ຈີນປະກາດ ຈະເລັ່ງພັດທະນາເຊິນເຈິ້ນ ໃຫ້ກາຍເປັນ “ເມືອງເສດຖະກິດໂລກ”

152

ລັດຖະບານຈີນໄດ້ປະກາດຮ່າງແຜນການພັດທະນາເມືອງເຊິນເຈິ້ນ ເຊິ່ງຕັ້ງຢູ່ກົງກັນຂ້າມກັບເກາະຮົ່ງກົງ “ໃຫ້ກາຍເປັນເມືອງແຫ່ງເສດຖະກິດໃໝ່” ທັງໃນລະດັບຊາດ ແລະ ລະດັບທົ່ວໂລກ ຂະນະທີ່ ສະຖານະການຄວາມວຸ້ນວາຍທາງດ້ານການເມືອງໃນຮົ່ງກົງຍັງຍືດເຍື້ອ.

ສຳນັກຂ່າວຕ່າງປະເທດລາຍງານຈາກນະຄອນຫຼວງປັກກິ່ງ ປະເທດຈີນ ເມືອວັນຈັນ ທີ 19 ສິງຫາ ວ່າ ຄະນະລັດຖະບານຈີນໄດ້ອອກຖະແຫຼງການ ເມື່ອວັນຈັນ ເປັນເອກະສານ 19 ຂໍ້ ຮ່າງແຜນຍຸດທະສາດ ວ່າດ້ວຍການພັດທະນາເມືອງເຊິນເຈິ້ນ ເຊິ່ງເປັນໜຶ່ງ ໃນເມືອງໃຫຍ່ຂອງມົນທົນກວາງຕຸ້ງ ທາງພາກໃຕ້ຂອງປະເທດຈີນ ຫ່າງຈາກໃຈກາງເຂດບໍລິຫານພິເສດຮົ່ງກົງ ພຽງ 30 ກິໂລແມັດເທົ່ານັ້ນ “ໃຫ້ມີຄວາມເຂັ້ມແຂງ ແລະ ໝັ້ນຄົງທາງເສດຖະກິດ ແລະ ພັດທະນາພາກສ່ວນອື່ນໆໃຫ້ເຕີບໃຫຍ່ຂຶ້ນອີກ”  ພ້ອມທັງກຳນົດເປົ້າໝາຍໃຫ້ເມືອງເຊິນເຈິ້ນ ເຊິ່ງພື້ນທີ່ສ່ວນໜຶ່ງໄດ້ຮັບການພັດທະນາໃຫ້ເປັນເຂດເສດຖະກິດພິເສດ ໃຫ້ຢູ່ອັນດັບຕົ້ນໆຂອງ “ເມືອງທີ່ດີທີ່ສຸດໃນໂລກ” ໃນປີ 2025 ແລະ ສາມາດເປັນໜຶ່ງໃນເມືອງທີ່ໃຊ້ເປັນມາດຕະຖານອ້າງອີງດ້ານຄວາມຈະເລີນທາງດ້ານເສດຖະກິດ ພາຍໃນໄລຍະກາງສະຕະວັດທີ 21 ດ້ວຍ.

ປັດຈຸບັນ ເມືອງເຊິນເຈິ້ນ ມີປະຊາກອນປະມານ 12,5 ລ້ານຄົນ ເປັນສະຖານທີ່ຕັ້ງຂອງສຳນັກງານໃຫຍ່ ບໍລິສັດດ້ານເທັກໂນໂລຢີ ແລະ ຂໍ້ມູນຂ່າວສານລາຍໃຫຍ່ຂອງຈີນຫຼາຍແຫ່ງ ລວມທັງບໍລິສັດຫົວເຫວີ່ຍ ແລະ ບັນດາບໍລິສັດດ້ານການລົງທືນຂະໜາດໃຫຍ່ເຊັ່ນ ເທັນເຊັນ (Tencent) ເປັນຕົ້ນ.

ທັງນີ້ ຄວາມເຄື່ອນໄຫວດັ່ງກ່າວຂອງລັດຖະບານຈີນ ເກີດຂຶ້ນ ໃນຂະນະທີ່ສະຖານະການການປະທ້ວງຕໍ່ຕ້ານລັດຖະບານຮົ່ງກົງທີ່ຍືດເຍື້ອມາດົນ ກວ່າ 2 ເດືອນ ແລະ ຍັງບໍ່ມີແນວໂນ້ມວ່າຈະຫຼຸດຜ່ອນຄວາມຕຶງຄຽດລົງ ເຖິງວ່າການເດີນຂະບວນໄປຕາມຖະໜົນ ເມື່ອທ້າຍອາທິດ ຜ່ານມາ ເຊິ່ງເປັນອາທິດທີ 11 ຂອງການປະທ້ວງກໍ່ເປັນໄປຢ່າງສະຫງົບ ຈຶ່ງເຮັດໃຫ້ທຸກຝ່າຍມີຄວາມສະບາຍໃຈຂຶ້ນກວ່າເກົ່າ. ຢ່າງໃດກໍ່ຕາມ, ກຳລັງຕຳຫຼວດປາບປາມຈະລາຈົນຂອຈີນ ຍັງປັກຫຼັກຢູ່ສະໜາມກີລາກາງ ຂອງເມືອງເຊິນເຈິ້ນ ຕັ້ງແຕ່ອາທິດ ຜ່ານມາ.