ ປະເທດຍີ່ປຸ່ນ ເມື່ອທ້າຍເດືອນມິຖຸນາ ຜ່ານມາ ເຖິງວ່າ ທ່ານທຣໍາ ໄດ້ກ່າວເມື່ອທ້າຍອາທິດ ຜ່ານມາ ວ່າ ຕົນບໍ່ຕ້ອງການໃຫ້ອາເມຣິກາຮ່ວມຄ້າຂາຍກັບຫົວເຫວີ່ຍ “ຍ້ອນເຫດຜົນດ້ານຄວາມໝັ້ນຄົງ”.

ຢ່າງໃດກໍ່ຕາມ, ທ່ານຣອສສ໌ ກ່າວດ້ວຍວ່າ ເຖິງວ່າໄດ້ຂະຫຍາຍເວລາໃຫ້ ຫົວເຫວີ່ຍ ອີກ 90 ວັນ ແຕ່ລັດຖະບານວໍຊິງຕັນກໍ່ຈະເພີ່ມລາຍຊື່ບໍລິສັດທີ່ເປັນຕົວແທນ ຫຼື ຄູ່ສັນຍາຂອງຫົວເຫວີ່ຍ ອີກ 46 ແຫ່ງ ເຂົ້າໄປຢູ່ໃນບັນຊີດໍາດ້ວຍ ສົ່ງຜົນໃຫ້ຕອນນີ້ ລາຍຊື່ບໍລິສັດທີ່ກຽວຂ້ອງເຊິ່ງຢູ່ໃນບັນຊີດຳນັ້ນ ເພີ່ມຂຶ້ນຫຼາຍກວ່າ 100 ແຫ່ງແລ້ວ ຂະນະທີ່ ຫົວເຫວີ່ຍບໍ່ໄດ້ສະແດງທ່າທີໃດໆ.

ອີກປະການໜຶ່ງ ທ່ານທຣໍາ ໄດ້ລົງນາມໃນຄຳສັ່ງຝ່າຍບໍລິຫານ ເມື່ອວັນທີ 15 ພຶດສະພາ ຜ່ານມາ ປະກາດ “ສະຖານະການສຸກເສີນດ້ານເທັກໂນໂລຢີ” ເພື່ອປົກປ້ອງລະບົບເຄືອຂ່າຍອິນເຕີເນັດ ແລະ ເທັກໂນໂລຢີຂໍ້ມູນຂ່າວສານຂອງສະຫະລັດ “ຈາກການຮຸກຮານໂດຍສັດຕູ” ເຖິງວ່າ ຜູ້ນຳສະຫະລັດ ຢືນຢັນວ່າ ບໍ່ມີເຈດຕະນາທີ່ຈະແນເປົ້າໄປໃສ່ບໍລິສັດໃດໂດຍກົງ ແຕ່ທຸກຝ່າຍເຊື່ອວ່າ ນັ້ນຄືຄໍາສັ່ງທີ່ມີເປົ້າໝາຍແບນຫົວເຫວີ່ຍໂດຍກົງ ເຊິ່ງພັດທະນາຕົວເອງແບບກ້າວກະໂດດຂຶ້ນໄປເປັນບໍລິສັດລະດັບຕົ້ນໆຂອງໂລກ ຈາກໂຄງການພັດທະນາລະບົບເຄືອຂ່າຍ 5G ແລະ ອຸປະກອນດ້ານການສື່ສານ ໂທລະຄົມມະນາຄົມອີກຫຼາຍປະເພດ.