ຈີນ! ຜະລິດເຄື່ອງເອັກຊ໌ເຣສະໝອງ PET ແບບດິຈິຕອລ ທີ່ຖືກຕ້ອງ ແລະ ຊັດເຈນກວ່າເກົ່າ

130

ເມື່ອບໍ່ດົນມານີ້ ເຄື່ອງເອັກຊ໌ເຣໂພຊິຕຣອນ ອີມິສຊັ່ນ ໂທໂມກຣາຟີ (PET: Positron emission tomography) ຮູບແບບດິຈິຕອລ ເປັນໜ່ວຍທໍາອິດທີ່ຜະລິດໃນຈີນ ໄດ້ຖືກຕິດຕັ້ງຢູ່ໂຮງໝໍ ອັນດັບທີ 1 ໃນເຄືອມະຫາວິທະຍາໄລຊຸນຢັດເຊັນ (First Affiliated Hospital of Sun Yat-Sen University) ເມືອງກວາງໂຈ ມົນທົນກວ່າງຕົງ (ກວາງຕຸ້ງ) ທາງພາກໃຕ້ຂອງປະເທດ.

ທ່ານເຊ່ຍຊິ່ງກົ໋ວ ສາສະດາຈານດ້ານວິສະວະກຳຊີວະການແພດຂອງມະຫາວິທະຍາໄລວິທະຍາສາດ ແລະ ເທັກໂນໂລຢີຫົວຈົງ  ຜູ້ນຳທີມວິໄຈ ແລະ ພັດທະນາອຸປະກອນດັ່ງກ່າວ ມາເປັນເວລາດົນເຖິງ 19 ປີ ເຊື່ອວ່າ ອຸປະກອນເອັກຊ໌ເຣລັກສະນະນີ້ ເປັນໜ່ວຍທຳອິດຂອງໂລກ ທີ່ຖືກພັດທະນາຂຶ້ນມາ ສຳລັບການຖ່າຍຮູບສະໝອງໂດຍສະເພາະ ເພື່ອໃຊ້ວິນິດໄສ ແລະ ປິ່ນປົວພະຍາດທາງລະບົບປະສາດ ເຊັ່ນ ເນື້ອງອກໃນສະໝອງ ແລະ ພະຍາດພາກິນສັນ.

ທ່ານຈາງສຽງຊົງ ຫົວໜ້າແພດປະຈໍາພາກວິຊາເວດສາດນິວເຄຣຍຂອງໂຮງໝໍແຫ່ງນີ້ ກ່າວວ່າ “ຈາກການທົດລອງທາງຄລີນິກຫຼາຍຢ່າງ ເຄື່ອງເອັກຊ໌ເຣນີ້ ສະແດງໃຫ້ພວກເຮົາເຫັນຮູບພາບສ່ວນຕ່າງໆ ພາຍໃນສະໝອງຢ່າງຊັດເຈນ ທັງຮອຍນູນ gyrus ແລະ ຮ່ອງສະໝອງ (sulcus)”.

ຜົນການຖ່າຍພາບສະໝອງສະທ້ອນໃຫ້ເຫັນເຖິງຄວາມໄວ ທາງຊີວະເຄມີລະດັບສູງເປັນພິເສດຂອງລະບົບ ພີອີທີ ເຊິ່ງເຕັມໄປດ້ວຍຄວາມສາມາດໃນການສຳຫຼວດສະໝອງ ທາງວິທະຍາສາດ ແລະ ການສຶກສາພະຍາດທີ່ກ່ຽວກັບສະໝອງ.

ຜູ້ປ່ວຍຍິງ ອາຍຸ 30 ປີ ລາຍໜຶ່ງ ຈາກໂຮງໝໍເຊິ່ງໄດ້ຮັບການວິນິດໄສວ່າ ເປັນໂຣກພາກິນສັນ (Parkinson’s Disease) ໄດ້ຮັບການສະແກນສະໝອງດ້ວຍອຸປະກອນນີ້ “ການກວດພົບພະຍາດຮ້າຍດັ່ງກ່າວໄດ້ທັນທີ ພ້ອມທັງການປິ່ນປົວ ແລະ ໃຊ້ຢາຢ່າງຖືກຕ້ອງເໝາະສົມ ເຊິ່ງຈະຊ່ວຍສ້າງຄວາມຫວັງວ່າ ຜູ້ປ່ວຍຈະສາມາດມີຊີວິດຢູ່ໄດ້ຍືນຍາວທຽບເທົ່າກັບຄົນທີ່ມີສຸຂະພາບແຂງແຮງຄົນໜຶ່ງ” ທ່ານຈາງ ກ່າວ.