ລົດເມນັກທ່ອງທ່ຽວເສຍຫຼັກຕົກເຫວ ຢູ່ຫຼວງພະບາງ ເສຍຊີວິດ ແລະ ບາດເຈັບຈໍານວນຫຼາຍ

133

ມີຜູ້ເສຍຊີວິດຢ່າງໜ້ອຍ 13 ຄົນ ບາດເຈັບ 27 ຄົນ ຈາກເຫດລົດເມນັກທ່ອງທ່ຽວຕົກເຫວ ທີ່ບ້ານນາເມືອງ ເມືອງນານ ແຂວງຫຼວງນໍ້າພະບາງ ຂະນະທີ່ ສົບຜູ້ເສຍຊີວິດບາງສ່ວນຍັງບໍ່ສາມາດນໍາອອກມາໄດ້.

ອົງການກາງແດງລາວຂອງຫຼວງພະບາງ ລາຍງານຈາກ ເມື່ອວັນຈັນ ທີ 19 ສິງຫາ 2019 ວ່າ ເວລາ​ປະມານ 16:50​ ໂມງ ທາງອົງການໄດ້ຮັບແຈ້ງຈາກປະຊາຊົນ ວ່າ ເກີດອຸບັດຕິເຫດລົດໂດຍສານນຳສົ່ງນັກທ່ອງທ່ຽວຊາວຈີນ ເສຍຫຼັກຕົກເຫວຢູ່ບ້ານນາເມືອງ (ເທິງຂົວນໍ້າງ້າວ) ເມືອງນານ ແຂວງຫຼວງພະບາງ (ເສັ້ນທາງຕັດໃໝ່ກາສີ-ເມືອງນານ).

ເມື່ອໜ່ວຍກູ້ໄພຂອງອົງການດັ່ງກ່າວ ເດີນທາງໄປເຖິງຈຸດເກີດເຫດພົບເຫັນຄົນເຈັບສ່ວນໃຫຍ່ເປັນຄົນສັນຊາດຈີນ ຈໍານວນ 27 ຄົນ, ໃນຈໍານວນນີ້ ອາການສາຫັດ 3 ຄົນ, ແບ່ງເປັນຜູ້ຍິງ 2 ຄົນ ຫຼັງຈາກນັ້ນໄດ້ນໍາສົ່ງໄປໂຮງໝໍສາກົນລາວ-ຈີນ ແລະ ໂຮງໝໍແຂວງອີກຈຳນວນໜຶ່ງ.

ສ່ວນຜູ້ເສຍຊີວິດທີ່ສາມາດເຄື່ອນຍ້າຍອອກມາໄດ້ມີຈຳນວນ 8 ຄົນ, ເປັນຜູ້ຍິງ 6 ຄົນ ມີສັນຊາດຈີນທັງໝົດ ແລະ ຍັງມີຮ່າງຜູ້ເສຍຊີວິດທີ່ຕິດໃນຊາກລົດທີ່ຍັງບໍ່ສາມາດເຄື່ອນຍ້າຍອອກມາໄດ້ມີປະມານ 5-6 ສົບ.

ດັ່ງນັ້ນ,​ ເມື່ອເວລາ 00:00 ໂມງ ຂອງວັນອັງຄານ ທີ 20 ສິງຫາ 2019 ອາສາສະໝັກກູ້ໄພອົງການກາແດງລາວ ພ້ອມດ້ວຍທະຫານ, ຕຳຫຼວດ​ ແລະ ປະຊາຊົນ ໄດ້ຢຸດການຄົ້ນຫາເພາະວ່າບໍ່ສາມາດນໍາຜູ້ເສຍຊີວິດທີ່ຕິດໃນລົດອອກມາໄດ້ ເນື່ອງຈາກວ່າຕ້ອງໄດ້ລໍຖ້າລົດແມັກໂຄ ເຂົ້າມາເຄື່ອນຍ້າຍຊາກລົດໂດຍສານອອກເພື່ອຈະນໍາສົບຜູ້ເສຍຊີວິດອອກຈາກຊາກລົດດັ່ງກ່າວ.

ຂະນະທີ່ ໄກ້ນໍາທ່ຽວເຊິ່ງເປັນຊາວຈີນທີ່ໄດ້ຮັບບາດເຈັບບໍ່ຫຼາຍ ລະບຸວ່າ ມີຜູ້ໂດຍສານຢູ່ເທິງລົດ ທັງໝົດ 46 ຄົນ, ຍິງ 24 ຄົນ, ໃນນັ້ນ ເປັນຄົນສັນຊາດຈີນຈຳນວນ 44 ຄົນ, ຍິງ 23 ຄົນ, ຄົນລາວ 2 ຄົນ, ຍິງ 1 ຄົນ.