ນັກວິໄຈ ອົສຕຣາລີ ຈະຜະລິດສາຫຼ່າຍສີແດງ “ລ້ຽງງົວ” ເພື່ອຫຼຸດກ໊າຊມີເທນສູ່ຊັ້ນບັນຍາກາດ

156

ເມື່ອວັນພະຫັດ ທີ 15 ສິງຫາ ຜ່ານມາ ນັກວິໄຈຈາກປະເທດອົສຕຣາລີ ກ່າວວ່າ ພວກເຂົາກໍາລັງທົດລອງຜະລິດສາຫຼ່າຍສີແດງ ເປັນປະລິມານຫຼວງຫຼາຍ ເພື່ອໃຊ້ເປັນອາຫານໃຫ້ແກ່ງົວ ເນື່ອງຈາກວ່າ ພຶດຊະນິດດັ່ງກ່າວ ສາມາດຢຸດຢັ້ງບໍ່ໃຫ້ງົວປ່ອຍກ໊າຊມີເທນອອກສູ່ຊັ້ນບັນຍາກາດໄດ້.

ຄະນະນັກວິທະຍາສາດຈາກມະຫາວິທະຍາໄລຊັນຊາຍນ໌ ໂຄສ (University of the Sunshine Coast) ກ່າວວ່າ ພວກເຂົາສາມາດຜະລິດສາຫຼ່າຍສີແດງໄດ້ເປັນປະລິມານຫຼາຍພຽງພໍ ສຳລັບງົວທັງໝົດໃນປະເທດອົສະຕຣາລີ ເຊິ່ງຈະສົ່ງຜົນໃຫ້ພາຍໃນປະເທດສາມາດຫຼຸດຜ່ອນການປ່ອຍອາຍພິດ ຫຼື ກ໊າຊເຮືອນແກ້ວໄດ້ເຖິງ 10%.

ພຶດຊະນິດນີ້ ມີຊື່ວ່າ Asparagopsis ເຕີບໂຕຕາມທໍາມະຊາດຕະຫຼອດແລວແຄມຝັ່ງລັດຄວິນສ໌ແລນ ປະເທດອົສຕຣາລີ ເຊິ່ງທົ່ວໂລກຕ່າງກໍ່ໃຫ້ຄວາມສົນໃຈກ່ຽວກັບຄຸນປະໂຫຍດຂອງພຶດຊະຄະນິດນີ້. ແຕ່ຢ່າງໃດກໍ່ຕາມ, ຍັງບໍ່ທັນເຊັດເຈນວ່າ ຈະສາມາດຜະລິດສາຫຼ່າຍຊະນິດນີ້ ເປັນປະລິມານມະຫາສານ ໄດ້ ຫຼື ບໍ່.

ຮອງສາສະດາຈານ ດຣ.ນິກ ພອລ ຜູ້ນໍາກຸ່ມວິໄຈສາຫຼ່າຍຂອງມະຫາວິທະຍາໄລຊັນຊາຍນ໌ ໂຄສ ລະບຸວ່າ ສາຫຼ່າຍຊະນິດນີ້ ສາມາດສ້າງປະໂຫຍດໃຫ້ກັບທົ່ວໂລກໄດ້ຢ່າງມະຫາສານ ແລະ ທົ່ວໂລກ ຕ່າງກໍ່ກໍາລັງວິໄຈ ເພື່ອຮັບຮອງວ່າ ງົວຈະມີສຸຂະພາບແຂງແຮງດີ ລວມເຖິງຊີ້ນ ແລະ ນົມ ເຊິ່ງການຈະໃຊ້ວິທີດັ່ງກ່າວໃຫ້ມີປະສິດທິຜົນໃນລະດັບໂລກນັ້ນ ຈຳເປັນຈະຕ້ອງໝັ້ນໃຈວ່າ ສາມາດຜະລິດສາຫຼ່າຍຊະນິດນີ້ໄດ້ແບບຍືນຍົງ.

ທ່ານພອລ ກ່າວວ່າ ເມື່ອໃດທີ່ສາມາດຜະລິດໄດ້ເປັນຈຳນວນຫຼວງຫຼາຍ ແລະ ສໍາເລັດດ້ວຍດີ ງົວກໍ່ອາດຈະບໍ່ມີບັນຫາໃນການປັບຕົວເຂົ້າກັບອາຫານໃໝ່ ເພາະສາຫຼ່າຍເປັນອາຫານທີ່ງົວມັກກິນຢູ່ແລ້ວ ພວກມັນອາດຈະຍ່າງລົງໄປແຄມຫາດຊາຍ ແລະ ກໍ່ຍ່າງເລາະກິນສາຫຼ່າຍໄປນໍາ.