ຫວຽດນາມຂາຍຫຸ້ນກິດຈະການຂອງລັດ ເພີ່ມອີກ 93 ບໍລິສັດ

162

ລັດຖະບານຫວຽດນາມ ປະກາດແຜນການເລັ່ງໂຄງປະຕິຮູບລັດວິສາຫະກິດ ດ້ວຍການຂາຍຫຸ້ນບໍລິສັດຂອງລັດອີກ 93 ແຫ່ງ ໃນທ້າຍປີ 2020 ລວມທັງ ອະກຣິແບງ ເຊິ່ງເປັນທະນາຄານທີ່ໃຫຍ່ທີ່ສຸດຂອງປະເທດ.

ສຳນັກຂ່າວຣອຍເຕີ ລາຍງານຈາກນະຄອນຫຼວງຮ່າໂນ່ຍ ປະເທດຫວຽດນາມ ເມື່ອວັນສຸກ ທີ 16 ສິງຫາ ວ່າ ຫວຽດນາມກໍາລັງດໍາເນີນການຂາຍຫຸ້ນຫຼາຍບໍລິສັດຂອງລັດ ໃນໄລຍະບໍ່ຫຼາຍປີ ຜ່ານມາ ເພື່ອປັບປຸງທຸລະກິດຂອງບໍລິສັດ ແລະ ຫາເງິນເຂົ້າຄັງເງິນຂອງລັດ ແຕ່ການປະຕິບັດກໍ່ຍັງຊ້າກວ່າກໍານົດ.

ຖະແຫຼງການຂອງລັດຖະບານຫວຽດນາມ ເມື່ອຄືນວັນພະຫັດ ລະບຸວ່າ ລັດຖະບານວາງແຜນທີ່ຈະຂາຍຫຸ້ນບໍລິສັດທີ່ເປັນຂອງລັດ ຫຼື ລັດວິສາຫະກິດ ທັງໝົດ 93 ແຫ່ງ ພາຍໃນທ້າຍປີໜ້າ ໂດຍລວມເຖິງຫຸ້ນ 35% ຂອງອະກຣິແບງ (Agribank) ເຊິ່ງເປັນທະນາຄານທີ່ໃຫຍ່ທີ່ສຸດຂອງປະເທດ ໃນດ້ານຊັບສິນເມື່ອບໍ່ດົນມານີ້ ມີຊື່ເອີ້ນຢ່າງເປັນທາງການວ່າ ທະນາຄານເພື່ອດ້ານກະສິກຳ ແລະ ພັດທະນາຊົນນະບົດແຫ່ງຫວຽດນາມ (the Vietnam Bank for Agriculture and Rural Development)  ພ້ອມທັງຫຸ້ນຂອງບໍລິສັດຂຸດຄົ້ນຖ່ານຫີນຂະໜາດໃຫຍ່ຂອງຫວຽດນາມ (National Coal-Mineral Industries Holding Corp) ແລະ ບໍລິສັດຫວຽດນາມ ນັອດເທິນ ຟູດ ຄັອບ (Vietnam Northern Food Corp).

ອະກຣິແບງ ເຊິ່ງມີຊັບສິນລວມມູນຄ່າເກືອບ 56.000 ລ້ານໂດລາ (ປະມານ 487.000 ຕື້ກີບ) ໄດ້ເປີດເຜີຍ ເມື່ອອາທິດກ່ອນ ວ່າ ບໍລິສັດຄາດວ່າ ຈະໄດ້ກຳໄລກ່ອນເສຍພາສີ ໃນປີນີ້ ປະມານ 10 ພັນຕື້ດົ້ງ (ປະມານ 3.750 ຕື້ກີບ) ເພີ່ມຂຶ້ນ 32,9% ຈາກປີຜ່ານມາ.

ລັດຖະບານຫວຽດນາມ ກ່າວອີກວ່າ ຈະຂາຍຫຸ້ນ 50% ຂອງບໍລິສັດສື່ສານແບບໄຮ້ສາຍ ໂມບິໂຟນ ລວມທັງກຸ່ມບໍລິສັດໄປສະນີ ແລະ ໂທລະຄົມມະນາຄົມຫວຽດນາມ (Vietnam Posts and Telecommunications Group) ແລະ ກຸ່ມບໍລິສັດເຄມີແຫ່ງຊາດຫວຽດນາມ (Vietnam National Chemical Group).

ນອກຈາກນີ້, ລັດຖະບານຍັງຈະຂາຍຫຸ້ນ 100% ຂອງບໍລິສັດ Vietnam Paper Corp ພາຍໃນທ້າຍປີໜ້າ ແລະ 2 ບໍລິສັດຜະລິດໄຟຟ້າຂອງ Vietnam Electricity Group.