ແຂ້ນໍ້າເຄັມ ລາກເດັກນ້ອຍຟີລິບປິນ ລົງຈາກເຮືອໄປກິນ

138

ເດັກຊາຍ ອາຍຸ 10 ປີ ຊາວຟີລິບປິນ ທີ່ນັ່ງເຮືອພາຍໄປກັບອ້າຍ 2 ຄົນ ໃນເມືອງບາລາບັກ ທາງພາກໃຕ້ ຖືກແຂ້ນໍ້າເຄັມ ໂດດຄາບເອົາຮ່າງຂອງຜູ້ເຄາະຮ້າຍລົງຈາກເຮືອໄປໃນນໍ້າ ເຊິ່ງຊາວບ້ານພົບສົບໃນວັນຕໍ່ມາ ໂດຍສະພາບສົບຖືກກິນໄປເຄິ່ງໂຕ.

ສໍານັກຂ່າວເອເອັຟພີ ລາຍງານຈາກນະຄອນຫຼວງມະນີລາ ປະເທດຟີລິບປິນ ເມື່ອວັນພຸດ ທີ 14 ສິງຫາ ວ່າ ເດັກຊາຍຟີລິບປິນອາຍຸ 10 ປີ ຖືກແຂ້ຄາບລາກລົງຈາກເຮືອ ຂະນະນັ່ງເຮືອໄປກັບອ້າຍສອງຄົນ ໃນເມືອງບາລາບັກ ແຂວງປາລາວັນ ເຊິ່ງເປັນເຂດທີ່ມີຊື່ສຽງເປັນບ່ອນອາໄສຂອງແຂ້ຈໍານວນຫຼາຍ ແລະ ດຸຮ້າຍມັກໂຈມຕີຄົນເປັນປະຈຳ ເຈົ້າໜ້າທີ່ຕຳຫຼວດທ້ອງຖິ່ນເປີດເຜີຍວ່າ ເຫດການດັ່ງກ່າວເກີດຂື້ນ ເມື່ອວັນອາທິດ ທີ 11 ສິງຫາ ຜ່ານມາ ພໍ່ ແລະ ຊາວບ້ານໄດ້ພະຍາຍາມຊອກຫາລູກຊາຍຕະຫຼອດຄືນ  ແຕ່ກໍ່ບໍ່ພົບ ຈົນຫຼ້າສຸດມີຊາວປະມົງຄົນໜຶ່ງໄດ້ພົບສົບຂອງເດັກຊາຍຜູ້ເຄາະຮ້າຍ ສະພາບຖືກກິນເຄິ່ງໂຕ ໃນບຶງປ່າໂກງກາງ ເມື່ອບ່າຍວັນຈັນ.

ການພັດທະນາ ແລະ ການຂະຫຍາຍຕົວຂອງປະຊາກອນຟີລິບປິນ ທີ່ຮຸກຮານບ່ອນຢູ່ອາໄສຂອງແຂ້ຢ່າງຕໍ່ເນື່ອງ ແລະ ເຮັດໃຫ້ແຂ້ມີຄວາມໃກ້ຊິດກັບມະນຸດ ຈຶ່ງສົ່ງຜົນໃຫ້ເກີດການຜະເຊີນ​​ໜ້າກັນ ໂດຍມັກເກີດເຫດແຂ້ໂຈມຕີທຳຮ້າຍ ແລະ ກິນຄົນ ຢູ່ເລື້ອຍໆ.

ທ່ານໂຈວິຊ ພາເບລໂລ ໂຄສົກຄະນະກຳມະການອະນຸລັກສິ່ງແວດລ້ອມ ຂອງໝູ່ເກາະປາລາວັນ ກ່າວວ່າ ນັບແຕ່ປີ 2015 ເກີດເຫດແຂ້ໂຈມຕີທໍາຮ້າຍຄົນທຸກປີ ຄວາມຂັດແຍ່ງດັ່ງກ່າວເກີດຈາກການໃຊ້ນໍ້າ.

ທ່ານພາເບລໂລ ກ່າວວ່າ ໃນເດືອນກຸມພາ ປີນີ້ ເດັກຊາຍອາຍຸ 12 ປີ ຖືກແຂ້ກັດຮ່າງກາຍ ຂະນະທີ່ກໍາລັງລອຍນໍ້າໃນແມ່ນໍ້າມາລາບັກ ແຕ່ລອດຊີວິດໄດ້ ເນື່ອງຈາກອ້າຍຂອງລາວໃຊ້ໄມ້ຟາດຫົວມັນຫຼາຍຄັ້ງ ຈົນແຂ້ປ່ອຍ ແລະ ເດືອນກຸມພາ ປີຜ່ານມາ ຊາວບ້ານໃນເມືອງບາລາບັກ ເປັນຊາຍຜູ້ໜຶ່ງທີ່ອອກໄປຊອກຫາກະປູ ຢູ່ຫາດຊາຍທະເລ ຖືກແຂ້ທໍາຮ້າຍເສຍຊິດ ແລະ ພົບສົບກິນເຫຼືອເຄິ່ງໂຕ ໂດຍ 3 ເດືອນ ກ່ອນໜ້ານັ້ນ ຫຼານສາວອາຍຸ 12 ປີ ຂອງຊາຍຜູ້ເສຍຊີວິດດັ່ງກ່າວ ກໍ່ຖືກແຂ້ລາກລົງໄປໃນນໍ້າ ແລະ ຍັງບໍ່ພົບສົບມາຈົນເຖິງປະຈຸບັນ.