ເກົາຫຼີໃຕ້ ກຽມຍົກເລີກສິດພິເສດດ້ານການຄ້າຂອງຍີ່ປຸ່ນ

142

ລັດຖະບານເກົາຫຼີໃຕ້ ປະກາດການກຽມເອົາປະເທດຍີ່ປຸ່ນອອກຈາກ “ບັນຊີຂາວ” ທີ່ໄດ້ຮັບສິດເສດທາງການຄ້າ ຍ້າຍໄປຢູ່ໃນ “ບັນຊີໃໝ່” ສຳລັບປະເທດທີ່ຂັດຂວາງດ້ານການຄ້າ ຍົກລະດັບຄວາມຂັດແຍ່ງລະຫວ່າງສອງປະເທດໃຫ້ຮຸນແຮງຂຶ້ນກວ່າເກົ່າ.

ສຳນັກຂ່າວຕ່າງປະເທດລາຍງານຈາກນະຄອນຫຼວງໂຊ ປະເທດເກົາຫຼີໃຕ້ ເມື່ອວັນອັງຄານ ທີ 13 ສິງຫາ ວ່າ ທ່ານຊອງ ຢຸນ-ໂມ ລັດຖະມົນຕີກະຊວງອຸດສາຫະກໍາຂອງເກົ່າໃຕ້ ຖະແຫຼງ ເມື່ອວັນຈັນ ວ່າ ໃນການປະຊຸມຄະນະລັດຖະມົນເກົາຫຼີໃຕ້ ມີມະຕິເຫັນຊອບທີ່ຈະຖອດຖອນເອົາປະເທດຍີ່ປຸ່ນ ອອກຈາກ “ບັນຊີຂາວ” ເຊິ່ງເປັນສິດພິເສດທາງການຄ້າ ແລະ ຍີ່ປຸ່ນຈະເປັນປະເທດທຳອິດທີ່ເຂົ້າໄປຢູ່ໃນ “ບັນຊີໃໝ່” ທີ່ລັດຖະບານໂຊ ກຳລັງກະກຽມ ສຳລັບບັນຊີລາຍຊື່ປະເທດທີ່ມີນະໂຍບາຍ ແລະ ມາດຕະການດ້ານການຄ້າ ທີ່ບໍ່ເປັນໄປຕາມ “ບັນທັດຖານສາກົນ” ຢ່າງໃດກໍ່ຕາມ, ໜ່ວຍງານທີ່ກ່ຽວຂ້ອງຂອງເກົາຫຼີໃຕ້ ຍັງບໍ່ໄດ້ໃຫ້ຂໍ້ມູນແບບຊັດເຈນ ວ່າ ການຍ້າຍຍີ່ປຸ່ນອອກຈາກບັນຊີຊາວໄປຢູ່ “ບັນຊີໃໝ່” ຈະເກີດຂຶ້ນເມື່ອໃດ.

ທ່ານຊອງ ຢຸນ-ໂມ

ການເຄື່ອນໄຫວດັ່ງກ່າວ ເກີດຂື້ນປະມານສອງອາທິດ ຫຼັງຈາກຍີ່ປຸ່ນປະກາດກຽມເອົາເກົາຫຼີໃຕ້ ອອກຈາກບັນຊີຂາວ ເຊິ່ງເປັນສິດພິເສດແບບດຽວກັນ ຄືການໄດ້ຮັບສິດພິເສດສູງສຸດ ຈາກລັດຖະບານໂຕກຽວມອບໃຫ້ ເພື່ອການຊື້-ຂາຍ ຜະລິດຕະພັນທີ່ສຳຄັນ ເຊິ່ງລວມເຖິງອຸປະກອນຍຸໂທປະກອນ ຫຼື ສິນຄ້າທີ່ອາດກ່ຽວຂ້ອງກັບການປະຕິບັດການທາງທະຫານ ໂດຍຈະມີຜົນບັງຄັບໃຊ້ ໃນວັນທີ 28 ສິງຫາ ນີ້, ຫຼັງຍົກລະດັບຄວາມເຂັ້ມງວດໃນການກວດກາການສົ່ງອອກສິນຄ້າ ແລະ ວັດຖຸດິບ ສຳລັບການຜະລິດສິນຄ້າດ້ານເທັກໂນໂລຢີໄປເກົາຫຼີໃຕ້ ເມື່ອວັນທີ 4 ກໍລະກົດ ຜ່ານມາ ເພື່ອຕອບໂຕ້ອີກຝ່າຍທີ່ຮື້ຟື້ນບັນຫາ “ແຮງງານຂ້າທາດ” ທີ່ລັດຖະບານໂຕກຽວກ່າວຢໍ້າວ່າ “ໄດ້ຮ່ວມກັນແກ້ໄຂດົນແລ້ວ” ນັບຕັ້ງແຕ່ລົງນາມຂໍ້ຕົກລົງ ເມື່ອປີ 1965 ແຕ່ສານສູງສຸດໃນນະຄອນຫຼວງໂຊ ພິພາກສາປະເດັນທີ່ຮື້ຂຶ້ນມາ ເມື່ອທ້າຍປີຜ່ານມາ ໃຫ້ສອງບໍລິສັດຂອງຍີປຸ່ນ ຄື ບໍລິສັດນິບປອນ ສະຕິລ ແລະ ມິດຊູບີຊິ ເຮຟວີ ອິນດັດສະຕີ້ ໃຫ້ຈ່າຍຄ່າຊົດເຊີຍ “ຢ້ອນຫຼັງ” ໃຫ້ແກ່ລູກຫຼານ ຫຼື ຜູ້ສືບທອດຂອງແຮງງານທາດຈາກສະໄໝນັ້ນ.

ທ່ານມາຊາຊິຕະ ຊາໂຕະ ລັດຖະມົນຕີຊ່ວຍວ່າການກະຊວງການຕ່າງປະເທດຍີ່ປຸ່ນ ກ່າວວ່າ ມາດຕະການຕອບໂຕ້ຂອງລັດຖະບານໂຊ ຈະບໍ່ມີຜົນກະທົບ ເພາະວ່າ ຍີ່ປຸ່ນ ບໍ່ໄດ້ນຳເຂົ້າຜະລິດຕະພັນເທັກໂນໂລຢີທີ່ສຳຄັນຈາກເກົາຫຼີໃຕ້ຫຼາຍປານໃດ ສ່ວນແຫຼ່ງຂ່າວໃນລັດຖະບານໂຕກຽວ ເປີດເຜີຍວ່າ ຍີ່ປຸ່ນອາດຈະພິຈາລະນານຳເຂົ້າສິນຄ້າບາງຊະນິດຈາກໄຕ້ຫວັນແທນ.