ຈີນເຮັດສຳເລັດ! ປ່ຽນທະເລຊາຍມົງໂກເລຍໃນ ໃຫ້ກາຍເປັນແຫຼ່ງກະສິກຳ

158

ໜ່ວຍງານທ້ອງຖິ່ນຂອງຈີນລາຍງານວ່າ ແນວທາງການປ່ຽນແປງຜືນແຜ່ນດິນທີ່ແຫ້ງແລ້ງໃຫ້ກາຍເປັນພື້ນທີ່ກະສິກຳທີ່ອຸດົມສົມບູນ ເຊິ່ງພັດທະນາໂດຍບັນດານັກວິທະຍາສາດຊາວຈີນ ປະສົບຜົນສຳເລັດຢ່າງສູງ ໃນພື້ນທີ່ທະເລຊາຍ ທາງພາກເໜືອຂອງປະເທດ.

ທີມນັກວິໄຈຈາກມະຫາວິທະຍາໄລສົງຊິ່ງ ນຳໂດຍສາສະດາຈານອີ້ຈື້ຈຽນ ອອກແບບດິນໜຽວທີ່ຜະລິດຈາກເຊລລູໂລສຂອງພືດ (Cellulose) ເຊິ່ງຊ່ວຍເຮັດໃຫ້ດິນຊາຍດູດຊຶມນໍ້າ, ແຮ່ທາດ ແລະ ອາກາດ.

ອົງການວິທະຍາສາດ ແລະ ເທັກໂນໂລຢີຂອງອັລຊາລີກ (Alxa League) ເຂດປົກຄອງຕົນເອງມົງໂກເລຍໃນ ລະບຸວ່າ ໄດ້ນໍາແນວທາງວິທີປ່ຽນຜືນດິນຂ້າງຕົ້ນໄປໃຊ້ກັບພື້ນທີ່ທະເລຊາຍອູລັນ ບູ (Ulan Buh Desert) ແລ້ວກວ່າ 266 ເຮັກຕ້າ ໂດຍທັງພັນພືດ, ຫຍ້າ, ຕົ້ນໄມ້ເປັນຟຸ່ມ ແລະ ສະໝຸນໄພ ນານາຊະນິດລ້ວນແລ້ວເຕີບໃຫຍ່ເປັນຢ່າງດີ.

ນອກຈາກນີ້, ທີມນັກວິໄຈຂອງທ່ານອີ້ ຈະຂະຫຍາຍການທົດລອງ ພ້ອມທັງຄັດເຟັ້ນພືດພັນຊະນິດຕ່າງໆ ທີ່ເໝາະສົມທີ່ສຸດ ສຳລັບການປູກດ້ວຍວິທີນີ້ເຊັ່ນກັນ.

ຕັ້ງແຕ່ປີ 2013 ຄະນະຜູ້ຊ່ຽວຊານທີມນີ້ ໄດ້ທົດລອງໃຊ້ວິທີການປ່ຽນແປງສະພາບດິນໃນເທສະບານນະຄອນສົງຊິ່ງ ທາງພາກຕາເວັນຕົກສຽງໃຕ້ຂອງຈີນ ເຊິ່ງມີສະພາບາກາດອົບອຸ່ນ ແລະ ຊຸ່ມຊື້ນ.

ຫຼັງຈາກນັ້ນ, ຈຶ່ງເລິ່ມການທົດລອງເທິງພື້ນດິນຊາຍ ຂະໜາດ 1,6 ເຮັກຕ້າ ໃນເຂດທະເລຊາຍອູລັນ ບູ ເມື່ອເດືອນມີນາ ປີ 2016 ເຊິ່ງໄດ້ຮັບປະສິດທິຜົນດີ.

ທ່ານອີ້ ກ່າວວ່າ ງົບປະມານທີ່ຕ້ອງໃຊ້ໃນການຫັນປ່ຽນທີ່ດິນຕໍ່ 1 ເຮັກຕ້າ ປະມານ 22.500-40.500 ຢວນ (ປະມານ 27,7-50 ລ້ານກີບ). ນອກຈາກນີ້, ດິນໜຽວດັ່ງກ່າວຍັງບໍ່ເປັນສານພິດ, ເປັນມິດກັບສິ່ງແວດລ້ອມ, ລາຄາປະຢັດ ແລະ ເໝາະສົມກັບຂະບວນການຜະລິດຈໍານວນຫຼາຍ.

 “ຂ້ອຍບໍ່ເຄີຍຝັນເລີຍວ່າ ຜັກ ແລະ ໝາກໄມ້ສົດ ຈະສາມາດປູກໄດ້ກັບສະພາບພື້ນທີ່ແບບນີ້” ນັກທ່ອງທ່ຽວທ່ານໜຶ່ງ ໃຫ້ສຳພາດ.

Credit: China Xinhua News