ຜູ້ນຳສິງກະໂປ ຊີ້ “ພາວະໂລກຮ້ອນຮ້າຍແຮງບໍ່ແຕກຕ່າງຈາກສົງຄາມ”

144

ນາຍົກລັດຖະມົນຕີປະເທດສິງກະໂປ ກ່າວວ່າ ພາວະໂລກຮ້ອນກໍາລັງເປັນສິ່ງທ້າທາຍຄັ້ງໃຫຍ່ສຳລັບຄົນ ບໍ່ແຕກຕ່າງຫຍັງຈາກການປ້ອງກັນສົງຄາມ ໂດຍປະເທດສິງກະໂປ ເຊິ່ງເປັນເຂດທົ່ງພຽງຕໍ່າຈໍາເປັນຕ້ອງເພິ່ມທະວີການກຽມຄວາມພ້ອມ ເຊິ່ງລວມທັງການທີ່ພາກລັດເພີ່ມງົບປະມານໃນໂຄງການກໍ່ສ້າງກໍາແພງກັນນໍ້າທະເລ.

ສຳນັກຂ່າວຕ່າງປະເທດລາຍງານຈາກປະເທດສິງກະໂປ ເມື່ອວັນຈັນ ທີ 19 ສິງຫາ ວ່າ ທ່ານນາຍົກລັດຖະມົນຕີລີ ຊຽນ ລຸງ ຜູ້ນຳ ປະເທດສິງກະໂປ ກ່າວເມື່ອວັນອາທິດ ວ່າ ການປ່ຽນແປງຂອງສະພາບອາກາດທົ່ວໂລກ ຫຼື ພາວະໂລກຮ້ອນ ກໍາລັງເປັນໜຶ່ງໃນ “ສິ່ງທ້າທາຍທີ່ຮ້າຍແຮງທີ່ສຸດຂອງມວນມະນຸດ” ເຊິ່ງສິງກະໂປໄດ້ຮັບຜົນກະທົບຈາກການປ່ຽນແປງດ້ານສິ່ງແວດລ້ອມດັ່ງກ່າວຢ່າງຕໍ່ເນື່ອງ ບໍ່ວ່າຈະເປັນອາກາດຮ້ອນຮຸນແຮງໃນລະດູຮ້ອນ ແລະ ຝົນທີ່ຕົກລົງຢ່າງໜັກ ໃນລະດູຝົນ ເຊິ່ງປະລິມານນໍ້າສະສົມໃນຫຼາຍພື້ນທີ່ ທຳລາຍສະຖິຕິໃນຫຼາຍປີທີ່ຜ່ານມາ.

ຂະນະດຽວກັນ ຜູ້ນຳສິງກະໂປ ກ່າວດ້ວຍວ່າ ດ້ວຍລັກສະນະພູມສາດຂອງປະເທດທີ່ເປັນເນື້ອທີ່ນ້ອຍ ແລະ ພື້ນທີ່ສ່ວນໃຫຍ່ຂອງເກາະເປັນພື້ນທີ່ທົ່ງພຽງຕໍ່າ ກໍ່ເປັນອີກໜຶງ “ໄພຄຸກຄາມທາງສິ່ງແວດລ້ອມ” ທີ່ສິງກະໂປໄດ້ຜະເຊີນມາເປັນເວລາດົນນານ ແລະ ປະຊາຊົນບໍ່ຄວນເບິ່ງຂ້າມ ນັ້ນຄື ລະດັບນໍ້າທະເລທີ່ສູງຂຶ້ນສວນທາງກັບພື້ນດິນທີ່ຍຸບໂຕລົງ ເຖິງວ່າລັດຖະບານໄດ້ຈັດການຮັບມືກັບສະຖານະການນີ້ມາຕະລອດ ດ້ວຍໂຄງການກໍ່ສ້າງກໍາແພງກັນນໍ້າທະເລ ແຕ່ສະພາບແວດລ້ອມທີ່ວິກິດຍິ່ງຂຶ້ນ ລັດຖະບານສິງກະໂປກຽມໃຊ້ງົບປະມານເພີ່ມອີກ ຢ່າງໜ້ອຍ 72.000 ລ້ານໂດລາ (ປະມານ 6,20 ແສນຕື້ກີບ) ເພື່ອການສ້າງກໍາແພງກັນນໍ້າທະເລຕາມແລວແຄມຝັ່ງທະເລ.

ທັງນີ້ ກົດໝາຍດ້ານການຄວບຄຸມອາຄານຂອງສິງກະໂປ ບັງຄັບໃຫ້ຜູ້ກໍ່ສ້າງຕຶກອາຄານຕ້ອງກໍ່ສ້າງອາຄານໃຫ້ສູງກວ່າ ຄວາມສູງສະເລ່ຍຂອງລະດັບນໍ້າທະເລຢ່າງໜ້ອຍ 3 ແມັດ ເພື່ອໃຫ້ເຫຼືອພື້ນທີ່ວ່າງຢ່າງໜ້ອຍ 1 ແມັດ ໄວ້ຮັບນໍ້າ ໃນກໍລະນີທີ່ເກີດນໍ້າຖ້ວມ. ນອກຈາກນີ້, ຜູ້ນຳປະເທດສິງກະໂປຍັງໄດ້ຍົກຕົວຢ່າງກ່ຽວກັບໂຄງສ້າງຂອງອາຄານຜູ້ໂດຍສານເບີ 5 ໃນສະໜາມບິນສາກົນຊາງງີ  ເຊິ່ງມີກຳນົດເປີດໃຫ້ບໍລິການ ໃນປີ 2030 ວ່າ ມີຄວາມສູງກວ່າລະດັບນໍ້າທະເລ 5 ແມັດ ກ່ອນປິດທ້າຍດ້ວຍວ່າ ທຸກໆພາກສ່ວນໃນສິງກະໂປຄວນໃຫ້ຄວາມສໍາຄັນກັບບັນຫາໂລກຮ້ອນໃນລະດັບທີ່ບໍ່ແຕກຕ່າງຈາກ “ໄພຄຸກຄາມທາງທະຫານ” ແຕ່ຄວາມແຕກຕ່າງກໍ່ຄືສົງຄາມແມ່ນສາມາດປ້ອງກັນໄດ້ ແຕ່ບັນຫາສິ່ງແວດລ້ອມນັ້ນ ຍັງມີປັດໄຈຫຼາຍຢ່າງ ທີ່ຢູ່ “ເໜືອການຄວບຄຸມ”.