ເຈົ້າໜ້າທີ່ດັບເພີງ ປໍ້າຫົວໃຈໝານ້ອຍ 5 ໂຕ ລອດຊີວິດຈາກກອງໄຟ

159

ຖືເປັນອີກໜຶ່ງພາລະກິດທີ່ໜ້າຊື່ນຊົມສໍາລັບການປະຕິບັດໜ້າທີ່ຊ່ວຍຊີວິດ ບໍ່ວ່າຈະເປັນຄົນ ຫຼື ສັດ ກໍ່ຕາມ ໃຫ້ໄດ້ມີໂອກາດກ້າວເດີນຕໍ່ໄປ ເຈົ້າໜ້າທີ່ດັບເພີງ ໃນເມືອງອູ໋ຊີ ມົນທົນຈຽງຊູ ທາງພາກຕາເວັນອອກຂອງຈີນ ໄດ້ຊ່ວຍຊີວິດລູກໝານ້ອຍ 5 ໂຕ ອອກມາຈາກໂຮງງານແຫ່ງໜຶ່ງ ທີ່ໄຟກຳລັງໄໝ້ ແລະ ໄດ້ກະຕຸ້ນຫົວໃຈ ຫຼື ປໍ້າຫົວໃຈຂອງພວກມັນ ໃນຂະນະທີ່ ແມ່ໝາກໍ່ຢືນເຝົ້າລູກແບບບໍ່ຫ່າງ.

ເມື່ອວັນອາທິດ ທີ 4 ສິງຫາ ຜ່ານມາ ເກີດເຫດໄຟໄໝ້ ໃນຫ້ອງທີ່ຖືກລັອກໄວ້ຂອງໂຮງງານແຫ່ງໜຶ່ງ  ໃນໝູ່ບ້ານເໝີຊຸນ ເຈົ້າໜ້າທີ່ດັບເພີງໄດ້ມ້າງປະຕູເຂົ້າໄປໃນຫ້ອງ ແລະ ດັບໄຟທີ່ກໍາລັງລຸກໄໝ້ໄດ້ທັນທີ ໂດຍລະຫວ່າງການປະຕິບັດໜ້າທີ່ຢູ່ນັ້ນ ເຈົ້າໜ້າທີ່ດັບເພີງໄດ້ພົບເຫັນໝານ້ອຍ 5 ໂຕ ນອນໝົດສະຕິຢູ່ໃນຫ້ອງດັ່ງກ່າວ.

ເຈົ້າໜ້າທີ່ຄ່ອຍໆ ອູ້ມມັນອອກມາວາງໄວ້ຢູ່ນອກ ແລ້ວໃຊ້ມືຈຸ່ມນໍ້າລູບລູກໝາຄ່ອຍໆ ກ່ອນທີ່ຈະໃຊ້ນິ້ວຄ່ອຍໆເຕັກລົງບ່ອນກະດູກຊີກໂຄງເພື່ອກະຕຸ້ນຫົວໃຈພວກມັນທີ່ນອນສະຫຼົບຢູ່ ດ້ວຍຄວາມພະຍາຍາມຂອງເຈົ້າໜ້າທີ່ ສຸດທ້າຍລູກໝາທັງ 5 ໂຕ ກໍ່ເລິ່ມມີສະຕິ ແລະ ຄ່ອຍໆກັບມາເໜັງຕີງອີກຄັ້ງ.

ແມ່ໝານ້ອຍເຫຼົ່ານີ້ ກໍ່ຢືນເບິ່ງລູກຂອງມັນບໍ່ຫ່າງ ແລະ ແລ່ນເຂົ້າໄປຫາລູກດ້ວຍຄວາມເປັນຫ່ວງ ຖືເປັນສິ່ງທີ່ຄວນໄດ້ຮັບການຍ້ອງຍໍ ສໍາລັບຄວາມຮັບຜິດຊອບຕໍ່ໜ້າທີ່ຂອງເຈົ້າໜ້າທີ່ທຸກຄົນທີ່ໃຫ້ຄວາມສໍາຄັນໃນການຊ່ວຍເຫຼືອຕໍ່ທຸກສິ່ງທີ່ມີຊີວິດ ທີ່ຜະເຊີນກັບອຸປະສັກ ແລະ ກໍ່ຂໍອວຍພອນໃຫ້ພວກທ່ານຢຶດໝັ້ນກັບອຸດົມການນີ້ຕໍ່ໆໄປ.