ຈີນເຕືອນໄພ ພາຍຸໄຕ້ຝຸ່ນ ເມລິກາ ໃກ້ຂຶ້ນຝັ່ງມົນທົນເຈີ້ຈຽງ

179

ສູນອຸຕຸນິຍົມວິທະຍາຂອງຈີນ ປະກາດເຕືອນໄພ ວ່າ ພາຍຸໄຕ້ຝຸ່ນ “ເມລິກາ” ກໍາລັງພັດຜ່ານເຂົ້າໃກ້ຝັ່ງມົນທົນເຈີຈ້ຽງ ທາງພາກຕາເວັນອອກຂອງຈີນ ແລະ ຈະເຄື່ອນທີ່ຂື້ນໄປທາງທິດເໜືອ ໂດຍສະເພາະຢູ່ເຂດສາມຫຼ່ຽມປາກແມ່ນໍ້າແຍງຊີ ຂະນະທີ່ ໄຕ້ຫວັນຕ້ອງຍົກເລີກຖ້ຽວບິນຫຼາຍຮ້ອຍຖ້ຽວ.

ສຳນັກຂ່າວຣອຍເຕີ ລາຍງານຈາກນະຄອນຫຼວງປັກກິ່ງ ປະເທດຈີນ ເມື່ອວັນສຸກ ວັນທີ 9 ສິງຫາ ວ່າ ສູນອຸຕຸນິຍົມວິທະຍາຂອງຈີນ ໄດ້ຖະແຫຼງການ ວ່າ ພາຍຸໄຕ້ຝຸ່ນ “ເມລິກາ” ເຊິ່ງເປັນພາຍຸທີ່ຮຸນແຮງທີ່ສຸດ ນັບຕັ້ງແຕ່ປີ 2014 ເປັນຕົ້ນມາ ໃກ້ພັດຜ່ານຂຶ້ນຝັ່ງທີ່ມົນທົນເຈີ້ຈຽງ ແຄມຝັ່ງທິດຕາເວັນອອກຂອງຈີນ ໃນໄລຍະເຊົ້າວັນເສົາທີ 10 ສິງຫາ ນີ້ ກ່ອນທີ່ຈະເຄື່ອນທີ່ຂຶ້ນໄປທິດເໜືອ ເຊິ່ງທາງການໄດ້ແຈ້ງເຕືອນຄວາມແຮງລົມທໍາອິດ ໃນບໍລິເວນເຂດສາມຫຼ່ຽມປາກແມ່ນໍ້າແຍງຊີ ທີ່ລວມເຖິງນະຄອນຊຽງໄຮ້ ເຊິ່ງເປັນສູນກາງດ້ານເສດຖະກິດສຳຄັນຂອງຈີນ ແລະ ເຮືອສຳລານໄດ້ຮັບຄໍາສັ່ງໃຫ້ເລື່ອນການເດີນທາງໄປຊຽງໄຮ້.

ໜັງສືພິມຊຽງໄຮ້ ລາຍງານປະຈຳວັນ ວ່າ ຝົນຕົກໜັກ ແລະ ລົມແຮງໃນລະດັບ 10 ຈະພັດຜ່ານເຂົ້າຊຽງໄຮ້ ໃນວັນສຸກ ແລະ ຈະສືບຕໍ່ຈົນຮອດວັນອາທິດ ທີ 11 ສິງຫາ ທາງການຕ້ອງສັ່ງອົບພະຍົບປະຊາຊົນ 16.000 ຄົນ ໃນເຂດຊານເມືອງໄປຢູ່ບ່ອນປອດໄພ.

ສູນອຸຕຸນິຍົມວິທະຍາຂອງຈີນ ຍັງເຕືອນໃຫ້ລະວັງຝົນຕົກໜັກຕະຫຼອດບໍລິເວນແຄມຝັ່ງ ພາກຕາເວັນອອກຂອງຈີນ ອາດ ວັດແທກປະລິມານນໍ້າຝົນ ໄດ້ເຖິງ 250-320 ມິນລີແມັດ ຕັ້ງແຕ່ຕອນບ່າຍວັນສຸກ ຈົນເຖິງຕອນບ່າຍວັນເສົາ ວັນທີ 10 ສິງຫາ ດ້ານກະຊວງຊັບພະຍາກອນນໍ້າຂອງຈີນ ໄດ້ເຕືອນວ່າ ອາດຈະເກີດນໍ້າຖ້ວມ ຢູ່ພາກຕາເວັນອອກຂອງຈີນ  ແລະ ສາຍຂອງແມ່ນໍ້າແຍງຊີ ແລະ ແມ່ນໍ້າເຫຼືອງ.

ປົກກະຕິແລ້ວ ຈີນຈະຜະເຊີນກັບພາຍຸໄຕ້ຝຸ່ນໃນໄລຍະລະດູຮ້ອນທຸກໆປີ ແຕ່ເຈົ້າໜ້າທີ່ອຸຕຸນິຍົມວິທະຍາໄດ້ເຕືອນໄວ້ ຕັ້ງແຕ່ອາທິດ ຜ່ານມາ ວ່າ ປີນີ້ ຈະມີພາຍຸໄຕ້ຝຸ່ນພັດຜ່ານຢ່າງຕໍ່ເນື່ອງ.

ສ່ວນເກາະໄຕ້ຫວັນ ທາງການໄດ້ສັ່ງຍົກເລີກຖ້ຽວບິນຂາເຂົ້າ ແລະ ຂາອອກຫຼາຍກວ່າ 300 ຖ້ຽວ ປິດຕະຫຼາດຫຸ້ນ ແລະ ສະຖານທີ່ສຶກສາທັງໝົດ ໃນວັນສຸກ ທີ 9 ສິງຫາ ຂະນະທີ່ ພາຍຸໄຕ້ຝຸ່ນເມລິກາ ເຄື່ອນທີ່ໄປທາງທິດຕາເວັນຕົກສຽງເໜືອ ເຊິ່ງປະຊາຊົນ 40.000 ຄົວເຮືອນ ບໍ່ມີໄຟຟ້າ ແລະ ລົດໄຟຄວາມໄວສູງຕ້ອງຢຸດຊົ່ວຄາວ.

ທາງການໄຕ້ຫວັນ ຍັງໄດ້ສັ່ງໃຫ້ລະວັງດິນເຈື່ອນ ຫຼັງເກີດແຜ່ນດິນໄຫວ ຮຸນແຮງ 6.0 ແມັກນິຈູດ ບໍລິເວນແຄມຝັ່ງທາງທິດຕາເວັນອອກສຽງເໜືອຂອງໄຕ້ຫວັນ ເມື່ອວັນພະຫັດ ຜ່ານມາ ກ່ອນທີ່ລົມພາຍຸຈະພັດຜ່ານ ເຮັດໃຫ້ມີຝົນຕົກ ໜັກ ວັດແທກປະລິມານນໍ້າຝົນໄດ້ 900 ມິນລີແມັດ.