ເສດຖະກິດສິງກະໂປ ຄາດຈະຖົດຖອຍ ໃນປີນີ້

150

ລັດຖະບານສິງກະໂປ ປັບຫຼຸດແນວໂນ້ມການເຕີບໂຕທາງເສດຖະກິດຂອງປະເທດໃນປີນີ້ລົງເຫຼືອ ລະຫວ່າງ 0% – 1% ຍ້ອນປັດໃຈພາຍນອກນັ້ນ “ມີການຜັນຜວນຢ່າງຮຸນແຮງ” ບໍ່ວ່າຈະເປັນສົງຄາມການຄ້າ ແລະ ສະຖານະການໃນຮົງກົງ.

ສຳນັກຂ່າວຕ່າງປະເທດລາຍງານຈາກປະເທດສິງກະໂປ ເມື່ອວັນອັງຄານ ທີ 13 ສິງຫາ ວ່າ ກະຊວງການຄ້າສິງກະໂປໄດ້ອອກຖະແຫຼງການ ເມື່ອວັນອັງຄານ ປັບຫຼຸດປະມານການເຕີບໂຕຂອງເສດຖະກິດໃນປະເທດຕະຫຼອດປີນີ້ ຈາກປົກກະຕິລະຫວ່າງ 1,5% – 2,5% ເຫຼືອລະຫວ່າງ 0% – 1% ເນື່ອງມາຈາກ “ຄວາມຜັນຜວນຢ່າງໜັກ” ທີ່ມີຕໍ່ຄວາມຕ້ອງການທາງຕະຫຼາດຂອງພາກການຜະລິດທີ່ສຳຄັນໃນສິງກະໂປ ຈະຍິ່ງສົ່ງຜົນກະທົບຕໍ່ແນວໂນ້ມການເຕີບໂຕທາງດ້ານເສດຖະກິດຂອງປະເທດ ຫຼາຍກວ່າໄລຍະ 6 ເດືອນຕົ້ນປີ ຜ່ານມາ ສ່ວນອັດຕາການເຕີບໂຕທາງດ້ານເສດຖະກິດຂອງປະເທດໃນໄຕມາດທີ 2 ຂອງປີນີ້ ຢູ່ພຽງ 0,1% ເມື່ອທຽບກັບໄລຍະດຽວກັນຂອງປີຜ່ານມາຕໍ່າກວ່າຄວາມຄາດໝາຍ ຄື 0,2% ແລະ ຖືວ່າເປັນການຊະລໍຕົວທີ່ສຸດ ໃນຮອບ 1 ທົດສະວັດດ້ວຍ.

ທັງນີ້, ລັດຖະບານສິງກະໂປ ໃຫ້ນໍ້າໜັກວ່າບັນຫາຈາກສົງຄາມການຄ້າ ລະຫວ່າງ ສະຫະລັດ ກັບ ຈີນ ທີ່ຍືດເຍື້ອ ວ່າ ເປັນປະເດັນສໍາຄັນໃນການເຕີບໂຕຂອງເສດຖະກິດເກືອບທຸກປະເທດທົ່ວໂລກ ແລະ ບັນຫາເບຣັກຊິດ ລະຫວ່າງ ອັງກິດ ກັບ ສະຫະພາບເອີຣົບ ທີ່ແນວໂນ້ມການພົ້ນອອກຈາກສະຫະພາບແບບ “ບໍ່ມີຂໍ້ຕົກລົງໃດໆ” ໃນວັນທີ 31 ເດືອນຕຸລາ ນີ້ ມີສູງຂຶ້ນ ແຕ່ໃນຂະນະດຽວກັນ ຍັງເພິ່ມປະເດັນຄວາມຂັດແຍ້ງດ້ານການຄ້າລະຫວ່າງ ຍີ່ປຸ່ນ ກັບ ເກົາຫຼີໃຕ້ ເຊິ່ງເປັນມະຫາອຳນາດທາງດ້ານເສດຖະກິດໃນອາຊີ ແລະ ຄວາມວຸ້ນວາຍທາງການເມືອງໃນຮົງກົງ ທີ່ເປັນໜຶ່ງໃນຍຸດທະສາດ ແລະ ການຄ້າທີ່ສຳຄັນຂອງໂລກ.

ນອກຈາກນີ້, ລາຍງານຂອງກະຊວງການຄ້າສິງກະໂປ ຍັງກ່າວໂດຍລວມ ເຖິງສະຖານະການທາງເສດຖະກິດຂອງກຸ່ມປະເທດ (ASEAN-5) ທີ່ໝາຍເຖິງກຸ່ມ 5 ປະເທດ ຜູ້ກໍ່ຕັ້ງສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ ໄດ້ແກ່: ອິນໂດເນເຊຍ, ມາເລເຊຍ, ຟີລິບປິນ, ສິງກະໂປ ແລະ ໄທ. ວ່າມີແນວໂນ້ມທີ່ຈະຊລະລໍຕົວເຊັ່ນກັນ ດ້ວຍຜົນກະທົບຫຼັກທີ່ຍັງເປັນຂໍ້ຂັດແຍ່ງທາງການຄ້າ ລະຫວ່າງ ສະຫະລັດ ກັບ ຈີນ.