ຜູ້ປ່ວຍໄຂ້ເລືອດອອກເດງກີ ໃນມາເລເຊຍ ເພິ່ມສູງເປັນປະຫວັດການ

159

ຈຳນວນຜູ້ຕິດເຊື້ອໄຂ້ເລືອດອອກເດງກີ ໃນມາເລເຊຍໃນປີນີ້ ສູງທີ່ສຸດເປັນປະຫວັດການ ເສຍຊີວິດແລ້ວ 113 ຄົນ ແລະ ມີແນວໂນ້ມເພິ່ມຂື້ນອີກ.

ສຳນັກຂ່າວຕ່າງປະເທດລາຍງານຈາກນະຄອນຫຼວງກົວລາລຳເປີ ປະເທດມາເລເຊຍ ເມື່ອວັນຈັນ ທີ 12 ສິງຫາ ວ່າ ກະຊວງສາທາລະນະສຸກມາເລເຊຍ ລາຍງານສະຖິຕິຂອງພະຍາດໄຂ້ເລືອດເດງກີ ໃນທົ່ວປະເທດ ຕັ້ງແຕ່ວັນທີ 1 ມັງກອນ ເຖິງວັນທີ 3 ເດືອນສິງຫາ ຜ່ານມາ ມີເກືອບ 80.000 ຄົນ  ແລະ ຈາກຈຳນວນດັ່ງກ່າວ ເສຍຊີວິດແລ້ວ 113 ຄົນ ຫຼາຍທີ່ສຸດເປັນປະຫວັດການ ໂດຍເມື່ອທຽບກັບສະຖານະການແຜ່ລະບາດຮຸນແຮງຄັ້ງກ່ອນໜ້ານີ້ ເມື່ອປີ 2015 ພົບວ່າ ຕະຫຼອດປີ ລາຍງານຈໍານວນຜູ້ຕິດເຊື້ອເປັນທາງການ 120.836 ຄົນ ແລະ ເສຍຊີວິດ 336 ຄົນ.

ທັງນີ້ ກະຊວງສາທາລະນະສຸກຂອງມາເລເຊຍ ປະກາດເປັນ “ພື້ນທີ່ສີແດງ” ເຊິ່ງໝາຍເຖິງການລະບາດຢ່າງຮຸນແຮງ 251 ແຫ່ງ ໃນ 9 ລັດ ແລະ ພື້ນທີ່ສ່ຽງສ່ວນຫຼາຍເປັນ ອາພາດເມັນ ແລະ ຊຸມຊົນແອອັດ ໄດ້ແກ່: ລັດສະລັງກໍ, ນະຄອນຫຼວງກົວລາລຳເປີ, ລັດຍະໂຮ, ລັດກລັນຕັນ, ລັດຊາບາ, ລັດປີນັງ, ລັດຊາຣາວັກ, ລັດເນກຣີລັນ ແລະ ລັດປະຫັງ. ຂະນະດຽວກັນ ມີການປະເມີນດ້ວຍວ່າ ຖ້າໜ່ວຍງານທຸກແຫ່ງທີ່ກ່ຽວຂ້ອງ ແລະພາກປະຊາຊົນຍັງຂາດການຈັດການ ແລະ ການຮ່ວມມືຢ່າງຈິງຈັງ ໃນການຄວບຄຸມສະຖານະການ ຈຳນວນຜູ້ປ່ວຍຈາກພະຍາດໄຂ້ເລືອດອອກເດງກີ ໃນທົ່ວປະເທດອາດຈະເພິ່ມຂື້ນເຖິງ 150.000 ຄົນ ພາຍໃນໝົດປີນີ້.

ສຳລັບລາຍງານສະຖານະການ ການແຜ່ລະບາດຂອງໄຂ້ເລືອດອອກເດງກີ ໃນປະເທດມາເລເຊຍ ເຊິ່ງເປັນພະຍາດລະບາດເຂດຮ້ອນທີ່ມີຍຸງລາຍເປັນພາຫະນໍາເຊື້ອ ໄດ້ເກີດຂຶ້ນ 1 ອາທິດ ຫຼັງຈາກກະຊວງສາທາລະນະສຸກຟີລິບປິນ ປະກາດໃຫ້ການແຜ່ລະບາດຂອງໄວຣັສເດງກີ ຫຼື ໄຂ້ເລືອດອອກເດງກີ ເປັນ “ພາວະສຸກເສີນດ້ານສຸຂະພາບແຫ່ງຊາດ” ໂດຍສະຖິຕິຢ່າງເປັນທາງການຂອງລັດຖະບານມະນິລາ ລະບຸຈຳນວນຜູ້ປ່ວຍ ລະຫວ່າງວັນທີ 1 ມັງກອນ ເຖິງວັນທີ 20 ກໍລະກົດ ຜ່ານມາ ມີ 146.062 ຄົນ ເພິ່ມຂື້ນຫຼາຍເຖິງ 98% ຈາກໄລຍະດຽວກັນຂອງປີຜ່ານມາ ແລະ ຈາກຈຳນວນດັ່ງກ່າວເສຍຊີວິດແລ້ວ 662 ຄົນ ແລະ ນະຄອນຫຼວງມະນິລາ ເປັນໜຶ່ງໃນບັນດາເຂດທີ່ສ່ຽງເຊັ່ນກັນ.